Railway Divyang Card: फोटो ओळखपत्र जारी करण्याच्या प्रक्रियेचे डिजिटलायझेशन; दिव्यांगजनांना आता वेबसाइटवरून प्राप्त करू शकतात ओळखपत्र

मध्य रेल्वेने दिव्यांगजनांना फोटो ओळखपत्र देण्याची प्रक्रिया डिजिटल करण्यासाठी ‘दिव्यांगजन मॉड्यूल’ सुरू केले आहे. पूर्वी दिव्यांगजनांना फोटो ओळखपत्र देणे ही मॅन्युअल प्रक्रिया होती, परंतु आता दिव्यांगजन मॉड्यूलसह, अर्ज करण्यापासून ते फोटो ओळखपत्र जारी करण्यापर्यंतची संपूर्ण प्रक्रिया डिजिटल झाली आहे.

मध्य रेल्वे मुंबईच्या जनसंपर्क विभागाने जारी केलेल्या प्रसिद्धीपत्रकानुसार, दिव्यांगजनांना फोटो ओळखपत्रासाठी अर्ज करण्यासाठी मुख्यालयात येण्याची गरज नाही. ते आता http://divyangjanid.indianrail.gov.in वर नोंदणी करू शकतात. नोंदणीनंतर, आवश्यक कागदपत्रे जसे की सवलत प्रमाणपत्र, फॉर्म, छायाचित्र, अपंगत्व प्रमाणपत्र, जन्मतारीख पुरावा, पत्ता आणि फोटो आयडी अपलोड करणे आवश्यक आहे. एकदा आवश्यक कागदपत्रे अपलोड केल्यानंतर, आवश्यक प्रक्रियेचे पालन केले जाईल आणि यशस्वी पडताळणी आणि मंजुरीनंतर फोटो ओळखपत्र डिजिटल स्वरूपात जारी केले जाईल. दिव्यांगजन वेबसाइटवरून फोटो ओळखपत्र डाउनलोड आणि प्रिंट करू शकतात.