अंधेरी स्थानकात होणार असा बदल की गर्दीचा प्रश्नच मिटणार! 4 लाख प्रवाशांना थेट फायदा
अंधेरी स्थानकातील गर्दी कमी करण्यासाठी पश्चिम रेल्वेने सहाव्या मार्गिकेलगत 12 डब्यांचा प्लॅटफॉर्म आणि पूर्वेकडे नवीन बाहेर पडण्याचा मार्ग प्रस्तावित केला आहे. यामुळे दररोज प्रवास करणाऱ्या सुमारे 4.5 लाख प्रवाशांना दिलासा मिळणार आहे.
मुंबई उपनगरीय रेल्वे जाळ्यातील पश्चिम रेल्वे मार्गावरील एक महत्त्वाचे स्थानक आणि प्रमुख इंटरचेंज पॉइंट म्हणजे अंधेरी स्टेशन. सकाळ संध्याकाळ अंधेरी स्थानकावर गर्दीचा मोठा ताण असतो. ही गर्दी कमी करण्यासाठी पश्चिम रेल्वेने स्थानकाच्या पूर्व बाजूस 12 डब्यांचा नवा प्लॅटफॉर्म उभारण्याचा निर्णय घेतला आहे. यामुळे गर्दीच्या वेळी प्रवाशांना मोठा दिलासा मिळणार आहे. नक्की वाचा: मुंबईकरांसाठी डबल अपडेट! मेट्रो सकाळी लेट, रात्री उशिरापर्यंत धावणार; संपूर्ण वेळापत्रक इथे पाहा .
पूर्वेकडे नवीन बाहेर पडण्याचा मार्ग
मिड-डेच्या वृत्तानुसार, पश्चिम रेल्वेने सहाव्या मार्गिकेलगत 12 डब्यांचा होम प्लॅटफॉर्म उभारण्याचा प्रस्ताव मांडला आहे. यामुळे गर्दीच्या वेळेत होणारी कोंडी कमी होण्यास मदत होणार आहे. अंधेरी पूर्वेकडे जाणारा हा नवा बाहेर पडण्याचा मार्ग प्लॅटफॉर्म 9 वर उतरणाऱ्या प्रवाशांना गाडीच्या दोन्ही बाजूंनी उतरून थेट अंधेरी ईस्ट रोडकडे जाण्याची सुविधा देईल. यामुळे स्थानकातील सध्याच्या वर्दळीच्या भागांवरील ताण कमी होणार आहे.
गर्दी नियंत्रणासाठी उपाय
अंधेरी स्थानकावर दररोज एक हजाराहून अधिक उपनगरीय गाड्यांची ये-जा होते आणि सुमारे 4.5 लाख प्रवासी या स्थानकाचा वापर करतात. गर्दीच्या वेळी येणाऱ्या गाड्यांमधील प्रवासी कधीकधी पादचारी पुलांवर (FOB) आणि जिन्यांवर गर्दी करतात, ही समस्या लक्षात घेऊन हा निर्णय घेण्यात आला आहे. या नव्या व्यवस्थेमुळे विशेषतः गर्दीच्या वेळी प्रवाशांच्या सुरक्षेतही सुधारणा होण्याची अपेक्षा आहे.
इतर पायाभूत सुविधांचे कामही प्रगतिपथावर
केवळ 12 डब्यांचा नवा प्लॅटफॉर्म आणि बाहेर पडण्याचा मार्गच नव्हे, तर अंधेरी स्थानकातील गाड्यांच्या संचलनात सुधारणा करण्यासाठी इतरही अनेक पायाभूत कामे सुरू आहेत. मिड-डेच्या वृत्तानुसार, प्लॅटफॉर्म 4 आणि 5 यांची दक्षिणेकडे वाढ करण्यात येत असून, यामुळे प्लॅटफॉर्म 5 वरून विरारकडे जाणाऱ्या गाड्यांचे रिव्हर्सल सुलभ होणार आहे.
तसेच, प्लॅटफॉर्म 7 च्या उत्तर टोकाला नवीन सिग्नल यंत्रणा उभारण्याचे नियोजन आहे. यामुळे अप-थ्रू गाड्यांना डाऊन-थ्रू लाईनकडे वळवणे शक्य होणार आहे.
आपत्कालीन परिस्थितीसाठी उपाययोजना
अधिकाऱ्यांनी उत्तर टोकाला अप आणि डाऊन हार्बर लाईनदरम्यान आपत्कालीन क्रॉसओव्हर उभारण्याचेही नियोजन केले आहे. यामुळे आपत्कालीन परिस्थितीत किंवा मोठ्या ब्लॉकदरम्यान हार्बर लाईनच्या गाड्या रिव्हर्स करणे शक्य होणार असून, त्याचवेळी इतर सेवाही सुरळीत ठेवता येणार आहेत.
एकूणच, या सर्व उपाययोजनांमुळे अंधेरी स्थानकावरील गर्दी नियंत्रणात येऊन प्रवाशांचा प्रवास अधिक सुरक्षित आणि सुकर होण्याची अपेक्षा व्यक्त केली जात आहे.
(The above story first appeared on LatestLY on Sep 17, 2026 01:24 PM IST. For more news and updates on politics, world, sports, entertainment and lifestyle, log on to our website latestly.com).
