IND vs PAK: पाकिस्तान संघाला भारताचा 'ग्रीन सिग्नल', गृह मंत्रालयाची 2 मोठ्या स्पर्धांसाठी भारतात खेळण्यास परवानगी!

दिल्ली: पाकिस्तानच्या क्रीडाप्रेमींसाठी एक मोठी आणि आनंदाची बातमी समोर आली आहे. पाकिस्तानच्या हॉकी संघाला भारतात खेळण्याची अधिकृत परवानगी मिळाली आहे. यामुळे पाकिस्तानचा संघ ज्युनियर हॉकी वर्ल्ड कप आणि आशिया कप या दोन मोठ्या स्पर्धांमध्ये भाग घेण्यासाठी भारतात येणार आहे. गृह मंत्रालय आणि परराष्ट्र मंत्रालयाने पाकिस्तान संघाच्या भारत दौऱ्याला हिरवा कंदील दिला आहे. जम्मू-काश्मीरमधील पहलगाम येथे भारतीय पर्यटकांवर झालेल्या हल्ल्यानंतर दोन्ही देशांनी क्रीडा क्षेत्रातही एकमेकांपासून दुरावा ठेवला होता, पण आता हा दुरावा कमी होताना दिसत आहे.

पाकिस्तानचा हॉकी संघ भारतात येणार

पाकिस्तानच्या हॉकी संघाला भारतात येण्यासाठी परवानगी मिळाल्याची माहिती क्रीडा मंत्रालयाच्या एका सूत्राने दिली आहे. 'आम्ही भारतातील कोणत्याही आंतरराष्ट्रीय स्पर्धेत कोणत्याही संघाच्या खेळण्याविरुद्ध नाही. तथापि, भारत-पाकिस्तानमधील द्विपक्षीय मालिकेचा (Bilateral Series) मुद्दा वेगळा आहे,' असे या सूत्राने स्पष्ट केले. आशिया कप स्पर्धा 27 ऑगस्टपासून बिहारच्या राजगीरमध्ये सुरू होणार असून, तिचा अंतिम सामना 7 सप्टेंबर रोजी खेळला जाईल.

क्रिकेटमध्येही भारत-पाकिस्तान आमना-सामना अपेक्षित?

सूत्रांनी दिलेल्या माहितीनुसार, 'ऑपरेशन सिंदूर'मुळे पाकिस्तानच्या आशिया कपमध्ये सहभागाबद्दल शंका होती, परंतु आता ती दूर झाली आहे. तसेच, नोव्हेंबर आणि डिसेंबरमध्ये होणाऱ्या ज्युनियर वर्ल्ड कपमध्येही पाकिस्तानच्या हॉकी संघाला खेळण्याची परवानगी दिली जाईल असे सांगण्यात आले आहे. हॉकी इंडियाच्या सचिवांनी यापूर्वीच स्पष्ट केले होते की, ते सरकारच्या आदेशांचेच पालन करतील. 'सरकारचा जो निर्णय असेल तोच आमचा निर्णय असेल,' असे त्यांनी म्हटले होते.

क्रिकेटच्या मैदानावरही भारत आणि पाकिस्तान येणार आमनेसामने?

या महत्त्वाच्या निर्णयानंतर, क्रिकेटच्या मैदानावरही भारत आणि पाकिस्तान यांच्यात सामना होण्याची शक्यता वर्तवली जात आहे. याच वर्षी आशिया कपचे आयोजन होणार असून, या स्पर्धेत हे दोन्ही संघ एकमेकांविरुद्ध खेळताना दिसू शकतात. यामुळे दोन्ही देशांतील क्रीडा चाहत्यांमध्ये उत्साहाचे वातावरण निर्माण झाले आहे.