Mahadev Betting App Case: रणबीर कपूरनंतर आता कपिल शर्मा, हुमा कुरेशी आणि हिना खान यांना ED ची नोटीस; चौकशीसाठी बोलावले

अंमलबजावणी संचालनालयाने (ED) कॉमेडीयन कपिल शर्मा, अभिनेत्री हुमा कुरेशी आणि हिना खान यांना महादेव बेटिंग अॅपशी (Mahadev Betting App) संबंधित मनी लाँड्रिंग प्रकरणात समन्स पाठवले आहे. या तिघांना वेगवेगळ्या तारखांना चौकशीसाठी हजर राहण्यास सांगितले आहे. याप्रकरणी तपास यंत्रणेने बॉलिवूड अभिनेता रणबीर कपूरला यापूर्वीच समन्स पाठवले होते. त्याला 6 ऑक्टोबर रोजी रायपूर विभागीय कार्यालयात चौकशीसाठी हजर राहण्याचे आदेश दिले आहेत. कपूरने दोन आठवड्यांचा वेळ मागितल्याचे सांगितले जात आहे. अधिकाऱ्यांनी सांगितले की, आता नुकतेच आणखी तीन कलाकारांना समन्स पाठवण्यात आले असून त्यांना वेगवेगळ्या तारखांना एजन्सीच्या रायपूर कार्यालयात हजर राहण्यास सांगण्यात आले आहे.

एजन्सी अँटी मनी लाँडरिंग अॅक्ट (PMLA) अंतर्गत या कलाकारांचे स्टेटमेंट रेकॉर्ड करेल आणि अॅपच्या प्रवर्तकांनी कथितपणे केलेले पेमेंट आणि पैसे मिळवण्याची पद्धत समजून घेण्याचा प्रयत्न करेल. त्यामुळे या कलाकारांना या प्रकरणात आरोपी बनवले जाणार नाही, असे मानले जात आहे. या कलाकारांनी महादेव अॅपचे प्रमोशन केल्याचे समजते. तसेच काहींनी अॅपच्या प्रवर्तकांपैकी एकाच्या परदेशी लग्नात पाहुण्यांचे मनोरंजन केले होते.

महादेव अॅपचे मालक सौरभ चंद्राकर आणि रवी उप्पल आहेत. टेनिस, बॅडमिंटन, क्रिकेट आणि पोकर आणि कार्ड गेमसह विविध लाइव्ह गेम्समध्ये कथित बेकायदेशीर सट्टेबाजीसाठी ऑनलाइन प्लॅटफॉर्म प्रदान करणे हे या अॅपचे उद्दिष्ट आहे. ही कंपनी गेल्या 4 वर्षांपासून सुरू आहे. त्याचे प्रवर्तक भिलाई, छत्तीसगड येथील आहेत आणि ते महादेव अॅपचे मुख्य सिंडिकेट आहेत.

तपास एजन्सीच्या म्हणण्यानुसार, हे अॅप कंपनीचे प्रवर्तक सौरभ चंद्राकर आणि रवी उप्पल दुबईहून चालवत होते. नवीन वापरकर्त्यांची नोंदणी करण्यासाठी या लोकांनी ऑनलाइन बुक बेटिंग अॅप्लिकेशन्सचा वापर केल्याचा आरोप आहे. ते त्यांचा आयडी बनवायचे आणि बेनामी बँक खात्यांच्या नेटवर्कद्वारे पैसे लाँडर करण्यासाठी वापरायचे. या कथित घोटाळ्यातून कंपनीला सुमारे 5000 कोटी रुपयांचा नफा झाला. (हेही वाचा: Vivek Oberoi News: विवेक ओबेरॉय याला 1.55 कोटी रुपयांना गंडा, एकास अटक)

दरम्यान, ईडीच्या तपासात आतापर्यंत दुबईत झालेल्या लग्नात सहभागी 17 बॉलिवूड स्टार्सची नावे समोर आली आहेत. यामध्ये नेहा कक्कर, कपिल शर्मा, नुसरत भरुचा, एली अवराम, सनी लिओन, कृष्णा अभिषेक आणि भारती सिंग यांसारख्या स्टार्सच्या नावांचा समावेश होता. या स्टार्सशिवाय 100 हून अधिक सामाजिक प्रभावशाली व्यक्तींचीही नावे समोर आली आहेत, जे ईडीच्या रडारवर आहेत.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)