Uttarakhand Chardham Yatra 2024: उत्तराखंड चार धाम यात्रा 10 मेपासून सुरू; नाव नोंदणी आवश्यक, जाणून घ्या कधी उघडणार केदारनाथ, बद्रीनाथ, गंगोत्री व यमुनोत्रीचे दरवाजे

Uttarakhand Chardham Yatra 2024: उत्तराखंडमध्ये येत्या 10 मेपासून चारधाम यात्रा सुरू होत आहे. केदारनाथचे दरवाजे 10 मे रोजी, बद्रीनाथचे दरवाजे 12 मे रोजी, गंगोत्री, यमुनोत्रीचे दरवाजे अक्षय्य तृतीयेच्या मुहूर्तावर, म्हणजेच 10 मे रोजीच उघडतील. उत्तराखंडमधील या चारधाम यात्रेसाठी 8 एप्रिलपासून ऑनलाइन नोंदणी सुरू होणार होती, मात्र ती झालेली नाही. आता अहवालानुसार, चारधाम यात्रेची ऑनलाइन नोंदणी 15 एप्रिलपासून सुरू होणार आहे. यावेळी प्रवाशांच्या नोंदणी स्लिपवर आवश्यक मोबाईल क्रमांकही लिहिण्यात येणार आहेत. मॅन्युअल नोंदणीसाठी आठ काउंटरही उघडण्यात येणार आहेत. यावेळी कोणत्याही प्रवाशाला नोंदणीशिवाय चारधामला जाण्याची परवानगी दिली जाणार नाही.

उत्तराखंड पर्यटन विकास परिषद बद्रीनाथ-केदारनाथ मंदिर समिती आणि गंगोत्री आणि यमुनोत्री धाम समितीकडून पत्र मिळाल्यानंतरच यात्रेसाठी नोंदणी सुरू करते. प्रवाशांना वेबसाइट, ॲप, टोल फ्री क्रमांक आणि व्हॉट्सॲपद्वारे नोंदणी करता येणार आहे.

यावेळी चारधाम यात्रेत मोठ्या संख्येने भाविक सहभागी होणार असल्याचे उत्तराखंडचे पर्यटन आणि धर्म मंत्री सतपाल महाराज सांगतात. त्यादृष्टीने यात्रेची तयारी वेळेत पूर्ण करण्याच्या सूचना संबंधित विभागांना देण्यात आल्या आहेत. चारधाम यात्रेच्या तयारीसाठी पर्यटन विभागाने गढवाल विभागीय आयुक्तांना 5 कोटी रुपये दिले आहेत. ही रक्कम केदारनाथ, बद्रीनाथ, यमुनोत्री आणि गंगोत्री धाममध्ये यात्रेकरूंना चांगली व्यवस्था देण्यासाठी खर्च केली जाणार आहे.

प्रवासादरम्यान डोंगराळ भागात अनेकदा हवामान खराब असते आणि बर्फवृष्टीमुळे थंडीही वाढते. हे लक्षात घेऊन प्रवाशांनी पुरेसे लोकरीचे कपडे, छत्री, रेनकोट सोबत ठेवावेत अशा सूचना देण्यात आल्या आहेत. (हेही वाचा: Weather: या राज्यांमध्ये उष्णतेची लाट, दिल्लीत पारा 39 अंशांवर पोहोचला, पावसाचीही शक्यता)

दरम्यान, उत्तराखंडमधील चार धाम यात्रा ही जगातील सर्वात पवित्र तीर्थक्षेत्रांपैकी एक आहे. यमुनोत्री, गंगोत्री, केदारनाथ आणि बद्रीनाथ ही चार मंदिरे या यात्रेत समाविष्ट आहेत. याला छोटा चार धाम यात्रा असेही म्हणतात. छोटा चार धाम यात्रेतील सर्व पवित्र स्थळे वेगवेगळ्या देवी-देवतांना समर्पित आहेत. केदारनाथ धाम हे 12 ज्योतिर्लिंगांपैकी एक आहे आणि ते भगवान शिवाला समर्पित आहे. बद्रीनाथ धाम हे भगवान बद्री किंवा विष्णू यांना समर्पित आहे. गंगोत्री धाम माता गंगा आणि यमुनोत्री हे यमुना मातेला समर्पित आहे.