Mumbai’s First Elevated Nature Trail: मुंबईच्या काँक्रीटच्या जंगलात हिरवे नंदनवन; मलबार हिल इथे सुरु झाला शहरातील पहिला 'एलिव्हेटेड नेचर ट्रेल', जाणून घ्या दर, वेळ व कुठे कराल बुकिंग

मुंबईकरांसाठी (Mumbai)एक आनंदाची बाब आहे. मुंबईतील पहिला एलिव्हेटेड नेचर ट्रेल (Elevated Nature Trail) वॉकवे रविवारी शहरातील लोकांसाठी खुला करण्यात आला. हा पदपथ दक्षिण मुंबईतील कमला नेहरू पार्कपासून सुरू होतो आणि मलबार हिलच्या जंगलातून गिरगाव चौपाटीपर्यंत जातो. पदपथाचा शेवटचा भाग पर्यटकांना अरबी समुद्राच्या दृश्याचा आनंद घेण्याची संधी देईल. 485 मीटर लांबीच्या या उंच रस्त्यावर समुद्राच्या दृश्यांसाठी एक डेक देखील आहे. यासाठी सर्वसामान्यांसाठी तिकिटाची किंमत 25 रुपये असेल, तर परदेशी पर्यटकांसाठी 100  रुपये निश्चित करण्यात आली आहे. हा प्रकल्प बृहन्मुंबई महानगरपालिका (BMC) द्वारे बांधण्यात आला आहे. सिंगापूरमध्ये विकसित केलेल्या ट्री टॉप वॉक प्रमाणेच मुंबईत विकसित केलेला हा पहिलाच प्रकल्प आहे.

रविवारी सकाळी 9 वाजता मलबार हिल येथील शहरातील पहिल्या एलिव्हेटेड नेचर वॉकचे उद्घाटन स्थानिक आमदार आणि मंत्री मंगल प्रभात लोढा यांच्या हस्ते झाले. या पदपथाच्या बांधकामामुळे मुंबईकर आणि पर्यटकांना एक नवीन आणि अद्भुत अनुभव मिळेल. पर्यटकांच्या सुरक्षेकडे विशेष लक्ष देण्यात आले आहे आणि पदपथावर लक्ष ठेवण्यासाठी प्रवेश नियंत्रण प्रणाली विकसित करण्यात आली आहे. यामुळे पर्यटकांची संख्या नियंत्रित होण्यास मदत होईल. याशिवाय, आपत्कालीन मार्गांचीही व्यवस्था करण्यात आली आहे. जेणेकरून कोणत्याही प्रकारच्या आपत्कालीन परिस्थितीत त्वरित मदत मिळू शकेल.

Mumbai’s First Elevated Nature Trail:

सुमारे 26 कोटी रुपये खर्चून हा प्रकल्प 2021 मध्ये सुरू झाला होता. मलाबार हिल हे शांत क्षेत्र असल्याने बांधकामाचे तास मर्यादित होते आणि जंगलातील पर्यावरणाचे संरक्षण करणे हे मोठे आव्हान होते. या ठिकाणी यात मजबूत रेलिंग्ज, स्टीलने बळकट केलेली पायाभरणी आणि संध्याकाळच्या वेळेसाठी प्रकाश व्यवस्थेची योजना आहे. या मार्गावर 100 हून अधिक वनस्पतींच्या प्रजात्या आहेत. या ट्रेलवर एकावेळी फक्त 200 लोकांना प्रवेश मिळेल, जेणेकरून गर्दी टाळता येईल. यासाठी ऑनलाइन तिकीट व्यवस्था आहे. हा ट्रेल मुंबईच्या काँक्रीटच्या जंगलात एक हिरवा नंदनवन म्हणून पाहिला जात आहे. (हेही वाचा: Mumbai Weather Update: मुंबईकरांना लवकरच मिळणार उष्णता व आर्द्रतेपासून दिलासा; हवामान खात्याकडून येत्या आठवड्यासाठी पावसाचा अंदाज)

हा प्रकल्प फक्त पर्यटकांसाठीच नाही, तर मुंबईकरांना शहराच्या गजबजाटापासून दूर निसर्गाच्या सान्निध्यात वेळ घालवण्याची संधी देणारा आहे. या मार्गाचे बांधकाम करताना जंगलात एकही झाडाला इजा होणार नाही याची काळजी घेण्यात आली. या मार्गावरून चालताना एकीकडे हिरवळ आणि दुसरीकडे समुद्राचे दृश्य मनाला सुखावते. बीएमसीने या ट्रेलला सकाळी 5 ते रात्री 9 या वेळेत खुलं ठेवण्याचा निर्णय घेतला आहे. तिकीट बुकिंगसाठी https://naturetrail.mcgm.gov.in/ ही वेबसाइट उपलब्ध आहे, जिथे बुकिंग केल्यावर बारकोड मिळतो आणि प्रवेश-निर्गमन सुलभ होते. मलाबार हिल हे मुंबईतील शेवटचे नैसर्गिक जंगल मानले जाते, त्याचे संवर्धन करणे हे या प्रकल्पाचे मुख्य उद्दिष्ट होते. बीएमसीने या प्रकल्पाला ‘मुंबईचे हिरवे नंदनवन’, असे संबोधले आहे, आणि ते खरेच आहे.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)