Indian Web Browser: गुगल क्रोमशी स्पर्धा करण्यासाठी भारत सरकार लॉन्च करणार 'स्वदेशी’ वेब ब्राउझर, जाणून घ्या सविस्तर

भारत सरकार स्वदेशी विकसित वेब ब्राउझर (Web Browser) सादर करण्याच्या प्रक्रियेत आहे. गुगल क्रोम (Google Chrome), मोझीला फायरफॉक्स (Mozilla Firefox), मायक्रोसॉफ्ट एज (Microsoft Edge), ओपेराशी (Opera) स्पर्धा करण्यासाठी, लवकरच आत्मनिर्भरत वेब ब्राउझर आणला जाईल. वेब ब्राउझर डेव्हलपमेंटसाठी एकूण 3 कोटी रुपयांपेक्षा जास्त आर्थिक अनुदान दिले गेले आहे. इलेक्ट्रॉनिक्स आणि माहिती तंत्रज्ञान मंत्रालय आणि त्याच्या घटक विभागांद्वारे याचे निरीक्षण केले जाईल. मंत्रालयाने आज नवी दिल्लीत भारतीय वेब ब्राउझर डेव्हलपमेंट चॅलेंज सुरू केले.

इलेक्ट्रॉनिक्स आणि माहिती तंत्रज्ञान मंत्रालय भारतीय स्वदेशी वेब ब्राउझरचे डिझाइन आणि विकासाला प्रोत्साहन देण्यासाठी एका खुल्या आव्हान स्पर्धेचे प्रायोजकत्व करत आहे. जे विकसक स्वदेशी ब्राउझर तयार करतील त्यांना सरकारने 3.4 कोटी रुपयांचे रोख बक्षीस जाहीर केले आहे.

एका अधिकाऱ्याने सांगितले की, ‘ज्या देशाने जगातील तिस-या क्रमांकाची अर्थव्यवस्था बनण्याच्या मार्गावर पाऊल ठेवले आहे, तिथे आमच्या डिजिटल भाग्यावर आमचे नियंत्रण असणे महत्त्वाचे आहे. नागरिकांची सुरक्षितता महत्वाची असलेल्या युगात आम्ही परदेशी वेब ब्राउझरवर अवलंबून राहू इच्छित नाही. वेब ब्राउझरमध्येही आत्मनिर्भरता असायला हवी.’(हेही वाचा: 'तंत्रज्ञानामुळे जाऊ शकतात आपल्या नोकऱ्या', चार पैकी तीन भारतीयांना भीती; सर्वेक्षणातून समोर आली धक्कादायक माहिती)

माहितीनुसार, 2024 च्या अखेरीस स्वदेशी वेब ब्राउझरचा विकास आणि लॉन्च पूर्ण होण्याची सरकारची अपेक्षा आहे. याने देशांतर्गत स्टार्टअप्स, शैक्षणिक संस्था आणि कॉर्पोरेट्सना कार्यक्रमात सहभागी होण्यासाठी आमंत्रित केले आहे. सरकार देशांतर्गत वेब ब्राउझरचा अवलंब करण्यास देखील मदत करेल. यामध्ये भारतीय भाषांच्या समर्थनासारखी स्वदेशी फीचर्स समाविष्ट असतील.

दरम्यान, सुमारे 850 दशलक्ष वापरकर्ते असलेल्या भारताच्या विशाल इंटरनेट मार्केटमध्ये, जुलैच्या Similarweb डेटानुसार, 88.47 टक्के मार्केट शेअरसह गुगल क्रोमचा सर्वात जास्त वापर होत आहे. त्यानंतर सफारी 5.22 टक्के, त्यानंतर मायक्रोसॉफ्ट एज 2 टक्के, सॅमसंग इंटरनेट 1.5 टक्के, मोझीला फायरफॉक्स 1.28 टक्के आणि इतर 1.53 टक्के आहेत.