Vijay Mallya च्या अडचणीत वाढ; सर्वोच्च न्यायालय उद्या अवमान प्रकरणी शिक्षा सुनावण्याची शक्यता

सर्वोच्च न्यायालय (Supreme Court) सोमवारी अवमान प्रकरणी फरार उद्योगपती विजय मल्ल्या (Vijay Mallya) विरोधात शिक्षा जाहीर करू शकते. किंगफिशर एअरलाइन्सच्या 9,000 कोटी रुपयांहून अधिक बँक कर्ज थकबाकीच्या अवमान प्रकरणात मल्ल्या दोषी आढळला आहे. तत्कालीन न्यायमूर्ती यूयू ललित आणि न्यायमूर्ती एस रवींद्र भट यांच्या खंडपीठाने 10 मार्च 2022 रोजी मल्ल्याविरुद्ध अवमान प्रकरणात शिक्षेबाबतचा निर्णय राखून ठेवला होता आणि त्याच्याविरुद्धची कार्यवाही ठप्प असल्याचे सांगितले होते.

सर्वोच्च न्यायालयाने अवमान कायदा आणि शिक्षेशी संबंधित विविध पैलूंवर ज्येष्ठ वकील आणि अॅमिकस क्युरी जयदीप गुप्ता यांची सुनावणी घेतली आणि शिक्षेच्या प्रमाणात लिखित युक्तिवाद करण्यासाठी मल्ल्या यांचे वकील अंकुर सेहगल यांना शेवटची संधी दिली होती. खंडपीठाने आपल्या आदेशात म्हटले होते की, वकील अंकुर सेहगल यांनी सबमिशन करण्यास असमर्थता व्यक्त केली असली तरी, आम्ही त्यांना 15 मार्च 2022 पर्यंत अॅमिकस क्युरीकडे आगाऊ प्रत देऊन सबमिशन दाखल करण्याची आणखी एक संधी देत आहोत. (हेही वाचा - Cyrus Mistry Passes Away: उद्योगपती साइरस मिस्त्री यांचे रस्ते अपघातात निधन, मुंबई अहमदाबाद मार्गावर चारोटी येथे मर्सिडीज रस्तादुभाजकाला धडकली)

मल्ल्याच्या वकिलाने सांगितले की, आमचा क्लायंट यूकेमध्ये आहे आणि आमच्या क्लायंटकडून कोणतेही निर्देश नसल्यामुळे आम्ही कोणत्याही प्रकारचा युक्तिवाद करू शकत नाही. खंडपीठाने म्हटले होते की, त्यांनी मल्ल्याला वैयक्तिकरित्या किंवा वकिलामार्फत हजर राहण्याच्या अनेक संधी दिल्या आहेत आणि 30 नोव्हेंबर 2021 च्या अंतिम आदेशात विशिष्ट निर्देशही दिले आहेत.

मल्ल्याला 2017 मध्ये अवमानासाठी दोषी ठरवण्यात आले होते. सर्वोच्च न्यायालयाने 2020 मध्ये मल्ल्याची 2017 च्या निकालाची पुनर्विलोकन करण्याची मागणी फेटाळली होती. ज्यामध्ये न्यायालयाच्या आदेशांचे उल्लंघन करून 40 दशलक्ष डॉलर्स त्याच्या मुलांना हस्तांतरित केल्याबद्दल अवमानासाठी दोषी ठरवले होते. मल्ल्या मार्च 2016 पासून यूकेमध्ये आहे.