Cyber Fraud: सायबर फसवणुकीला बळी पडल्यानंतर बेळगावीमध्ये वृद्ध दाम्पत्याची आत्महत्या; सुसाईड नोटद्वारे दिली माहिती, तपास सुरु

कर्नाटकातील बेळगाव (Belagavi) जिल्ह्यातून एक धक्कादायक बातमी समोर आली आहे. येथील खानापूर तालुक्यातील बीडी गावात एका वृद्ध जोडप्याने ऑनलाइन फसवणुकीला (Cyber Fraud) कंटाळून आत्महत्या केली आहे. गेल्या तीन महिन्यांपासून या जोडप्याला ब्लॅकमेल केले जात होते. त्यांना सतत धमक्या येत होत्या. शेवटी, तणावाखाली, त्यांनी असे पाऊल उचलले. डिएगो सँटन नाझरेथ (83) आणि त्यांची पत्नी फ्लेव्हियाना (80) अशी मृतांची ओळख पटली आहे. ते ख्रिश्चन स्ट्रीटचे रहिवासी होते. फ्लेव्हियानाचा मृतदेह घराच्या आत आढळला, तर डिएगोचा मृतदेह घराबाहेर असलेल्या पाण्याच्या टाकीत आढळला.

पोलिसांनी दिलेल्या माहितीनुसार, या जोडप्याने आत्महत्या करण्यासाठी गोळ्या खाल्ल्या. शिवाय, डिएगोने विळ्याने स्वतःचा गळा कापण्याचा प्रयत्न केला आणि नंतर पाण्याच्या टाकीत उडी मारली. डिएगो महाराष्ट्र सरकारमधून अधिकारी म्हणून निवृत्त झाले होते. मृत्युपूर्वी त्यांनी एक सुसाईड नोट लिहिली आहे. चिठ्ठीत त्यांनी म्हटले आहे की, जानेवारीपासून काही लोक नवी दिल्लीतील दूरसंचार अधिकारी असल्याचे भासवून त्यांना त्रास देत होते. फसवणूक करणाऱ्यांनी त्यांना सांगितले होते की, गुन्हेगारी कारवाया करण्यासाठी त्यांच्या मोबाईल सिम कार्डचा वापर केल्याचा आरोप आहे.

त्यांनी दिएगो यांना डिजिटली अटक करण्याची धमकी दिली. या चिठ्ठीत सुमित बिर्रा आणि अनिल यादव नावाच्या व्यक्तींचा उल्लेख आहे. या लोकांनी जोडप्याकडून 50 लाख रुपये घेतले होते. नंतर, त्यांनी त्यांच्याकडे आणखी पैसे मागायला सुरुवात केली. त्यांनी यासाठी गोवा आणि मुंबईतील लोकांकडून सोने आणि मैत्रीपूर्ण कर्ज घेतले होते. त्यांनी असेही लिहिले की, ही कर्जे त्यांच्या मालमत्तेच्या विक्रीतून मिळालेल्या पैशातून फेडली पाहिजेत. बेळगावचे पोलीस अधीक्षक (एसपी) भीमाशंकर गुलेड यांनी या घटनेवर दुःख व्यक्त केले. (हेही वाचा: Bengaluru Murder Case: बेंगळुरूमध्ये भयानक हत्याकांड! पुण्यातील सॉफ्टवेअर व्यावसायिकाने पत्नीची हत्या करून मृतदेह सुटकेसमध्ये लपवला; आरोपीला अटक)

कोणत्याही संशयास्पद कॉलची माहिती त्वरित पोलिसांना देण्याचे आवाहन त्यांनी लोकांना केले आहे. ते म्हणाले की दुर्दैवाने, त्या जोडप्याने शेजाऱ्यांना किंवा पोलिसांना याबद्दल माहिती दिली नाही. पोलिसांनी एक मोबाईल फोन, एक सुसाईड नोट आणि एक कोयता जप्त केली आहे. पोलीस या प्रकरणाचा तपास करत आहेत. जोडप्याच्या इच्छेनुसार, त्यांचे मृतदेह बीआयएमएस मेडिकल कॉलेजला दान करण्यात आले आहेत, जेणेकरून विद्यार्थ्यांना त्यांचा अभ्यास करता येईल.

(The above story first appeared on LatestLY on Jan 01, 1970 05:30 AM IST. For more news and updates on politics, world, sports, entertainment and lifestyle, log on to our website latestly.com).