Writer Prajakt Deshmukh Accident: प्रख्यात मराठी लेखक प्राजक्त देशमुख यांचा अपघात; थोडक्यात बचावला जीव (Watch)

'देवबाभळी'सह अनेक नाटकांचे संवाद लिहिणारे प्रख्यात मराठी लेखक, नाटककार आणि दिग्दर्शक प्राजक्त देशमुख (Prajakt Deshmukh) यांचा शुक्रवारी मुंबई-नाशिक महामार्गावर अपघात झाला. ही घटना भिवंडी फाट्याजवळ घडली. ट्विटरवरील एका पोस्टमध्ये देशमुख म्हणाले की, हायवेच्या चुकीच्या बाजूने जात असलेल्या ट्रकची सिमेंट डिव्हायडर ब्लॉकला धडक बसल्यानंतर या ट्रकची कारला धडक बसली. या अपघातामध्ये देशमुख थोडक्यात बचावले. याबाबत प्राजक्त देशमुख यांनी सोशल मिडियावर माहिती दिली आहे.

आपल्या ट्वीटमध्ये देशमुख म्हणतात- 'नाशिक मुंबई हायवे वरुन धावणा-या अवजड वाहने बेशिस्तीने चालतात.भिवंडी फाट्या अलिकडे एका ट्रकने सिमेटचा डिवायडर ब्लॅाक उडवला आणि तो माझ्या गाडीवर आदळला. थोडक्यात बचावलो.मी सुखरुप आहे.परंतू या हायवेला कुणी वाली आहे का? की केवळ स्पिडगन लाऊन दंडाच्या पावत्या ठोकणे इतकंच यांचं काम?'

'ट्रकने ब्लॅाक उडवला म्हणजेच तो उजवीकडून चालत होता.अवजड वाहन हायवेला डावीकडून चालणं अपेक्षित असतांना अत्यंत बेजबाबदारपणे हे घडलं. शिवाय ट्रकवाला न थांबता पळून गेला. नशीब बलवत्तर म्हणून वाचलो. नाशिक मुंबई हायवेवर जीव मुठीत धरुन गाड्या चालवा. जपा.'