Parle-G Packet for INR 2,342 in Gaza: गाझामध्ये तब्बल 2,342 रुपयांना विकले जात आहे भारतामधील लोकप्रिय पारले-जी बिस्किटांचे पॅकेट; पॅलेस्टिनी मुलीचा हृदयस्पर्शी व्हिडीओ व्हायरल (Watch)
अन्नटंचाई आणि काळ्या बाजारामुळे या बिस्किटाची किंमत तब्बल 2,300 रुपये झाली आहे. गाझामधील रहिवासी मोहम्मद जवाद यांनी आपल्या मुलीला, रविफला तिचे आवडते बिस्किट आणून देण्यासाठी 24 युरो (सुमारे 2,342 रुपये) मोजले.
भारतात प्रत्येक घरात सहज उपलब्ध असणारा आणि अगदी स्वस्तात मिळणारे पारले-जी बिस्किट (Parle-G Biscuits), युद्धग्रस्त गाझा (Gaza) पट्टीत आता विलासिता म्हणजेच एखादी लक्झरी बाब बनले आहे. येथील अन्नटंचाई आणि काळ्या बाजारामुळे या बिस्किटाची किंमत तब्बल 2,300 रुपये झाली आहे. गाझामधील रहिवासी मोहम्मद जवाद यांनी आपल्या मुलीला, रविफला तिचे आवडते बिस्किट आणून देण्यासाठी 24 युरो (सुमारे 2,342 रुपये) मोजले. त्यांनी हा भावनिक क्षण दाखवणारा व्हिडिओ सोशल मीडियावर शेअर केला, जो व्हायरल झाला आणि जगभरातील लोकांच्या हृदयाला स्पर्श करून गेला.
इस्त्रायल आणि हमास यांच्यातील संघर्ष ऑक्टोबर 2023 पासून सुरू आहे, आणि त्यामुळे गाझामध्ये अन्न आणि मूलभूत गरजांच्या वस्तूंची प्रचंड टंचाई निर्माण झाली आहे. 2 मार्च ते 19 मे 2025 या कालावधीत इस्त्रायलने गाझावर जवळजवळ संपूर्ण बंदी घातली होती, ज्यामुळे मानवीय मदत ट्रकांना प्रवेश मिळणे कठीण झाले. संयुक्त राष्ट्रांच्या अहवालानुसार, गाझामध्ये 5 वर्षांखालील मुलांमध्ये तीव्र कुपोषणाचे प्रमाण फेब्रुवारीपासून जवळजवळ तिप्पट झाले आहे. मे 2025 मध्ये तपासलेल्या 50,000 मुलांपैकी 5.8% मुलांना तीव्र कुपोषण आढळले, जे मे महिन्याच्या सुरुवातीला 4.7% होते.
याशिवाय, गंभीर तीव्र कुपोषणाचे प्रमाणही वाढले आहे, ज्यामुळे मुलांचे रोगप्रतिकारक क्षमता कमकुवत होऊन त्यांना संसर्गाचा धोका वाढला आहे. पारले-जी बिस्किट, जे भारतात 1938 मध्ये स्वदेशी चळवळीचा भाग म्हणून सुरू झाले, हे किफायतशीर आणि सर्वांना परवडणारे अन्न आहे. भारतात याची किंमत 5 ते 10 रुपये आहे, तर आंतरराष्ट्रीय बाजारात ती साधारण 100 रुपये आहे. परंतु गाझामध्ये, युद्धामुळे आणि काळ्या बाजारामुळे, या बिस्किटाची किंमत 2,300 ते 2,400 रुपये झाली आहे.
मोहम्मद जवाद यांनी आपल्या मुलीला हे बिस्किट आणून दिल्यावर सोशल मीडियावर लिहिले, ‘खूप वाट पाहिल्यानंतर, मी शेवटी रविफसाठी तिचे आवडते बिस्किट आणले. किंमत 1.5 युरोपासून 24 युरोपेपर्यंत वाढली असली, तरी मी तिला त्याचे आवडते खाद्यपदार्थ नाकारू शकलो नाही.’ (हेही वाचा: West Virginia Child Death: रडलं म्हणून बापाने थेट बाळच भिरकावलं, कवटीस दुखापत झाल्याने मृत्यू; नैराश्येतून कृत्य केल्याची कबुली, पोलीस तपास सुरु)
Parle-G Packet for INR 2,342 in Gaza:
After a long wait, I finally got Ravif her favorite biscuits today. Even though the price jumped from €1.5 to over €24, I just couldn’t deny Rafif her favorite treat. pic.twitter.com/O1dbfWHVTF
— Mohammed jawad 🇵🇸 (@Mo7ammed_jawad6) June 1, 2025
दरम्यान, गाझामधील अन्नटंचाईमुळे अनेक आवश्यक वस्तूंच्या किमती गगनाला भिडल्या आहेत. उदाहरणार्थ, 1 किलो साखरेची किंमत 5,000 रुपये आणि बटाट्याची किंमत 2,000 रुपये आहे. गाझा शहरातील 31 वर्षीय डॉक्टर खालेद अलशव्वा यांनी सांगितले की, मानवीय मदतीद्वारे येणाऱ्या वस्तू फक्त काही मोजक्यांपर्यंत पोहोचतात. या वस्तू मोफत येतात, पण टंचाईमुळे त्या काळ्या बाजारात उच्च किमतीला विकल्या जातात.
(The above story first appeared on LatestLY on Jun 06, 2025 07:24 PM IST. For more news and updates on politics, world, sports, entertainment and lifestyle, log on to our website latestly.com).
