Imran Khan Arrest Warrant: तोशाखाना प्रकरणी माजी पंतप्रधान इम्रान खानला होऊ शकते अटक; निवासस्थानी पोहोचले पोलीस

Imran Khan Arrest Warrant: तोशाखाना प्रकरणात (Toshakhana Case) पोलिसांनी पाकिस्तानचे माजी पंतप्रधान इम्रान खान (Imran Khan) यांना अटक करण्यासाठी इस्लामाबादमधील निवासस्थान गाठले आहे. पाकिस्तानी मीडियाच्या हवाल्याने ही बातमी समोर येत आहे. इमरान खान यांच्या अटकेचे वॉरंट घेऊन पोलीस त्याच्या घरी पोहोचल्याचे सांगण्यात येत आहे.

पाकिस्तानच्या निवडणूक आयोगाने गेल्या वर्षी 21 ऑक्टोबरला म्हटले होते की, पाकिस्तान तहरीक-ए-इन्साफ (पीटीआय) पक्षाचे प्रमुख इम्रान खान यांनी पंतप्रधान म्हणून मिळालेल्या भेटवस्तूंबाबत खोटी घोषणा केली होती. नंतर निवडणूक आयोगाने तोशाखाना प्रकरणात खोटी विधाने आणि खोट्या घोषणा केल्याबद्दल इम्रान खान यांना संसदेच्या सदस्यत्वापासून अपात्र ठरवले. (हेही वाचा -Attack on Imran Khan: 'इम्रान खानला मारण्यासाठी आलो होतो...'; गोळीबार करणाऱ्या हल्लेखोराची कबुली (Watch Video))

पाकिस्तानच्या निवडणूक आयोगाच्या नोंदीनुसार, तोशाखानामधून 21.5 दशलक्ष रुपयांच्या भेटवस्तू निश्चित किंमतीच्या आधारे खरेदी करण्यात आल्या. त्यांची किंमत सुमारे 108 दशलक्ष रुपये होती. पाकिस्तानी कायद्यानुसार, एखाद्या व्यक्तीला भेटवस्तू ठेवण्याची परवानगी देण्यापूर्वी परदेशी भेटवस्तू मूल्यांकनासाठी तोशाखाना किंवा खजिन्यात जमा करणे आवश्यक आहे. मोठ्या भेटवस्तू तोशाखानाला पाठवल्या जातात, परंतु प्राप्तकर्ते 50 टक्के सूट देऊन त्या परत खरेदी करू शकतात.

माजी पंतप्रधान इम्रान खान यांनी गेल्या वर्षी सप्टेंबरमध्ये कबूल केले होते की, त्यांच्या पंतप्रधानपदाच्या कार्यकाळात मिळालेल्या किमान चार भेटवस्तू त्यांनी विकल्या होत्या. इम्रान खान 2018 मध्ये पंतप्रधान झाले. परंतु एप्रिल 2022 मध्ये संसदेत अविश्वास ठरावाद्वारे त्यांना पदावरून हटवण्यात आले.

(The above story first appeared on LatestLY on Mar 05, 2023 02:08 PM IST. For more news and updates on politics, world, sports, entertainment and lifestyle, log on to our website latestly.com).