Indian Budget 2023-24: तालिबानने केले भारताच्या 2023-24 च्या अर्थसंकल्पाचे स्वागत; म्हटले- 'राष्ट्रांमधील संबंध सुधारण्यास होईल मदत'

तालिबानने गुरुवारी भारताच्या केंद्रीय अर्थसंकल्प 2023-2024 चे स्वागत केले. तालिबानने सांगितले की भारताने अफगाणिस्तानला मदत जाहीर केल्याने दोन्ही देशांमधील संबंध आणि विश्वास सुधारण्यास मदत होईल. खामा प्रेसने याबाबत वृत्त दिले आहे. अर्थमंत्री निर्मला सीतारामन यांनी केंद्रीय अर्थसंकल्पात अफगाणिस्तानसाठी $25 दशलक्ष विकास मदत पॅकेजचा प्रस्ताव दिल्यानंतर ही तालिबानची टिप्पणी समोर आली आहे. सीतारामन यांनी बुधवारी सकाळी 11 वाजता अर्थसंकल्पीय भाषणाला सुरुवात केली होती. हा मोदी सरकारच्या दुसऱ्या कार्यकाळातील शेवटचा पूर्ण अर्थसंकल्प आहे. मागील दोन केंद्रीय अर्थसंकल्पांप्रमाणेच 2023-24 चा अर्थसंकल्पही कागदविरहित पद्धतीने सादर करण्यात आला.

भारताने अफगाणिस्तानला 200 कोटी रुपयांची विकास मदत देण्याचे वचन दिले आहे. तालिबानने अफगाणिस्तानवर ताबा मिळवल्यानंतर भारताच्या पाठिंब्याचे हे दुसरे वर्ष आहे. भारताच्या अर्थसंकल्पाचे स्वागत करताना तालिबानच्या वाटाघाटी करणार्‍या टीमचे माजी सदस्य सुहेल शाहीन म्हणाले, ‘अफगाणिस्तानच्या विकासासाठी भारताच्या पाठिंब्याचे आम्ही कौतुक करतो.’ ऑगस्ट 2021 मध्ये तालिबानने काबूलमध्ये सत्ता काबीज केली तेव्हा अफगाणिस्तान आणि भारत यांच्यातील संबंध ताणले गेले आणि भारताकडून समर्थित इथले बहुतेक उपक्रम थांबले होते.

('सोशली' (SocialLY) हे आपल्यासाठी ट्विटर, इन्स्टाग्राम आणि यूट्यूब अशा सोशल मीडिया जगातील ताज्या ब्रेकिंग न्यूज, व्हायरल ट्रेंड व माहिती घेऊन येते. वृत्तात एम्बेड केलेली पोस्ट यूजर्सच्या सोशल मीडिया अकाऊंटमधून थेट एम्बेड करण्यात आली आहे. लेटेस्टलीच्या कर्मचाऱ्याने अथवा लेखकाने त्याचे संपादन किंवा त्यात सुधारणा केलेली नाही. सदर पोस्टमधील वस्तुस्थिती, प्रतिक्रियामधून लेटेस्टलीची मते प्रतिबिंबित होत नाहीत. तसेच या मजकूराची जबाबदारी अथवा उत्तरदायीत्व लेटेस्टली स्वीकारत नाही.)