आम आदमी पक्षाचे नगरसेवक ताहिर हुसेन निलंबित ; 27 फेब्रुवारी 2020 च्या ताज्या मराठी बातम्या आणि ब्रेकिंग न्यूज LIVE

म्यानमारचे अध्यक्ष यू विन मायंट यांनी आपल्या पत्नीसह आज रात्री दिल्ली येथील राष्ट्रपती भवनात राष्ट्रपती राम नाथ कोविंद यांच्यासह इतर मान्यवरांची भेट घेतली आहे. ट्विट-

आम आदमी पक्षाचे नगरसेवक ताहिर हुसेन निलंबित यांना पक्षाच्या प्राथमिक सदस्यावरून निलंबित करण्यात आले आहे.

इराणचे उपाध्यक्ष मासूमेह एबटेकर यांना नवीन कोरोना व्हायरस ची लागण झाल्याचे वृत्त ANI दिले आहे. ही खूप धक्कादायक बातमी असून कोरोना व्हायरस लोण आता इराणमध्येही ब-यापैकी पसरत चालल्याचे चित्र यावरुन दिसत आहे.

मध्य प्रदेश कोर्टाने आज राज्य सरकारला राज्यात एकेरी वापरल्या जाणा-या प्लास्टिक आणि पॉलिथिवर त्वरित बंदी घालण्याचे आदेश दिले आहेत.

दिल्ली हिंसाचार प्रकरण चिघळत चालले असून दिल्ली पोलिस गुन्हे शाखेअंतर्गत विशेष तपास पथक (SIT) स्थापन करण्यात आली आहे. तसेच सर्व FIR ही SIT कडे देण्यात आल्या आहेत. 

महाराष्ट्राचे मुख्यमंत्री उद्धव ठाकरे हे येत्या 7 मार्चला अयोध्येला जाणार आहेत. त्यांच्या महत्वपूर्ण दौ-याआधी शिवसेना खासदार संजय राऊत स्वत: अयोध्येला भेट देणार आहेत.

बांग्लादेशी घुसरखोरांची माहिती देणाऱ्याला मनसे 5 हजार रुपये बक्षीस देणार आहे. मनसेकडून बांग्लादेशी घुसखोरांना देशातून पळवून लावण्यासाठी मनसे जोरदार प्रयत्न करताना दिसत आहे. अशातचं आता मनसेकडून नवीन घोषणा करण्यात आली आहे. या घोषणेनुसार, बांग्लादेशी घुसरखोरांची माहिती देणाऱ्याला मनसे 5 हजार रुपये बक्षीस देणार आहे. 

यवतमाळ जिल्ह्यात एका 10 वर्षांच्या चिमुरडीचा लग्न समारंभात विनयभंग झाल्याची घटना घडली आहे. अक्षय चांदेकर, असं या नराधमाचं नाव आहे. विशेष म्हणजे हा सर्व प्रकार सीसीटीव्हीमध्ये कैद झाला आहे. 

धुळे जिल्ह्यात शेंगदाणे खात असताना ठसका लागून अडीच वर्षांच्या चिमुरडीचा श्वास कोंडून मृत्यू झाल्याची घटना घडली आहे. सृष्टी ठाकरे, असं या मृत चिमुरडीचं नाव आहे. या घटनेमुळे ठाकरे परिवारावर शोककळा पसरली आहे. 

मराठी भाषा सक्ती विधेयक परिषदे पाठोपाठ विधानसभेतही मंजूर झाले आहेत.

व्हॅलेटाईन डे च्या दिवशी महाविद्यालयातील विद्यार्थींना प्रेमविवाह न करण्याची शपथ देणाऱ्या चांदुर रेल्वे महाविद्यालयातील 3 शिक्षकांचे निलंबन करण्यात आलं आहे.  

कोरेगाव-भीमा प्रकरणातील 348 तर मराठा आंदोलनातील 460 गुन्हे मागे घेण्यात येणार असल्याची माहिती राज्याचे गृहमंत्री अनिल देशमुख यांनी दिली आहे.

