Border Gavaskar Trophy 2024: ऑस्ट्रेलियाविरुद्ध विराट-रोहितपेक्षा 'या' खेळाडूचे आकडे आहे खास, तरीही टीम इंडियात नाही स्थान

मुंबई: न्यूझीलंडविरुद्धच्या कसोटी मालिकेत 3-0 अशा पराभवानंतर भारतीय संघ आता बॉर्डर गावस्कर ट्रॉफीसाठी ऑस्ट्रेलियाच्या दौऱ्यावर जाणार आहे. वर्ल्ड टेस्ट चॅम्पियनशिप फायनलच्या शर्यतीत टिकून राहण्यासाठी टीम इंडियाला ऑस्ट्रेलियातील टेस्ट सीरिज कोणत्याही किंमतीत जिंकावीच लागेल. बॉर्डर गावस्कर ट्रॉफीसाठी टीम इंडियाचा संघही जाहीर करण्यात आला आहे. टीम इंडियाचा संघ पाहून अनेक चाहत्यांना आश्चर्य वाटले कारण ऑस्ट्रेलियाविरुद्ध विराट कोहली (Virat Kohli) आणि कर्णधार रोहित शर्मा (Rohit Sharma) यांच्यापेक्षा चांगली आकडेवारी असलेल्या खेळाडूची संघात निवड झाली नाही. या उत्कृष्ट खेळाडूकडे सातत्याने दुर्लक्ष होत आहे. देशांतर्गत क्रिकेटमध्ये शानदार फलंदाजी करूनही या खेळाडूला टीम इंडियामध्ये संधी मिळत नाहीये.

पूजाराची आकडेवारी विराटपेक्षा सरस

22 नोव्हेंबरपासून भारत आणि ऑस्ट्रेलिया यांच्यात बॉर्डर गावस्कर ट्रॉफी सुरू होत आहे. या बॉर्डर गावस्कर ट्रॉफीसाठी स्टार फलंदाज चेतेश्वर पुजारा टीम इंडियाचा भाग नाही. पुजाराने नुकतेच रणजी ट्रॉफीमध्ये द्विशतक झळकावले होते, त्यानंतर चाहत्यांना आशा होती की या खेळाडूची ऑस्ट्रेलिया दौऱ्यासाठी संघात निवड होईल पण तसे होऊ शकले नाही. (हे देखील वाचा: IND vs AUS Test Record: ऑस्ट्रेलियात भारताची कशी आहे कामगिरी? आतापर्यंत भारताने किती जिंकले सामने? जाणून घ्या कसोटी इतिहास)

ऑस्ट्रेलियाविरुद्ध पुजाराच्या आकडेवारीबद्दल बोलायचे झाले तर तो विराट कोहलीपेक्षाही सरस आहे. पुजाराने आतापर्यंत ऑस्ट्रेलियाविरुद्ध 25 कसोटी सामने खेळले असून त्यात त्याच्या नावावर 2074 धावा आहेत. या कालावधीत पुजाराने 5 शतके आणि 11 अर्धशतके झळकावली आहेत.

विराट-रोहितची कशी आहे आकडेवारी

याशिवाय विराट कोहलीचे बोलायचे झाले तर कोहलीने आत्तापर्यंत ऑस्ट्रेलियाविरुद्ध 25 कसोटी सामन्यांच्या 44 डावात 2042 धावा केल्या आहेत. मात्र, या बाबतीत कोहली पुजाराच्या मागे नाही. मात्र कर्णधार रोहित शर्मा या बाबतीत पुजाराच्या खूप मागे आहे. रोहितने आतापर्यंत ऑस्ट्रेलियाविरुद्ध 12 कसोटी सामने खेळले आहेत, ज्यामध्ये त्याने आपल्या बॅटने केवळ 708 धावा केल्या आहेत.

चाहत्यांकडून पुजाराचा संघात समावेश करण्याची मागणी 

न्यूझीलंडविरुद्ध टीम इंडियाची खराब अवस्था पाहून चाहत्यांनी पुजाराचा टीम इंडियात समावेश करण्याची मागणी केली होती. टीम इंडियाचे फलंदाज किवी संघाविरुद्ध धावा काढण्यासाठी तळमळत दिसले. काही फलंदाज जास्त वेळ क्रीजवर टिकू शकले नाहीत.