ओशिवरा परिसरात 19 वर्षीय तरुणी नाल्यात पडली; 18 फेब्रुवारी 2020 च्या ताज्या मराठी बातम्या आणि ब्रेकिंग न्यूज LIVE

ओशिवरा परिसरात 19 वर्षीय तरुणी नाल्यात पडली, तरुणीचे शोधकार्य सुरु, अग्निशामक दल आणि पोलिस पथक घटनास्थळी दाखल झाले आहेत.

पुण्यामध्ये तृप्ती देसाई यांच्याविरोधात एका महिलेकडून तक्रार दाखल करण्यात आली आहे. अनुराधा पाटील असे यांचे नाव असून, कोथरूड पोलीस ठाण्यात ही तक्रार दाखल केली आहे. जाणीवपूर्वक धार्मिक भावाला दुखावल्याबद्दल ही तक्रार दाखल करण्यात आली आहे. 

भीम आर्मीने दाखल केलेल्या याचिकेवर, मुंबई उच्च न्यायालयाच्या नागपूर खंडपीठाने राज्य सरकार आणि नागपूर पोलिस आयुक्तांना नोटीस बजावली असून, चंद्रशेखर आझाद यांना 22 फेब्रुवारी रोजी रेशीमबाग मैदानावर जाहीर सभा घेण्यास परवानगी न देण्याच्या पोलिस निर्णयाला आव्हान दिले आहे.

पुणे येथील पंढरीनाथ तथा अण्णासाहेब तुकाराम पठारे यांना शिवछत्रपती जीवन गौरव पुरस्कार जाहीर झाला आहे. शिवछत्रपती पुरस्कारासाठी जीवन गौरव, मार्गदर्शन, संघटक, कार्यकर्ते, खेळाडू अशा पाच गटामध्ये तब्बल 289 अर्ज प्राप्त, यातून 63 व्यक्तींची पुरस्कारासाठी निवड केली गेली. क्रीडामंत्री सुनील केदार यांनी याबाबत माहिती दिली. 

22 फेब्रुवारीला गेट वे ऑफ इंडिया येथे, शिवछत्रपती राज्य क्रीडा पुरस्कार प्रदान समारंभासह, खेलो इंडिया युथ गेम्स 2020 मधील पदक विजेत्या खेळाडूंचा मुख्यमंत्री उद्धव ठाकरे, उपमुख्यमंत्री अजित पवार यांच्या हस्ते सत्कार होणार आहे. 

कर्नाळा नागरी सहकारी बँक घोटाळ्याप्रकरणी रायगड जिल्हा विशेष लेखापरीक्षकांनी बँकेचे अध्यक्ष आणि शेकापचे माजी आमदार विवेक पाटील यांच्यासह संचालक, अधिकारी अशा 76 जणांविरोधात एफआयआर दाखल केला असून, यानुसार पनवेल शहर पोलीस ठाण्यात गुन्हे दाखल करण्यात आले आहेत. 512. 54 कोटी रुपयांचा अपहार केल्याचा आरोप त्यांच्यावर करण्यात आला आहे. 

महाराष्ट्रात नागरिकत्व दुरुस्ती कायदा लागू करण्याला विरोधच करणार असल्याची ठाम भूमिका बाळासाहेब थोरात यांनी मांडली आहे. हा आमच्या पक्षाचा निर्णय आहे, जिथे कुठेही समाजात दरी निर्माण करण्याचा प्रयत्न होईल तिथे काँग्रेस पक्ष विरोधच करेल. CAA बद्दल आम्ही मित्रपक्षांशी बोलून आणि चारचा करून मत बदलण्याचा प्रयत्न करू असेही थोरात म्हणाले आहेत, मुख्यमंत्री उद्धव ठकरे यांनी CAA ला पाठिंबा दर्शवल्यावरून थोरात बोलत होते.

तृप्ती देसाई यांनी इंदुरीकर महाराजांवर गुन्हा दाखल करण्याची मागणी करताना असे न केल्यास त्यांचे तोंड काळे करू असा इशारा दिला होता, यावर महाराष्ट्र करणीसेनेने पलटवार करत तृप्ती देसाईंनी जर का इंदुरीकरांचा विरोध केला तर आम्हीच त्यांचं तोंड काळं करू असे उत्तर दिले आहे. 

