Suicide प्रतिकात्मक प्रतिमा (फोटो सौजन्य - संपादित प्रतिमा)

Man Blames Wife for Suicide: मुंबईतून (Mumbai) एका तरुणाच्या आत्महत्येची धक्कादायक बातमी समोर आला आहे. मिळालेल्या माहितीनुसार, पत्नी आणि तिच्या मावशीच्या छळाला कंटाळून एका 41 वर्षीय पुरूषाने आत्महत्या (Suicide) केली आहे. मृत्यूपूर्वी, या तरुणाने स्वतः वेबसाइटवर त्याच्या कुटुंबाला शेवटचा संदेश लिहिला. त्या तरुणाने त्याच्या मृत्यूसाठी त्याची पत्नी आणि तिच्या मावशीला जबाबदार धरले आहे. निशांत त्रिपाठी (Nishant Tripathi) नावाच्या एका तरुणाने मृत्यूपूर्वी आपल्या पत्नीला शेवटचे पत्र लिहिले. निशांतने हे पत्र कंपनीच्या वेबसाइटवर अपलोड केले. त्याने सर्वात आधी त्याच्या आईसाठी, त्याच्या भावासाठी आणि त्याच्या बहिणीसाठी शेवटचा संदेश लिहिला. यानंतर, या तरुणाने आपल्या पत्नीला शेवटचे पत्र लिहिले, ज्यामध्ये त्याने आपल्या मृत्यूसाठी तिला आणि तिच्या मावशीला जबाबदार धरले. या तरुणाने 28 फेब्रुवारी रोजी मुंबईतील विलेपार्ले येथील सहारा हॉटेलमध्ये गळफास घेऊन आत्महत्या केली.

खोलीबाहेर लावले 'डू नॉट डिस्टर्ब'चे बोर्ड -

पोलिसांनी दिलेल्या माहितीनुसार, निशांतने आत्महत्या करण्याच्या 3 दिवस आधी हॉटेलमध्ये एक खोली बुक केली होती आणि आत्महत्येच्या दिवशी बाहेर 'डू नॉट डिस्टर्ब' असे फलकही लावले होते. या घटनेनंतर निशांत त्रिपाठीच्या आईने मुंबईतील विमानतळ पोलिस स्टेशनमध्ये तक्रार दाखल केली. आत्महत्येनंतर, पोलिसांनी प्रथम एडीआर दाखल केला आणि नंतर आईच्या तक्रारीवरून निशांतची पत्नी आणि तिच्या मावशीविरुद्ध बीएनएसच्या कलम 108 अंतर्गत तक्रार दाखल केली. (हेही वाचा -MBBS Student Dies By Suicide In Kota: 'मी माझे स्वप्न पूर्ण करू शकलो नाही'; कोटामध्ये एमबीबीएस विद्यार्थ्याने गळफास घेऊन आत्महत्या)

पीडित निशांतची आई कानपूरची रहिवासी असून त्यांचे नाव नीलम त्रिपाठी असं आहे. त्यांनी सांगितलं की, निशांतची पत्नी आधीच विवाहित होती आणि तिचा घटस्फोट झाला होता, त्यानंतर अपूर्वाची निशांतशी एका पार्टीत भेट झाली. दोघांमध्ये घटस्फोट होणार होता. पण त्याआधीचं मुलाने एवढे टोकाचे पाऊल उचलले. (हेही वाचा - Man Suicide Due to Stock Market Loses: शेअर बाजारात 16 लाख रुपयांचे नुकसान; नाशिकमधील 28 वर्षीय तरुणाची आत्महत्या)

बाथरूममध्ये गळफास घेऊन केली आत्महत्या -

प्राप्त माहितीनुसार, निशांत अ‍ॅनिमेशन उद्योगाशी संबंधित होता. तो विरारचा रहिवासी असला तरी, पत्नीच्या छळाला कंटाळून आत्महत्या करण्यापूर्वी काही दिवसांपूर्वी तो मुंबईतील एका हॉटेलमध्ये राहायला गेला होता. 28 फेब्रुवारी रोजी निशांतने त्याच्या खोलीच्या दारावर 'डू नॉट डिस्टर्ब' असा बोर्ड लावला आणि बाथरूममध्ये गळफास घेऊन आत्महत्या केली. बराच वेळ तो हॉटेल कर्मचाऱ्यांना प्रतिसाद देत नसल्यामुळे, हॉटेल कर्मचाऱ्यांनी मास्टर की वापरून त्याच्या खोलीत प्रवेश केला. त्यावेळी निशांत गळफास घेतलेल्या अवस्थेत सापडला. या घटनेची माहिती मिळताच विमानतळ पोलिसांनी घटनास्थळी पोहोचून मृतदेह शवविच्छेदनासाठी पाठवला.

तपासादरम्यान सुसाईड नोट सापडली -

तथापि, तपासादरम्यान, पोलिसांना एक सुसाईड नोट सापडली जी निशांतने त्याच्या कंपनीच्या वेबसाइटवर अपलोड केली होती आणि त्यावर पासवर्ड देखील टाकला होता. निशांतने त्याच्या सुसाईड नोटच्या शेवटी एक कविता लिहिली, ज्यामध्ये त्याने त्याच्या पत्नीवरील प्रेम व्यक्त केले आणि त्याच्या मृत्यूसाठी तिला आणि तिच्या मावशीला जबाबदार धरले. निशांतच्या आईच्या तक्रारीवरून विमानतळ पोलिसांनी गुन्हा दाखल केला असून या प्रकरणाचा तपास सुरू केला आहे.

आत्महत्या प्रतिबंध आणि मानसिक आरोग्य हेल्पलाइन क्रमांक:

टेली मानस (आरोग्य मंत्रालय): 14416 किंवा 1800 891 4416; निमहंस: + ९१ + 91 80 26995000 /5100 /5200 /5300 /5400; पीक माइंड: 080-456 87786; वांद्रेवाला फाउंडेशन: – 9999 666 555; अर्पिता आत्महत्या प्रतिबंध हेल्पलाइन: 080-23655557; आयकॉल: 022-25521111 आणि 9152987821 आणि 9152987821; सीओओजे मेंटल हेल्थ फाउंडेशन (सीओओजे): 0832-2252525.