फेसबुक आणि इंस्टाग्राम यांची सेवा याक्षणी डाऊन; 17 सप्टेंबर 2020 च्या ताज्या मराठी बातम्या आणि ब्रेकिंग न्यूज LIVE

फेसबुक आणि इंस्टाग्राम यांची सेवा याक्षणी डाऊन झाली आहे. वेबसाइट लोड करण्याचा प्रयत्न करताना एक एरर मेसेज दिसत आहे. ही समस्या सोडवण्यासाठी प्रयत्न चालू असल्याचे सांगण्यात आले आहे.

राज्यसभेचे खासदार अशोक गस्ती यांना न्यूमोनिया आणि कोरोना व्हायरसचे निदान झाले होते, 2 सप्टेंंबर पासुन त्यांंच्यावर मणिपाल हॉस्पिटल मध्ये उपचार सुरु होते आज 10:30 वाजता त्यांंचे निधन झाले आहे, ते 55 वर्षांंचे होते.

लडाख मध्ये आजच्या दिवसात कोरोनाचे 41 नवे रुग्ण वाढले असुन 1 मृत्यु झालाआहे, याशिवाय 22 जणांंची आजवर रिकव्हरी झाली आहे.

लोकसभेत ऐतिहासिक कृषी सुधारणा विधेयक मंजूर होणे हा देशातील शेतकरी व कृषी क्षेत्रासाठी महत्वाचा क्षण आहे. या विधेयकावरुन  शेतकर्‍यांना भटकवण्याचा प्रयत्न झाला पण हे विधेयक मध्यस्थ व इतर अडचणींपासून तुम्हाला मुक्त करेल असे मी शेतकर्‍यांंना आश्वासन देतो. एमएसपीआणि सरकारी खरेदीची व्यवस्था कायम राहील. हे विधेयक शेतकर्‍यांंना बळ देईल अशी प्रतिक्रिया पंतप्रधान नरेंद्र मोदी यांंनी दिली आहे.

अंदमान आणि निकोबारमध्ये आज 11 नवीन कोरोना विषाणू रुग्णांची नोंद झाली असून, एकूण संक्रमितांची संख्या 3,604 वर पोहोचली आहे. यामध्ये 52 मृत्यू व 174 सक्रीय रुग्णांचा समावेश आहे.

पंतप्रधान नरेंद्र मोदी उद्या दुपारी 12 वाजता व्हिडिओ कॉन्फरन्सद्वारे ऐतिहासिक कोसी रेल मेगा पूल देशाला समर्पित करतील. पंतप्रधान बिहारच्या हितासाठी प्रवासी सुविधांशी संबंधित इतर रेल्वे प्रकल्पांचे उद्घाटनही करतील, रेल्वे मंत्रालयाने याबाबत माहिती दिली.

महाराष्ट्र राज्यात आज 24,619 कोरोना बाधीत रुग्णांची वाढ झाली व आज नवीन 19,522 कोरोना बाधित रुग्ण बरे झाले आहेत. एकूण 8,12,354 रुग्ण बरे होऊन दवाखान्यातून घरी पाठविण्यात आले आहेत. राज्यात एकूण 3,01,752 ऍक्टिव्ह रुग्ण आहेत. राज्यातील रुग्ण बरे होण्याचे प्रमाण आता 70.90% झाले आहे. राज्यातील एकूण संक्रमितांची संख्या 11,45,840 वर पोहोचली आहे.

महाराष्ट्राची राजधानी मुंबईमध्ये आज कोरोना विषाणूच्या 2,389 रुग्णांची नोंद झाली आहे, यासह एकूण संक्रमितांची संख्या 1,78,275 वर पोहोचली आहे. आज मुंबईमध्ये 1,173 रुग्ण बरे झाले असून, आतापर्यंत 1,36,739 रुग्ण बरे झाले आहेत. सध्या मुंबईमध्ये 32,849 सक्रीय रुग्णांवर उपचार सुरु आहेत. आज शहरामध्ये कोरोनाच्या 43 रुग्णांचा मृत्यू झाला असून, आतापर्यंत एकूण 8,320 रुग्णांचा मृत्यू झाला आहे. बीएमसीने याबाबत माहिती दिली.

मध्य प्रदेशात कोरोनाचे आणखी 2391 नवे रुग्ण आढळून आले असून 33 जणांचा आज बळी गेला आहे.

दिल्लीत कोरोनाचे आणखी 4432 रुग्ण आढळले असून 38 जणांचा आज बळी गेला आहे.

हरियाणा येथे कोरोनाचे आणखी 2457 नवे रुग्ण आढळले असून 24 जणांचा बळी गेला आहे.

मराठा आरक्षणावरील सुप्रीम कोर्टाच्या स्थगिती आदेशाला महाराष्ट्र सरकार आव्हान देईल असे  महाराष्ट्र मंत्री आणि कॉंग्रेस नेते अशोक चव्हाण यांनी म्हटले आहे.

मुंबई पोलिसांकडून नवे नियम शहरात लागू करण्यात आले नसल्याची आदित्य ठाकरे यांची माहिती दिली आहे. त्यामुळे त्रस्त होण्याची काहीच गरज नसल्याचे ही त्यांनी म्हटले आहे.

आँध्र प्रदेशात कोरोनाचे आणखी 8702 रुग्ण आढळले असून 72 जणांचा बळी गेल्या 24 तासात गेला आहे.

मुंबईत 30 सप्टेंबर पर्यंत कलम 144 लागू असणार असल्याचा DCP Operations यांनी निर्देशन दिले आहेत.

केंद्रीय गृहमंत्री अमित शहा यांना AIIMS रुग्णालयातून डिस्चार्ज देण्यात आला आहे.

मोदी सरकारने कांदा निर्यातीवर बंदी घालून शेतकऱ्यांवर सर्जिकल स्ट्राइक केलेय असे राष्ट्रवादी प्रवक्ते महेश तापसे यांनी म्हटले आहे.

कोरोना व्हायरसमुळे टुरिझम इंडस्ट्रीचे 4000 कोटी रुपयांचे नुकसान झाल्याची हिमाचल प्रदेशाचे मुख्यमंत्री जय राम ठाकूर यांनी माहिती दिली आहे.

दिल्ली मेट्रोचे कोरोना व्हायरमुळे बंदच्या काळात तब्बल 1609 कोटी रुपयांचे नुकसान झाले आहे.

पंतप्रधान नरेंद्र मोदी यांचा वाढदिवस साजरा करण्याचा उत्तम मार्ग म्हणजे गरीब, वंचित आणि शोषितांची सेवा करणे असे भाजप अध्यक्ष जेपी नड्डा यांनी म्हटले आहे.