शिवभोजन योजनेला भरघोस प्रतिसाद मिळत असल्याने मुख्यमंत्री उद्धव ठाकरे यांनी योजेनचा विस्तार करण्यासाठी  अन्न व नागरी पुरवठा विभागास सूचना दिल्याचे समजत आहे, यानुसार दिवसाला या योजनेतील थाळीच्या संख्येत दुप्पट वाढ करण्यात येणार असून आता दिवसाला 36 हजार थाळी उपलब्ध असणार आहेत.

अशरफ़ ग़नी यांची पुन्हा एकदा अफगाणिस्तान च्या राष्ट्राध्यक्ष पदी वर्णी लागली आहे.

नाशिक येथील एमआयएम चे आमदार फारुख शहा यांच्यासहित 164 नेत्यांवर तसेच भाजपचे स्वीकृत नगरसेवक सोनल शिंदे यांच्यावर पुढील तीन वर्ष मनपा निवडणूक लढवण्यावर बंदी घालण्यात आली आहे. 2018 च्या सार्वत्रिक निवडणुकीच्या खर्चाचे तपशील न दिल्याने नाशिक महानगपालिका आयुक्तांकडून ही कारवाई करण्यात आली आहे. 

माजी पोलीस आयुक्त राकेश मारिया यांनी Let Me Say It Now पुस्तकातून शीना बोरा हत्याकांड व कसाब आणि दाऊद इब्राहिम यांच्या संबंधांविषयी केलेले खुलासे नेमके काय आहेत तसेच देवेंद्र फडणवीस यांच्या कार्यकाळात मारिया यांच्यावर लगावण्यात आलेले आरोप आणि घटना यांचा अभ्यास करून त्यासंदर्भांत मारिया यांच्याशी चर्चा करून  मग पुढील निर्णय घेण्यात येईल अशी माहिती महाराष्ट्राचे गृहमंत्री अनिल देशमुख यांनी दिली आहे. तसेच गरज पडल्यास याप्रकरणी चौकशी देखील करण्यात येईल असेही देशमुख म्हणाले.

कीर्तनकार इंदुरीकर महाराज यांनी गर्भलिंग निदान पद्धतीवर 'ऑड - इव्हन फॉर्म्युला' सांगत केलेल्या वादग्रस्त विधानामुळे महाराष्ट्रभरात वाद निर्माण झाला आहे. आता त्याच्या विरोधात तृप्ती देसाई यांनी अहमदनगरमध्ये गुन्हा दाखल केला आहे.  

हिदुस्थान पेट्रो फोन (Hindustan Petro Foam) कंपनीला आज पहाटे 3 च्या सुमारास लागलेल्या भीषण आगीमुळे कंपनीचे तब्बल 15 कोटींचे नुकसान झाले आहे. पालघरमधील (Palghar) वाडा (Wada) तालुक्यात बिलोशी (Biloshi) येथील परिसरात ही कंपनी आहे. या कंपनीत फोमचे उत्पादन केले जाते. शार्टसर्किटमुळे आग लागली, असा अंदाज व्यक्त केला जात आहे. सुदैवाने या आगीत कोणतीही जीवीतहानी झाली नाही.

डोंबिवली येथे एमआयडीसीतील एका कंपनीला आग लागल्याची घटना घडली आहे. अग्निशमनदलाच्या 4 गाड्या घटनास्थळी दाखल झाल्या असून आग आटोक्यात आणण्याचे प्रयत्न सुरु आहेत. तसेच आग कशामुळे लागली याची अद्याप कोणतीही माहिती समोर आली नाही.

