Srishti Tuli | (Photo credit: archived, edited, representative image)

Mumbai Crime News: सृष्टी हिचा मृतदेह मुंबई येथील अंधेरी येथील मरोळ परिसरात ती भाड्याने राहात असलेल्या फ्लॅटमध्ये आढळून आला होता. तिने गळफास घेतल्याची प्राथमिक माहिती होती. तसेच, तिने आत्महत्या केली असावी, असाही संशय व्यक्त होत होता. दरम्यान, पोलिसांनी या प्रकरणात 27 वर्षीय तरुणास ताब्यात घेतले आहे. त्याच्यावर आत्महत्येस प्रवृत्त केल्याचा आरोप आहे. आदित्य पंडित असे या तरुणाचे नाव असून, तो सृष्टीचा प्रियकर असल्याचे सांगितले जात आहे. घटनास्थळी कोणतीही सुसाईड नोट सापडली नाही आणि तपास सुरू आहे.

पायलटच्या कुटुंबीयांचा दावा काय?

एअर इंडिया कंपनीची महिला पायलट सृष्टी तुली यांच्या कुटुंबीयांनी केलेल्या आरोप आणि दाव्यांमध्ये म्हटले आहे की, सृष्टी हिने तिच्या मृत्यूपूर्वी जवळपास 15 मिनीटेच आगोदर तिची आई आणि मावशी यांच्याशी संवाद साधला होता. या वेळी ती त्यांच्याशी आनंदात आणि अगदी सामान्यपणे बोलत होती. दरम्यान, तिच्या मृत्यूची बातमी समजली. प्राथमिक माहितीनुसार, कुटुंबीयांशी बोलल्यानंतर थोड्याच वेळात, तिच्या प्रियकराला तिच्या फ्लॅटचा दरवाजा कुलूपबंद आढळला. त्यामुळे त्याने (आदित्य पंडित) दुसरा पायलट आणि चावी बनवणाऱ्याच्या मदतीने घरात शिरला असता डेटा केबलने गळफास घेतलेल्या अवस्थेत सृष्टी त्याला आढळून आली. त्याने तिला तातडीने रुग्णालयात दाखल केले. मात्र, तिथे तिला मृत घोषीत करण्यात आले. (हेही वाचा, Air India Pilot Found Dead in Mumbai: मुंबईतील फ्लॅटमध्ये आढळला एअर इंडियाच्या महिला पायलटचा मृतदेह; प्रियकरास अटक)

कुटुंबीयांकडून प्रियकारवर मानसिक छळाचे आरोप

उत्तर प्रदेशातील गोरखपूरमध्ये राहणाऱ्या सृष्टीच्या कुटुंबीयांनी आदित्यने तिचा मानसिक आणि आर्थिक छळ केल्याचा आरोप केला आहे. कुटुंबीयांनी केलेले आरोप खालील प्रमाणे:

  • मानसिक छळः सृष्टीचे काका विवेक तुली यांनी दावा केला की, आदित्य अनेकदा तिचा सार्वजनिकरित्या अपमान करत असे, तिच्यावर ओरडत असे आणि तिच्यावर मांसाहार सोडण्यासाठी दबाव आणत असे. ज्यामुळे ती आत्महत्या करण्यास प्रवृत्त झाली.

  • आर्थिक शोषणः दिवाळीच्या सुमारास आदित्यच्या कुटुंबाला ₹65,000 हस्तांतरित झाल्याचे कुटुंबाने म्हटले आहे. "तो तिला ब्लॅकमेल करत होता". तुली यांनी आरोप केला, पुढील पुराव्यांसाठी ते तिच्या आर्थिक नोंदी तपासत आहेत.

  • कारकिर्दीवर मत्सरः सृष्टीने पूर्ण केलेल्या व्यावसायिक उड्डाण अभ्यासक्रमातून बाहेर पडलेल्या आदित्यने कथितपणे तिच्या यशाबद्दल मत्सर दर्शविला.

दरम्यान, सृष्टीने आत्महत्या केली त्या वेळी आणखी एक महिला पायलट तेथे उपस्थित होती. तिच्यावरही संशय घेतला जात आहे. अधिक माहिती अशी की, दोन वर्षांपूर्वी दिल्लीतील एका व्यावसायिक उड्डाण अभ्यासक्रमादरम्यान सृष्टी आदित्यला भेटली. पायलटचा परवाना मिळवल्यानंतर ती मुंबईला गेली, तर फरिदाबादमध्ये राहणारा आदित्य तिला वारंवार भेटायला यायचा. पोलिसांनी घटनेची नोंद घेतली असून पुढील तपास सुरु आहे.