Dress Code For Devotees At Jagannath Temple: जगन्नाथ पुरी मंदिरामध्ये 1 जानेवारीपासून ड्रेस कोड लागू होणार; मंदिरात भाविकांना स्कर्ट, स्लीव्हलेस, हाफ पँट घालण्यास बंदी

Dress Code For Devotees At Jagannath Temple: ओडिशाच्या पुरी येथील जगन्नाथ मंदिरात येणाऱ्या भाविकांना आता ड्रेस कोड पाळावा लागणार आहे. मंदिर व्यवस्थापनाने सोमवारी सांगितले की, पुढील वर्षी 1 जानेवारीपासून ड्रेस कोड लागू केला जाणार आहे. आजपासूनच भाविकांना ड्रेस कोडबद्दल जागरूक केले जाईल. वृत्तसंस्था पीटीआयने दिलेल्या माहितीनुसार, ड्रेस कोड लागू झाल्यानंतर लोकांना हाफ पँट, फाटलेल्या जीन्स, स्कर्ट आणि स्लीव्हलेस कपडे घालून जगन्नाथ मंदिरात जाता येणार नाही. मंदिराच्या धोरण उपसमितीच्या बैठकीत हा निर्णय घेण्यात आला आहे. मात्र, मंदिरात कोणते कपडे घालण्यास परवानगी द्यायची याचा निर्णय अद्याप झालेला नाही. जगन्नाथ मंदिर व्यवस्थापनाचे प्रमुख रंजन कुमार दास यांनी सांगितले की, काही लोक अशोभनीय कपडे घालून मंदिरात येतात. काही लोक हाफ पँट आणि स्लीव्हलेस कपडे घालून येतात, जणू ते समुद्रकिनारी किंवा उद्यानात फिरायला आले आहेत. देव मंदिरात राहतो. हे मनोरंजनाचे ठिकाण नाही. यामुळे इतर लोकांच्या धार्मिक भावना दुखावल्या जातात.