Coronavirus: कोरोनामुळे कॉंग्रेसचे ज्येष्ठ नेते बद्रुद्दीन शेख यांचे निधन; 26 एप्रिल 2020 च्या ताज्या मराठी बातम्या आणि ब्रेकिंग न्यूज LIVE

कॉंग्रेसचे ज्येष्ठ नेते आणि माजी विरोधी पक्षनेते बद्रुद्दीन शेख यांचे कोरोना विषाणूच्या संसर्गामुळे निधन झाले आहे. बद्रुद्दीन शेख यांच्या निधानाने राजकारणात खळबळ निर्माण झाली आहे. एएनआयचे ट्वीट- 

लॉकडाउन दरम्यान स्थलांतरित कामगारांना त्यांच्या मूळ ठिकाणी जाण्याची आवश्यकता नसून त्यांची आणि त्यांच्या कुटुंबियांची काळजी घेतली जाईल असे केंद्र सरकारने सर्वोच्च न्यायालयात स्टेटस रिपोर्टमध्ये सांगितले.

जम्मू-काश्मीरच्या कुलगाम जिल्ह्यातील गुडर भागात भारतीय सैन्य दलाचे जवान, केंद्रीय राखीव पोलिस दल, पोलिस आणि दहशतवाद्यांच्या चकमकीत चार दहशतवादी ठार झाले आहेत. ऑपरेशन अजूनही सुरू आहे.

दिल्लीमध्ये आज दिवसभरात 293 कोरोना रुग्णांची नोंद करण्यात आली. यासह राज्यात कोरोना पॉसिटीव्ह रुग्णांचा आकडा 2918 वर पोहचला असून 54 जणांचा मृत्यू झाला आहे.

चंदीगढ येथे गेल्या काही दिवसांपूर्वी एका महिलेला आणि तिच्या 11 महिन्याच्या बाळाला कोरोनाची लागण होती. या दोघांनीही कोरोनावर मात केली असून त्यांना डिस्चार्ज देण्यात आला आहे. एएनआयचे ट्वीट- 

कोरोना विषाणूचा वाढता प्रादुर्भाव रोखण्यासाठी सरकारकडून योग्य ते निर्णय घेतले जात आहेत. यामुळे मुंबई (Mumbai) शहरातील कोरोनाबाधीत रुग्णांच्या संख्येत घट झाल्याचे दिसत आहे. मुंबईत कोरोनामुळे आतापर्यंत 204 जणांचा मृत्यू झाला आहे. तर आज एकूण 324 कोरोनाचे नवे रुग्ण आढळून आले आहेत. यामुळे कोरोना बाधीतांची संख्या 5 हजार 194 वर पोहचली आहे. एएनआयचे ट्वीट- 

धारावीत आज कोरोनाचे नवे 34 रुग्ण आढळून आल्याने आकडा 275 वर पोहचला आहे. तर 14 जणांचा कोरोनामुळे बळी गेल्याची माहिती मुंबई महापालिकेने दिली आहे.

मध्य प्रदेशात कोरोनाबाधितांचा आकडा 2090 वर पोहचला तर 103 जणांचा मृत्यू  झाला आहे.

अर्णव गोस्वामी यांच्या विरोधात एफआयआर मूळ नागपूरात दाखल करण्यात आले होत. मात्र सुप्रीम कोर्टाने आता हे प्रकरण मुंबईत हस्तांतरित करण्याचे आदेश दिले होते. त्यामुळे उद्या सकाळी 9 वाजता गोस्वामी यांना मुंबईत पोलिसांसमोर हजर रहावे लागणार आहे.

हरियाणा येथे एकूण 296 कोरोनाबाधित रुग्ण असून त्यापैकी 94 अॅक्टिव्ह रुग्ण आहेत.

महाराष्ट्रात आज आणखी  440 कोरोनाबाधित रुग्ण तर 19 जणांचा मृत्यू झाला आहे.

नेपाळ येथे लॉकडाउनचे आदेश येत्या 7 मे पर्यंत कायम राहणार असल्याचा निर्णय जाहीर करण्यात आला आहे.

कोरोनामुळे निधन झालेल्या दोन पोलीस दलातील कर्मचाऱ्यांच्या परिवाराला प्रत्येकी 50 लाखांची मदत करण्यात येणार आहे.त्याचसोबत परिवारातील एका व्यक्तीला सरकारी नोकरी दिली जाणार असल्याचा निर्णय गृहमंत्री अनिल देशमुख यांनी जाहीर केला आहे.

तमिळनाडू येथे आणखी 64 कोरोनाबाधित रुग्ण आढळल्याने आकडा 1885 वर पोहचला आहे.

भारतात कोरोनाबाधितांचा आकडा 26,917 वर पोहचला आहे. त्यापैकी 20177 अॅक्टिव्ह रुग्ण तर 5914 जणांना डिस्चार्ज आणि 826 जणांचा बळी गेल्याची माहिती आरोग्य आणि कुटुंब कल्याण मंत्रालयाने दिली आहे.

यवतमाळ येथे आज आणखी 16 कोरोनाबाधित रुग्ण आढळून आले आहेत. त्यामुळे कोरोनाग्रस्तांचा आकडा 50 वर जाऊन पोहचला आहे.

राज्यातील लॉकडाऊनबाबत त्या-त्या भागातील परिस्थिती पाहून ३ मे नंतर निर्णय घेणार. उद्या पंतप्रधानांसमवेत व्हिडिओ कॉन्फरन्समध्येदेखील यादृष्टीने चर्चा होईल- मुख्यमंत्री उद्धव ठाकरे यांची समाज माध्यमाद्वारे जनतेशी साधलेल्या थेट संवादात माहिती.

मुंबईतील काही पत्रकारांना कोरोना व्हायरस बाधा झाल्याचे पुढे आले. त्यानंतर  महापालिकेने काही पत्रकारांची कोरोना चाचणी केली. यातील 31 पत्रकारांची चाचणी निगेटीव्ह आली. त्यामुळे त्यांना सुट्टी देण्यात आली आहे. मात्र, तरीही या पत्रकारांना काही दिवस होम क्वारंटीन राहण्याचा सल्ला देण्यात आला आहे.

कपिल आणि धीरज वधवन यांना महाबळेश्वर, सातारा येथून सीबीआयने मुंबईला आणले. या दोघांनाही आधी त्यांना ताब्यात घेण्यात आले होते. या महिन्याच्या सुरुवातीस  लॉकडाऊन नियमांचे उल्लंघन करत महाबळेश्वरला वाहनाने  जात असताना त्यांना अटक करण्यात आली होती.

कोरोना व्हायरस संकटाचा महाराष्ट्राला मोठा फटका बसला आहे. मात्र, सत्ताधाऱ्यांमध्ये आणि त्यांच्या घटक पक्षांमध्ये समन्वय नाही, असे विधानसभेतील विरोधी पक्षनेते देवेंद्र फडणवीस यांनी म्हटले आहे.