IND W vs PAK W Head to Head: उद्या क्रिकेटच्या मैदानावर होणार मोठे 'युद्ध', IND vs PAK येणार आमनेसामने; जाणून घ्या आकडेवारीत कोणाचे आहे वर्चस्व
IND vs PAK: भारतीय संघ 19 जुलै रोजी शेजारील देश पाकिस्तान राष्ट्रीय महिला क्रिकेट संघाविरुद्ध पहिला सामना खेळणार आहे. दोन्ही संघांमधला हा सामना संध्याकाळी 7 वाजल्यापासून डंबुला येथे खेळवला जाईल.
India vs Pakistan: महिला टी-20 आशिया कप 2024 (Women’s Asia Cup T20 2024) श्रीलंकेच्या (Sri Lanka) भूमीवर होणार आहे. आशिया चषकासाठी भारतीय राष्ट्रीय महिला क्रिकेट संघाची घोषणा (Indian National Women Cricket Team) आधीच करण्यात आली होती. संघाची कमान हरमनप्रीत कौरच्या हाती आहे. उपकर्णधारपदाची जबाबदारी स्मृती मानधना यांच्याकडे सोपवण्यात आली आहे. भारतीय संघ 19 जुलै रोजी शेजारील देश पाकिस्तान राष्ट्रीय महिला क्रिकेट संघाविरुद्ध पहिला सामना खेळणार आहे. दोन्ही संघांमधला हा सामना संध्याकाळी 7 वाजल्यापासून डंबुला येथे खेळवला जाईल. बांगलादेशमध्ये ऑक्टोबरमध्ये महिला टी-20 विश्वचषक होणार आहे. त्यामुळे प्रत्येक संघासाठी आशिया कप महत्त्वाचा बनला आहे. अशा स्थितीत सामना रोमांचक होणार हे नक्की.
आशिया कपमध्ये एकूण आठ संघ दिसणार
टीम इंडिया आणि पाकिस्तानच्या महिला संघ आशिया कपमध्ये आपल्या मोहिमेला सुरुवात करणार आहेत. यावेळी आशिया कपमध्ये एकूण आठ संघ दिसणार आहेत. या संघांची 4-4 अशा दोन गटात विभागणी करण्यात आली आहे. टीम इंडिया आणि पाकिस्तानचे संघ अ गटात आहेत. या गटात टीम इंडिया आणि पाकिस्तान व्यतिरिक्त यूएई आणि नेपाळचे महिला संघ आहेत. तर ब गटात श्रीलंका, मलेशिया, थायलंड आणि बांगलादेशच्या महिला संघांचा समावेश आहे. ही स्पर्धा 2012 पासून टी-20 फॉरमॅटमध्ये खेळवली जात आहे. प्रत्येक गटातील दोन अव्वल संघ उपांत्य फेरीसाठी पात्र ठरतील. उपांत्य फेरीचे सामने 26 जुलैला, तर अंतिम सामना 28 जुलैला होणार आहे. सर्व सामने श्रीलंकेतील डंबुला येथे होणार आहेत.
हेड टू हेड रेकॉर्ड
आत्तापर्यंत भारतीय महिला संघ आणि पाकिस्तान महिला संघामध्ये एकूण 14 सामने खेळले गेले आहेत. या कालावधीत टीम इंडियाने 11 सामने जिंकले आहेत. आयसीसी टी-20 विश्वचषक 2016 च्या दिल्लीत झालेल्या सामन्यात टीम इंडियाला पाकिस्तानकडून 2 धावांच्या फरकाने पराभव स्वीकारावा लागला. टीम इंडियाला पाकिस्तानकडून पराभवाला सामोरे जावे लागलेल्या तीन सामन्यांपैकी हा एक सामना होता. दोन्ही देशांच्या महिला संघांमधील हा एकमेव सामना आहे जो आतापर्यंत एकमेकांच्या देशात खेळला गेला आहे. आशिया कपमध्येही टीम इंडियाने पाकिस्तानविरुद्ध सहापैकी पाच सामने जिंकले आहेत. मात्र, गेल्या आशिया चषकातही टीम इंडियाला पाकिस्तानविरुद्ध पराभव पत्करावा लागला होता.
आशिया कपमध्ये टीम इंडियाचे वेळापत्रक
महिला आशिया चषक 2024 मध्ये टीम इंडियाचा पहिला सामना उद्या म्हणजेच 19 जुलै रोजी पाकिस्तानविरुद्ध होणार आहे. त्यानंतर टीम इंडियाचा दुसरा सामना 21 जुलैला युएई विरुद्ध होणार आहे. यानंतर टीम इंडियाचा ग्रुप स्टेजमधील शेवटचा सामना 23 जुलै रोजी नेपाळशी होणार आहे. (हे देखील वाचा: Team India Squad for Sri Lanka Tour: ब्रेकिंग! श्रीलंका दौऱ्यासाठी टीम इंडियाची घोषणा, सूर्यकुमार यादव टी-20 कर्णधार तर रोहितकडे वनडेचे कर्णधारपद कायम)
दोन्ही संघाचे खेळाडू
टीम इंडिया : हरमनप्रीत कौर (कर्णधार), स्मृती मानधना (उपकर्णधार), अरुंधती रेड्डी, शोभना आशा, रिचा घोष, उमा छेत्री, जेमिमाह रॉड्रिग्स, दीप्ती शर्मा, राधा यादव, रेणुका सिंग, पूजा वस्त्राकर, शेफाली वर्मा, श्रेयंका पाटील, संजीवन सजना, दयालन हेमलता.
पाकिस्तान : निदा दार (कर्णधार), तस्मिया रुबाब, इरम जावेद, ओमैमा सोहेल, गुल फिरोजा, डायना बेग, तुबा हसन, नशरा संधू, नाझिहा अल्वी, फातिमा सना, मुनिबा अली, आलिया रियाझ, सादिया इक्बाल, सिद्रा अमीन, सय्यदा अरुब शाह .
(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)