Central Railway 15-Day Special Block: टिटवाळा स्थानकावर फलाट विस्तारासाठी मध्य रेल्वेचा विशेष ब्लॉक; लोकल सेवांवर होणार परिणाम

मध्य रेल्वेने (Central Railway) टिटवाळा स्थानकावर (Titwala Railway Station) 15 डब्यांच्या उपनगरी लोकल गाड्यांसाठी फलाट विस्ताराचे काम हाती घेतले आहे. या कामासाठी 28-29 ऑगस्ट 2026 च्या मध्यरात्रीपासून 11-12 सप्टेंबर 2026 च्या मध्यरात्रीपर्यंत दररोज विशेष ट्रॅफिक आणि पॉवर ब्लॉक घेतला जाणार आहे. या 15 दिवसांच्या कालावधीत काही उपनगरी सेवा रद्द करणे, त्यांचे शॉर्ट टर्मिनेशन करणे किंवा मार्गात बदल करणे यांसारखे उपाय योजले जाणार असल्याचे मध्य रेल्वेने स्पष्ट केले आहे.

मध्य रेल्वे वरील ब्लॉकचे स्वरूप आणि कालावधी

टिटवाळा स्थानकावरील फलाट विस्ताराचे काम दोन टप्प्यांत विभागण्यात आले आहे. पहिला टप्पा 28/29 ऑगस्ट (शुक्रवार-शनिवार रात्र) पासून 11/12 सप्टेंबर (मंगळवार-बुधवार रात्र) पर्यंत चालणार आहे. या काळात दररोज रात्री 11.30 ते पहाटे 5.10 या वेळेत ब्लॉक घेतला जाणार आहे. हा ब्लॉक कल्याण आणि वाशिंद या स्थानकांदरम्यान 'अप' आणि 'डाऊन' या दोन्ही दिशांना घेतला जाईल.

एकूणच हे काम पंधरा दिवस चालणार असून, संपूर्ण कालावधीत प्रत्येक रात्री पाच ते सहा तास मुख्य मार्गावरील वाहतुकीवर परिणाम होणार आहे.

मेल-एक्स्प्रेस गाड्यांचे नियमन

१५-डब्यांच्या उपनगरी गाड्यांसाठी फलाट विस्तार करण्याकरिता टिटवाळा येथे दिनांक २८/२९ ऑगस्ट च्या मध्यरात्रीपासून ते ११/१२ सप्टेंबर २०२६ च्या मध्यरात्रीपर्यंत दररोज विशेष ट्रॅफिक व पॉवर ब्लॉक घेण्यात येणार आहे.

या कालावधीत काही उपनगरी सेवांचे रद्दीकरण, शॉर्ट टर्मिनेशन किंवा… pic.twitter.com/Tq9WnXTFf9

— Central Railway (@Central_Railway) August 26, 2026

या ब्लॉक कालावधीत काही महत्त्वाच्या मेल आणि एक्स्प्रेस गाड्यांचेही नियमन केले जाणार आहे. गाडी क्रमांक ११०४८ गोरखपूर-दादर एक्स्प्रेसचे नियमन वाशिंद स्थानकावर, तर ३०/३१ ऑगस्ट रोजी आटगाव स्थानकावर केले जाणार आहे. त्याचप्रमाणे गाडी क्रमांक ११०४४ बलिया-दादर एक्स्प्रेसचेही ३१ ऑगस्ट/१ सप्टेंबर रोजी आटगाव येथे नियमन केले जाईल.

कोणत्या गाड्यांना उशीर होणार?

ब्लॉकमुळे काही प्रमुख मेल-एक्स्प्रेस गाड्या १० ते २० मिनिटे उशिराने धावण्याची शक्यता आहे. यामध्ये गाडी क्रमांक १२१०२ शालीमार-लोकमान्य टिळक टर्मिनस एक्स्प्रेस, गाडी क्रमांक १८०३० शालीमार-लोकमान्य टिळक टर्मिनस एक्स्प्रेस, गाडी क्रमांक १२८१० हावडा-छत्रपती शिवाजी महाराज टर्मिनस एक्स्प्रेस आणि गाडी क्रमांक १५१८१ लोकमान्य टिळक टर्मिनस एक्स्प्रेस या गाड्यांचा समावेश आहे. याशिवाय, गरजेनुसार काही मेल-एक्स्प्रेस आणि सुट्टीतील विशेष गाड्यांच्या मार्गातही बदल केला जाऊ शकतो.

प्रवाशांना आवाहन

मध्य रेल्वेने प्रवाशांना या कालावधीत बदललेले वेळापत्रक आधीच तपासून आपल्या प्रवासाचे नियोजन करण्याचे आवाहन केले आहे. दररोज रात्रीच्या वेळी हा ब्लॉक असल्याने, रात्रीच्या लोकल सेवांवर आणि लांब पल्ल्याच्या गाड्यांच्या वेळापत्रकावर याचा थेट परिणाम होण्याची शक्यता आहे.

(The above story first appeared on LatestLY on Aug 27, 2026 02:18 PM IST. For more news and updates on politics, world, sports, entertainment and lifestyle, log on to our website latestly.com).