Axis Bank Layoffs 3,000 Employees: तंत्रज्ञानामुळे उत्पादकतेत वाढ; ॲक्सिस बँकेच्या कर्मचारी संख्येत 3,000 ने घट

खाजगी क्षेत्रातील तिसरी मोठी बँक असलेल्या ॲक्सिस बँकेने शनिवारी आपल्या आर्थिक वर्ष २०२५-२६ च्या निकालांची घोषणा केली. या अहवालानुसार, बँकेच्या एकूण कर्मचारी संख्येत गेल्या वर्षभरात सुमारे ३,१०० ने घट झाली आहे. विशेष म्हणजे, बँकेने याच काळात ४०० नवीन भौतिक शाखांचे जाळे विस्तारले असूनही ही कर्मचारी कपात तंत्रज्ञानामुळे आलेल्या उत्पादकतेचा परिणाम असल्याचे बँकेने म्हटले आहे.

तंत्रज्ञान आणि उत्पादकता वाढीचे धोरण

बँकेचे व्यवस्थापकीय संचालक आणि मुख्य कार्यकारी अधिकारी अमिताभ चौधरी यांनी सांगितले की, कर्मचारी संख्येतील ही कपात कोणत्याही विशिष्ट व्यावसायिक विभागाला लक्ष्य करून केलेली नाही. गेल्या ३-४ वर्षांपासून बँक आपल्या एकूण खर्चाच्या ९ ते १० टक्के हिस्सा तंत्रज्ञानावर खर्च करत आहे. या सातत्यपूर्ण गुंतवणुकीमुळे आता कार्यक्षमता वाढली असून, कमी कर्मचाऱ्यांमध्ये अधिक काम करणे शक्य झाले आहे.