लालबागचा राजा मंडपाजवळ 68 वर्षीय व्यक्तीचा मृत्यू, गणेशोत्सवातील दुसरी घटना
मुंबईतील प्रसिद्ध लालबागचा राजा गणेश मंडपाजवळ गुरुवारी रात्री ६८ वर्षीय स्थानिक रहिवासी अचानक बेशुद्ध पडून त्यांचा मृत्यू झाला. गणेशोत्सव काळात लालबाग परिसरातील ही दुसरी मृत्यूची घटना असून, प्रशासनाकडून याबाबत चौकशी सुरू आहे.
लालबाग परळ भागातील सुप्रसिद्ध लालबागचा राजा गणेश मंडपाजवळ गुरुवारी, 24 सप्टेंबर रोजी रात्री एका 68 वर्षीय स्थानिक रहिवाशाचा अचानक बेशुद्ध पडून मृत्यू झाला. देशभरातून लाखो भाविकांची गर्दी खेचणाऱ्या गणेशोत्सवादरम्यान लालबाग परिसरात झालेली ही दुसरी मृत्यूची घटना असल्याचे प्रशासनाने सांगितले. आज लालबागचा राजा 12 दिवसांच्या मुक्कामानंतर आपल्या घरी परतण्यासाठी विसर्जनाला सज्ज झाला आहे. दुपारी 12 ते 1 च्या सुमारास मंडपातून बाहेर पडून लालबागचा राजा पुढे 15-17 तासांच्या मिरवणूकीनंतर गिरगाव चौपाटीवर विसर्जित केला जाईल.
रुग्णालयात हलवले, चौकशी सुरू
कळाचौकी पोलीस ठाण्याकडून मिळालेल्या माहितीनुसार, मृत व्यक्तीची ओळख विजय आणेकर अशी झाली आहे. वृत्तसंस्था पीटीआयच्या माहितीनुसार, लालबागचा राजा मंडपाच्या अगदी जवळ असलेल्या हनुमान मंदिराजवळ बसले असताना आणेकर बेशुद्ध पडले.
घटनेची माहिती मिळताच आपत्कालीन पथकाने त्यांना तातडीने शेजारील परळ येथील ग्लोबल हॉस्पिटलमध्ये हलवले. रुग्णालयात पोहोचल्यावर डॉक्टरांनी त्यांना "मृत घोषित" केले. मृत्यूचे नेमके कारण अद्याप स्पष्ट झालेले नसून, पालिका अधिकाऱ्यांनी हे प्रकरण चौकशीच्या अधीन असल्याचे सांगितले.
उत्सवादरम्यानच्या याआधीच्या घटना
या ताज्या दुर्घटनेपूर्वी गणेशोत्सव काळात याआधीही एक वैद्यकीय आणीबाणीची घटना घडली होती. १७ सप्टेंबर रोजी पुण्यातील २५ वर्षीय अभियंता जयदीप मेघराज नेमाडे यांना लालबागचा राजा गणपती मंडपात अचानक वैद्यकीय त्रास जाणवला होता आणि त्यानंतर त्यांचा मृत्यू झाला होता.
सुरक्षा आणि वैद्यकीय व्यवस्था सक्षम
गणेशोत्सव काळात मोठ्या प्रमाणात होणारी गर्दी हाताळण्यासाठी आणि वैद्यकीय आणीबाणीच्या प्रसंगी तत्काळ प्रतिसाद देण्यासाठी पोलीस आणि पालिका प्रशासनाने लालबाग परिसरात कडक सुरक्षा आणि वैद्यकीय पथकांची तैनाती कायम ठेवली आहे.