Women's Asia Cup 2022: भारत-पाकिस्तान उपांत्य फेरीत दाखल, जाणून घ्या सामना कधी होणार

क्रिकेट जगतात हा ऑक्टोबर महिना भारत-पाकिस्तान (IND vs PAK) सामन्याने व्यापून टाकला आहे. यापूर्वी 7 ऑक्टोबर रोजी महिला आशिया चषक स्पर्धेत (Asia Cup 222) दोन्ही संघ आमनेसामने आले होते. पुरुषांच्या T20 विश्वचषकात 23 ऑक्टोबर रोजी भारत आणि पाकिस्तान यांच्यात मेलबर्नमध्ये सामना होणार आहे, मात्र त्याआधी येत्या 6 दिवसांत पुन्हा एकदा दोन्ही संघ आमनेसामने येऊ शकतात. खरं तर, भारत आणि पाकिस्तानचा संघ महिला आशिया कप 2022 च्या उपांत्य फेरीत पोहोचला आहे. भारत आणि पाकिस्तान या दोन्ही संघांनी या स्पर्धेत आतापर्यंत 5 सामने खेळले आहेत, त्यापैकी दोघांनी 4-4 सामने जिंकले आहेत. 8-8 गुणांसह दोन्ही संघांनी महिला आशिया कपच्या उपांत्य फेरीत प्रवेश केला आहे. भारतीय संघ गुणतालिकेत अव्वल स्थानावर आहे. भारताचा नेट रन रेट पाकिस्तानपेक्षा खूपच चांगला आहे.

चाहत्यांना थोडी वाट पहावी लागेल

उपांत्य फेरीतही भारत-पाकिस्तान आमनेसामने येण्याची आशा वाढली आहे. मात्र, यासाठी चाहत्यांना अजून थोडी प्रतीक्षा करावी लागणार आहे, कारण श्रीलंकेचा संघ 6 गुणांसह तिसऱ्या स्थानावर आहे आणि थायलंडचा संघ तितक्याच गुणांसह चौथ्या स्थानावर आहे. भारत आणि पाकिस्तान उपांत्य फेरीत खेळणार की नाही हे दोन्ही संघांच्या शेवटच्या सामन्यानंतरच ठरवले जाईल.

13 ऑक्टोबर रोजी उपांत्य सामना

भारताने मागील सामन्यात बांगलादेशचा 59 धावांनी पराभव केला, तर पाकिस्तानने रविवारी यूएईवर 71 धावांनी विजय मिळवत उपांत्य फेरीत स्थान निश्चित केले. आता भारतीय संघ थायलंडविरुद्ध तर पाकिस्तानचा संघ श्रीलंकेविरुद्ध खेळणार आहे. यानंतर 13 ऑक्टोबर रोजी महिला आशिया चषक स्पर्धेच्या दोन्ही उपांत्य फेरीचे सामने होणार आहेत. 15 ऑक्टोबरला विजेतेपदाचा सामना खेळवला जाणार आहे. (हे देखील वाचा: T20 World Cup 2022: शार्दुलला टी-20 विश्वचषक संघात निवड न झाल्याचा पश्चाताप, म्हणाला- माझ्यात अजूनही भरपूर क्रिकेट शिल्लक आहे)

पाकिस्तानने भारताचा केला होता पराभव 

भारत आणि पाकिस्तान या स्पर्धेत आतापर्यंत एकदाच आमनेसामने आले आहेत, ज्यामध्ये पाकिस्तानने 13 धावांनी विजय मिळवला आहे. प्रथम फलंदाजी करताना पाकिस्तानने भारताला 138 धावांचे लक्ष्य दिले होते, प्रत्युत्तरात भारतीय संघ 19.4 षटकात 124 धावांवर गारद झाला.