विमानात अर्णब गोस्वामी याच्याशी गैरवर्तन केल्यामुळे इंडिगो एअरलाइन्सने, कुणाल कामरावर 6 महिन्यांची विमान बंदी घातली होती. त्यानंतर या प्रकरणाबाबत कामराने डीजीसीए आणि दिल्ली उच्च न्यायालयाशी संपर्क साधला. यावर निर्णय देत कोर्टाने कामराची 6 महिन्यांची विमान बंदी कमी करून ती 3 महिने केली आहे. 

दिल्ली हिंसाचाराच्या पार्श्वभूमीवर CBSE ने 28 व 29 फेब्रुवारी रोजी होणाऱ्या 10 वी, 12 वी च्या परीक्षा पुढे ढकलल्या आहेत. उर्वरित दिल्लीतील परीक्षा वेळापत्रकानुसार घेण्यात येतील. ज्या विद्यार्थ्यांच्या परीक्षा आता होऊ शकणार नाहीत त्यांच्या परीक्षेची पुढील तारीख लवकरच कळविली जाणार आहे.

सातारा जिल्ह्यातील रस्त्यावरील गुन्ह्यांना आळा घालण्यासाठी, सातारा शहरात 24 तास बीट मार्शल योजना राबविण्यास प्रारंभ करण्यात आला आहे. पोलिस अधीक्षक तेजस्वी सातपुते यांच्या प्रयत्नातून ही गोष्ट घडली. यातील दुसरा टप्पा आज सुरु झाला. यामुळे महिलांबाबत  घडणारे गुन्हे , घरफोडी, सोनसाखळी चोरी, वाहनचोरी आणि इतर प्रकारच्या गुन्ह्यांना आळा बसणार आहे.

दिल्ली पोलिसांनी, सध्याच्या परिस्थितीमध्ये द्वेषयुक्त भाषणाबद्दल कोणावरही एफआयआर दाखल न करण्याचा निर्णय घेतला आहे. याबाबत उच्च न्यायालयाला माहिती देण्यात आली. यामुळे दिल्लीत शांतता व सुव्यवस्था निर्माण होणार नाही असे दिल्ली पोलिसांचे म्हणणे आहे. तसेच त्यांनी ईशान्य दिल्ली हिंसाचार प्रकरणात 48 एफआयआर दाखल केले असल्याची माहिती दिली.

पुण्यात 18 वर्षीय मुलासोबत एक धक्कादायक प्रकार घडला आहे. पैशाबाबत झालेल्या वादामुळे या मुलाच्या मित्रांनी त्याला निर्घृणपणे मारहाण केली व तो परीक्षेसाठी वेळेत पोहचू नये म्हणून त्याला लोखंडी रेलिंगला बांधून ठेवले.  

मनोज कोटक हे खासदार म्हणून निवडून गेल्यावर आता, भाजपने मुलुंडचे नगरसेवक प्रभाकर शिंदे यांच्याकडे विरोधी पक्ष नेतेपदाची जबाबदारी सोपवली आहे. सोबत उज्ज्वला मोडक आणि रिटा मकवाना यांची महापालिकेत उपनेतेपदी निवड झाली आहे.

औरंगाबाद शहराचे नाव संभाजीनगर करावे याबाबत पुन्हा वाद उफाळून आला आहे. याबाबत औरंगाबादचे नगरसेवक गेले चार महिने हा ठराव पास करावा यासाठी मागणी करत आहेत, मात्र महापौर याकडे कानाडोळा करत आहेत. अखेर आज भाजपच्या सर्व नगरसेवकांनी या गोष्टीचा निषेध करण्यासाठी पालिकेच्या सभागृहात काळे कपडे घालून प्रवेश केला.

दिल्लीः म्यानमारचे राष्ट्रपती यू विन मायंट आणि फर्स्ट लेडी डाव चो चो हे सध्या भारत दौऱ्यावर आले आहेत. आज त्यांनी राजघाट येथे महात्मा गांधी यांच्या समाधीला अभिवादन केले.