ChatGPT, मर्डर फिल्म्स ते फेक इन्स्टाग्राम अकाउंट! केतन अग्रवाल हत्या प्रकरणात 5,053 पानी आरोपपत्र दाखल

लोहगड किल्ल्यावरील केतन अग्रवाल हत्या प्रकरणात पुणे ग्रामीण पोलिसांनी शनिवारी वडगाव मावळ येथील न्यायालयात 5,053 पानांचे आरोपपत्र दाखल केले. आरोपपत्रानुसार, केतनची मंगेतर सिया गोयल आणि तिच्या दोन सहआरोपींनी फेक इन्स्टाग्राम अकाउंट, ChatGPT आणि गुन्हेगारीवरील चित्रपटांचा वापर करून हा कट रचल्याचा पोलिसांचा दावा आहे. 26 वर्षीय व्यावसायिक केतन अग्रवाल यांना 18 जून रोजी लोहगड किल्ल्यावरून ढकलून देण्यात आल्याचा आरोप आहे.

आरोपपत्रात कोणाची नावे?

आरोपपत्रात सिया प्रवीण गोयल, तिचा कथित प्रियकर चेतन बाबुलाल चौधरी आणि रितेश संजय हांगे यांची नावे आहेत. तिघांनाही अटक करण्यात आली असून ते सध्या येरवडा मध्यवर्ती कारागृहात न्यायालयीन कोठडीत आहेत. सिया आणि केतन यांचा फेब्रुवारीत साखरपुडा झाला होता, तसेच नोव्हेंबरमध्ये जयपूर येथे लग्न होणार होते.

पुणे ग्रामीणचे पोलीस अधीक्षक संदीपसिंह गिल यांनी आरोपपत्र दाखल केल्याची माहिती दिली. पोलिसांनी 100 पेक्षा जास्त साक्षीदारांचा उल्लेख केला असून, त्यात पाच प्रत्यक्षदर्शींचा समावेश आहे. याशिवाय व्हॉट्सअॅप चॅट, छायाचित्रे, मोबाइल डेटा, कॉल डिटेल रेकॉर्ड आणि तांत्रिक विश्लेषण अहवाल पुरावे म्हणून सादर करण्यात आले आहेत. तपासादरम्यान डिलीट केलेले डिजिटल संभाषण परत मिळवल्याचेही आरोपपत्रात म्हटले आहे.

आधी जबर जखमी करण्याचा विचार

पोलिसांच्या दाव्यानुसार, आरोपींनी सुरुवातीला केतनला गंभीर जखमी करण्याचा विचार केला होता. त्यासाठी महाराष्ट्राबाहेरील व्यक्तीला सुपारी देण्याची शक्यताही त्यांनी तपासली. मात्र, तो हल्लेखोर कट उघड करू शकतो किंवा अडचणी निर्माण करू शकतो, या भीतीने ही योजना सोडून देण्यात आली. या टप्प्यात संपर्क साधलेली एक व्यक्ती आता साक्षीदार झाली आहे.

त्यानंतर आरोपींनी स्वतःच केतनला संपवण्याचे ठरवले, असा पोलिसांचा आरोप आहे. यासाठी त्यांनी मर्डर फिल्म्स पाहिल्या, ChatGPT चा वापर केला आणि पोलिसांच्या तपासापासून कसे वाचायचे यावरील पॉडकास्टही ऐकले. गेल्या वर्षीच्या मेघालय हनिमून हत्या प्रकरणाचा (राजा रघुवंशी) अभ्यास केल्याचेही आरोपपत्रात म्हटले आहे.

'माही' नावाचे फेक इन्स्टाग्राम अकाउंट

आरोपींनी ओळखीच्या एका महिलेचे छायाचित्र वापरून 'माही' नावाचे फेक इन्स्टाग्राम अकाउंट तयार केले, असे तपासात समोर आले आहे. सियाच्या वाढदिवसानिमित्त सरप्राइज प्लॅन असल्याचे सांगून केतनला 18 जून रोजी लोहगडावर येण्यास सांगणारे संदेश या अकाउंटवरून पाठवण्यात आले. ही योजना रितेश हांगे याने आखल्याचा पोलिसांचा दावा आहे. घटनेनंतर हे अकाउंट डिलीट करण्यात आले.

लोहगडाची निवड कशी झाली?

पोलिसांच्या माहितीनुसार, सिया आणि चेतन मेच्या अखेरीस लोणावळ्यात गेले होते. त्यांनी टायगर पॉइंटसह अनेक ठिकाणांची पाहणी केली. काही ठिकाणी सीसीटीव्ही कॅमेरे नसल्याचे त्यांच्या लक्षात आले. गेल्या वर्षी मार्चमध्ये लोहगडावरून पडून एका महिलेचा मृत्यू झाला होता. त्यामुळे सेल्फी काढताना अपघाती पडल्याचे केतनच्या मृत्यूबाबत भासवता येईल, असे आरोपींना वाटल्याने लोहगडाची निवड झाल्याचे पोलिसांचे म्हणणे आहे.

18 जूनपूर्वीचे प्रयत्न

आरोपपत्रानुसार, 6 जून रोजी विमानतळाकडे जाताना सियाने खालापूर येथील एका कॅफेच्या प्रसाधनगृहात केतनचा पासपोर्ट फाडून टाकला, त्यामुळे दोघांना बालीला जाता आले नाही. त्यानंतर 14 जून रोजी दोघे लोहगडावर गेले असताना सियाने केतनला ढकलण्याचा प्रयत्न केला, पण तो अयशस्वी ठरला, असा पोलिसांचा दावा आहे. त्यानंतर तिने तेथे साप असल्याचा बनाव केल्याचेही पोलिसांचे म्हणणे आहे.

18 जून रोजी चेतन चौधरी बाहेर पडण्याच्या मार्गाने किल्ल्यावर पोहोचला आणि किल्ल्यावरील मंदिरात थांबला, असे पोलिसांनी म्हटले आहे. केतनचे लक्ष दुसरीकडे असताना सियाने त्याला मागून ढकलले आणि चेतनने लाथ मारल्याने तो दरीत कोसळला, असा आरोपपत्रातील घटनाक्रम असल्याचे सांगण्यात येते.

बचाव पक्षाची भूमिका

चेतन चौधरीचे वकील राम साहणे आणि अॅड. नितीन भालेराव यांनी आरोपपत्र दाखल झाल्याला दुजोरा दिला आहे. बचाव पक्ष आरोपपत्राचा अभ्यास करून आरोपींची बाजू न्यायालयात मांडेल, असे त्यांनी सांगितले. आरोपपत्रातील मुद्दे हे पोलिसांचे आरोप असून, ते न्यायालयात सिद्ध होणे बाकी आहे.

(The above story first appeared on LatestLY on Sep 20, 2026 06:33 PM IST. For more news and updates on politics, world, sports, entertainment and lifestyle, log on to our website latestly.com).