ICC Men's T20 World Cup 2026 Google Doodle: आयसीसी पुरुष टी२० विश्वचषक 2026 चा थरार सुरू; गुगल डूडलद्वारे क्रिकेट उत्सवाचे खास सेलिब्रेशन
आयसीसी पुरुष टी-२० विश्वचषक २०२६ च्या सुरुवातीनिमित्त गुगलने एक खास अॅनिमेटेड डूडल साकारले असून, भारत आणि श्रीलंकेत आयोजित या स्पर्धेचा उत्साह जगभरात पोहोचवला आहे.
मुंबई: जगातील सर्वात लोकप्रिय क्रिकेट स्पर्धांपैकी एक असलेल्या 'आयसीसी पुरुष टी-२० विश्वचषक २०२६' ला आज, ७ फेब्रुवारीपासून भारत आणि श्रीलंकेत दिमाखात सुरुवात झाली आहे. या मोठ्या क्रीडा सोहळ्याचे औचित्य साधत सर्च इंजिन दिग्गज गुगलने (Google) एक आकर्षक अॅनिमेटेड डूडल (Doodle) साकारले आहे. या डूडलच्या माध्यमातून गुगलने क्रिकेट चाहत्यांना या १० व्या टी-२० विश्वचषकाच्या शुभेच्छा दिल्या आहेत.
डूडलचे खास आकर्षण
गुगलने आज आपल्या होमपेजवर एक विशेष गुलाबी रंगाचे अॅनिमेटेड डूडल प्रदर्शित केले आहे. यामध्ये 'Google' या शब्दातील 'L' अक्षराच्या जागी हिरव्या रंगाची बॅट आणि 'O' च्या जागी क्रिकेट बॉल दाखवण्यात आला आहे. विशेष म्हणजे, डूडलमधील 'E' अक्षर श्रीलंकेच्या पारंपारिक चाहत्यांप्रमाणे ढोल (Drum) वाजवताना दिसत आहे, जे यजमान देश श्रीलंकेच्या संस्कृतीचे दर्शन घडवते. या डूडलवर क्लिक केल्यास युजर्सना स्पर्धेचे संपूर्ण वेळापत्रक आणि गुणतालिका पाहता येत आहे.
स्पर्धेचे स्वरूप आणि यजमानपद
२०२६ चा हा विश्वचषक भारत आणि श्रीलंका संयुक्तपणे आयोजित करत आहेत. यामध्ये एकूण २० संघ सहभागी झाले असून त्यांच्यात ५५ सामने खेळवले जाणार आहेत. ८ मार्च रोजी अहमदाबादच्या नरेंद्र मोदी स्टेडियमवर या स्पर्धेचा अंतिम सामना रंगणार आहे. भारतासाठी ही स्पर्धा अत्यंत महत्त्वाची आहे, कारण टीम इंडिया गतविजेते म्हणून मैदानात उतरत आहे.
पहिल्या दिवशीचे सामने
स्पर्धेच्या पहिल्याच दिवशी तीन महत्त्वाचे सामने नियोजित आहेत.
पहिला सामना: पाकिस्तान विरुद्ध नेदरलँड्स (कोलंबो)
दुसरा सामना: वेस्ट इंडिज विरुद्ध स्कॉटलंड
तिसरा सामना: भारत विरुद्ध अमेरिका (मुंबई)
मुंबईतील वानखेडे स्टेडियमवर आज सायंकाळी भव्य उद्घाटन सोहळा पार पडणार असून त्यानंतर भारतीय संघ आपल्या मोहिमेची सुरुवात करेल.
आयसीसी आणि गुगलची भागीदारी
यावेळचा विश्वचषक केवळ मैदानावरील खेळापुरता मर्यादित नसून तो तंत्रज्ञानानेही सज्ज आहे. आयसीसीने गुगलसोबत विशेष भागीदारी केली असून 'गुगल जेमिनी' (Google Gemini) हे या स्पर्धेचे अधिकृत 'एआय फॅन कम्पॅनियन' (AI Fan Companion) आहे. या माध्यमातून चाहत्यांना क्रिकेटचे नियम समजून घेणे, क्विझ खेळणे आणि खेळाडूंची माहिती मिळवणे अधिक सोपे होणार आहे.