महाराष्ट्र एफडीएकडून आयआयटी मुंबईतील दोन कॅंटीन बंद, जाणून घ्या कारण काय

महाराष्ट्रात सध्या अन्नपदार्थांच्या स्वच्छतेबाबत सुरू असलेल्या मोहिमेअंतर्गत महाराष्ट्र अन्न व औषध प्रशासनाने (Maharashtra FDA) भारतीय तंत्रज्ञान संस्था, मुंबई (IIT Bombay) येथील दोन कॅंटीनची तपासणी केली. या तपासणीत स्वच्छता तसेच परवाना निकषांबाबत त्रुटी आढळल्यानंतर संबंधित कॅंटीनवर कारवाई करण्यात आली आहे. एफडीए आयुक्त तुकाराम मुंढे यांच्या नेतृत्वाखाली ही मोहीम राबवली जात आहे.

IIT Bombay मध्ये Maharashtra FDA कडून तपासणी 

एफडीएच्या पथकाने आयआयटी मुंबई परिसरातील काही खाद्यगृहांची नियमित पाहणी करत स्वच्छता, अन्न हाताळणी पद्धती आणि अन्न सुरक्षा नियमांचे पालन तपासले. या तपासणीनंतर संस्थेला सूचना आणि शिफारशी देण्यात आल्याचे आयआयटी मुंबई प्रशासनाकडून सांगण्यात आले. "आमच्या काही खाद्यगृहांची पाहणी करण्यात आली असून एफडीएने सूचना आणि शिफारशी दिल्या आहेत. सविस्तर अहवालाची आम्ही प्रतीक्षा करत आहोत," असे संस्थेच्या प्रवक्त्यांनी स्पष्ट केले आहे.

तपासणीचा सविस्तर अहवाल अद्याप जाहीर करण्यात आलेला नाही. अंतिम अहवाल प्राप्त झाल्यानंतर त्यातील निरीक्षणांचा आढावा घेऊन आवश्यक त्या सुधारणा केल्या जातील, असे आयआयटी मुंबईने स्पष्ट केले आहे. तसेच अन्न सुरक्षा मानकांचे पालन करण्याची आणि नियामक प्राधिकरणाने दिलेल्या सूचनांचे पालन करण्याची संस्थेने पुन्हा एकदा हमी दिली आहे.

उच्च न्यायालयाच्या टीकेनंतर व्यापक मोहीम 

काही दिवसांपूर्वी मुंबई उच्च न्यायालयाने एफडीएवर टीका करत, खासगी आणि लहान खाद्यगृहांवर 'निवडक' पद्धतीने कारवाई होत असल्याचे निरीक्षण नोंदवले होते. सरकारी आणि निमसरकारी आस्थापनांवरही अशीच कारवाई होते का, असा प्रश्न मुख्य न्यायमूर्ती रवींद्र घुगे आणि न्यायमूर्ती गौतम अंखड यांच्या खंडपीठाने उपस्थित केला होता. यानंतर न्यायालयाने सरकारी व निमसरकारी संस्था, मंत्रालय तसेच उच्च न्यायालयाच्या आवारातील कॅंटीनचीही तपासणी करण्याचे निर्देश एफडीएला दिले होते.

या निर्देशानंतर मुंढे यांनी प्रथम मुंबई उच्च न्यायालयाच्या आवारातील कॅंटीनची अचानक पाहणी केली, त्यात वैध एफएसएसएआय परवाना नसल्याने दोन कॅंटीन बंद करण्याचे आदेश देण्यात आले. त्याच धर्तीवर आयआयटी मुंबईतील कॅंटीनचीही तपासणी करण्यात आली.

तुकाराम मुंढे यांनी मे महिन्यात एफडीएची सूत्रे हाती घेतल्यापासून राज्यभरात भेसळयुक्त अन्नपदार्थ, दूध आणि अस्वच्छ हॉटेल-रेस्टॉरंटविरोधात व्यापक मोहीम सुरू केली आहे. या मोहिमेत अनेक नामांकित खाद्यगृहे आणि दुग्धशाळांवर कारवाई झाली असून काहींना नोटिसा बजावण्यात आल्या आहेत, तर काही आस्थापना सील करण्यात आल्या आहेत. शैक्षणिक संस्था तसेच सार्वजनिक आस्थापनांमधील अन्न सुरक्षा मानकांवरही अलीकडे एफडीएचे बारीक लक्ष असून, स्वच्छता आणि नियामक अनुपालन सुधारण्यासाठी नियमित तपासण्या सुरू आहेत.

(The above story first appeared on LatestLY on Aug 08, 2026 10:20 AM IST. For more news and updates on politics, world, sports, entertainment and lifestyle, log on to our website latestly.com).