Rajasthan Cricketer Died: राजस्थानचा माजी क्रिकेटपटू रोहित शर्माचे वयाच्या 40 व्या वर्षी निधन, यकृताच्या आजाराने होते त्रस्त

राजस्थानचा माजी क्रिकेटपटू रोहित शर्माचे वयाच्या 40 व्या वर्षी निधन झाले. डावाची सलामी देणाऱ्या या उजव्या हाताच्या फलंदाजावर यकृताच्या समस्येमुळे जयपूर येथील रुग्णालयात उपचार सुरू होते. दुर्दैवाने उपचाराचा काही उपयोग झाला नाही. 2 मार्च (शनिवार) रोजी त्यांचे निधन झाले. शर्मा हे आक्रमक फलंदाज म्हणून ओळखले जात होते. त्याने 2004 मध्ये सर्व्हिसेसविरुद्ध प्रथम श्रेणी क्रिकेटमध्ये पदार्पण केले होते. (हेही वाचा - WPL 2024 Cameraman Dies: स्पोर्ट्स कॅमेरामॅन कमलनाधिमुथु थिरुवल्लुवम यांचे अचानक निधन)

पाहा पोस्ट -

आपल्या पहिल्या सामन्यात त्याने दोन्ही डावात 12 आणि 26 धावा केल्या. सामना अनिर्णीत संपला. शर्माने पुढच्या वर्षी विदर्भाविरुद्ध लिस्ट ए मध्ये पदार्पण केले. 2007 मध्ये जयपूरविरुद्ध टी-20 क्रिकेटमध्ये पदार्पण केले. त्याने सात प्रथम श्रेणी सामन्यांमध्ये राजस्थानचे प्रतिनिधित्व केले, जिथे त्याने 166 धावा केल्या, ज्यात त्याची सर्वोच्च धावसंख्या 36 होती. लिस्ट ए क्रिकेटमध्ये शर्माने 28 सामन्यांत दोन शतके आणि तीन अर्धशतकांसह 850 धावा केल्या. त्याने चार T20 मध्ये 131 धावा केल्या आणि त्याचा सर्वोच्च धावसंख्या 81 धावा होता. केवळ बॅट हातातच नाही तर शर्मा चेंडूनेही चांगला होता. चार टी-20 सामन्यांत त्याने लेग स्पिन गोलंदाजीने सहा विकेट घेतल्या.

शर्माने शेवटचा सामना 2014 मध्ये खेळून त्याच्या 10 वर्षांच्या कारकिर्दीचा शेवट केला. त्यानंतर प्रशिक्षण सुरू केले. आरएस क्रिकेट अकादमी उघडली जिथे त्याने खेळातील तरुण प्रतिभांचे मार्गदर्शन केले. त्यांच्या निधनाच्या बातमीने राजस्थान क्रिकेट विश्वातील अनेकांना धक्का बसला आहे.