महाराष्ट्राचे मुख्यमंत्री उद्धव ठाकरे कोकण दौऱ्यावर आहेत.  उद्धव ठाकरे यांनी आज पत्रकार परिषद घेऊन सिंधुदूर्ग आणि कोकणच्या विकासासंदर्भात अनेक मुद्दे मांडली होती. त्यावेळी त्यांनी नाणार प्रकल्पावरही भाष्य केले होते. एकेकाळी या प्रकल्पाला विरोध करणाऱ्यांच्या पाठीमागे उभे राहणाऱ्या शिवसेनेने आपली भुमिका बदलली असून रिफायनरीच्या समर्थनार्थ मोर्चा काढला आहे. तसेच रिफायनरीचे फायदे लक्षात आल्याने सर्मथन केल्याचे शिवसैनिक बोलत आहेत.

इंदूरीकर महाराजांनी त्यांच्या एका किर्तनामध्ये वादग्रस्त विधान केल्यामुळे अनेक वादाला तोंड फुटले आहे. यातच इंदूरीकर महाराज यांनी आपल्या वक्तव्यावर दिलगिरी व्यक्त करत लोकांची माफी मागितली आहे. तर, समाजिक कार्यकर्त्या तृप्ती देसाई यांच्याकडून इंदोरीकर महाराज यांच्याविरोधात गुन्हा दाखल करण्यात येणार असल्याची माहिती समोर आली. तसेच तृप्ती देसाई आपल्या निर्णयावर ठाण असल्याचे त्यांनी प्रसार माध्यमांना सांगितले आहे. 

कोरेगाव-भीमा प्रकरणी (Bhima Koregaon Case) महाराष्ट्राचे मुख्यमंत्री उद्धव ठाकरे (Uddhav Thackeray) यांच्या निर्णयावर राष्ट्रवादी काँग्रेस पक्षाचे (Nationalist Congress Party) सर्वेसर्वा शरद पवार (Sharad Pawar) यांनी नाराजी दर्शवत आपल्या पक्षाची बैठक बोलावली होती. तसेच एल्गार परिषद आणि भीमा कोरेगाव प्रकरणाची उलटसुटल चर्चा होत असल्याचे समजत आहे. यावरून शरद पवार यांनी मुंबई येथे पत्रकार परिषद घेऊन लोकांमध्ये असलेला गैरसमज दूर करण्याचा पयत्न केला आहे. दरम्यान, शरद पवार यांनी  एल्गार परिषद आणि कोरेगाव-भीमा प्रकरणाबाबत भाष्य केले आहे. तसेच दोन्ही प्रकरण वेगवेगळे असल्याचे त्यांनी सांगितले आहे. यावेळी राष्ट्रवादीचे प्रदेशाध्यक्ष जयंत पाटीलही त्या ठिकाणी उपस्थित होते.

मुख्यमंत्री उद्धव ठाकरे यांचा कोकण दौऱ्यातील दुसरा दिवस आहे. यातच उद्धव ठाकरे यांनी पत्रकार परिषद घेऊन विकासाबाबत महत्वाचे मुद्दे मांडले आहे. दरम्यान, उद्धव ठाकरे यांनी आरोग्य, रस्ता, शेती आणि इतर महत्वाच्या मुद्द्यांवर चर्चा केली आहे. यात सिंधदुर्ग विकास योजना, एनआरसी, कोरेगाव-भीमा, एलईडी मासेमारी, चीपी विमानतळ यांसारख्या विषयाचा समावेश आहे. तसेच प्रलंबित कामे लवकरात लवकर मार्गी लावण्यासाठी बैठका घेतल्या जात आहे, अशीही माहिती उद्धव ठाकरे यांनी दिली आहे. 

पाकिस्तान पुन्हा भारतावर दहशतवादी हल्ला करण्याच्या तयारीत असल्याची माहिती भारतीय सुरक्षा आणि तपास यंत्रणेने दिली आहे. पाकिस्तान कठुआ सांबा रोड येथे दहशतवादी हल्ल्याचा कट रचत असल्याचे सांगितले जात आहे. 

पाकिस्तान पुन्हा भारतावर दहशतवादी हल्ला करण्याच्या तयारीत असल्याची माहिती भारतीय सुरक्षा आणि तपास यंत्रणेने दिली आहे. पाकिस्तान कठुआ सांबा रोड येथे दहशतवादी हल्ल्याचा कट रचत असल्याचे सांगितले जात आहे.