PF Withdrawal: आता पीएफ खात्यातून थेट 75 टक्के रक्कम काढता येणार

कर्मचारी भविष्य निर्वाह निधी संघटनेने (EPFO) आपल्या कोट्यवधी सदस्यांना आर्थिक सुविधा देणारा आणखी एक महत्त्वाचा निर्णय जाहीर केला आहे. या नव्या सुधारणेनुसार सदस्यांना त्यांच्या पीएफ खात्यातील एकूण शिल्लकेच्या 75 टक्क्यांपर्यंत रक्कम काढता येणार आहे, तर उर्वरित 25 टक्के रक्कम निवृत्तीच्या बचतीसाठी खात्यात किमान शिल्लक म्हणून राखीव राहील. आता नव्या नियमानुसार, PF खातेधारकांसाठी EPFO चा मोठा निर्णय, आता फक्त 12 महिन्यांतच काढता येणार पूर्ण पीएफ रक्कम. 

काय आहे EPFO ची नवीन सुधारणा

EPFO च्या मते, ही सुधारणा सदस्यांना अधिक आर्थिक लवचिकता  देण्याच्या उद्देशाने करण्यात आली आहे. आतापर्यंत पीएफ खात्यातून पैसे काढण्यावर विविध मर्यादा होत्या, मात्र आता सदस्यांना विहित किमान शिल्लक राखल्यानंतर त्यांच्या एकूण शिल्लकेच्या 75 टक्क्यांपर्यंत रक्कम काढण्याची मुभा देण्यात आली आहे.

 75 टक्के रकमेत कर्मचाऱ्याचा हिस्सा, नियोक्त्याचा हिस्सा आणि त्यावर जमा झालेले व्याज या सर्वांचा समावेश असेल. म्हणजेच सदस्यांना पूर्वीच्या तुलनेत मोठी रक्कम एकाच वेळी काढता येणार आहे. नक्की वाचा: EPFO वेतन मर्यादा 15 हजारांवरून थेट 25 हजार रुपयांवर, 51 लाख पेक्षा अधिक नव्या कामगारांना मिळणार लाभ . 

25 टक्के रक्कम का राखीव ठेवली जाणार

ईपीएफओने स्पष्ट केले आहे की, सदस्यांची निवृत्तीनंतरची आर्थिक सुरक्षा अबाधित राहावी, यासाठी एकूण शिल्लकेच्या 25 टक्के रक्कम खात्यात कायम ठेवली जाईल. ही रक्कम काढता येणार नाही आणि ती दीर्घकालीन बचत म्हणून जमा राहील. यामुळे सदस्यांना सध्याच्या 8.25 टक्के व्याजदराचा आणि त्यावरील चक्रवाढ व्याजाचा (कंपाउंडिंग) लाभ पुढेही मिळत राहील.

सदस्यांना काय फायदा होणार

ईपीएफओच्या पोस्टनुसार, या निर्णयामुळे सदस्यांना तातडीच्या गरजांसाठी अधिक रोखता (लिक्विडिटी) उपलब्ध होईल, तर दुसरीकडे त्यांची दीर्घकालीन निवृत्ती बचतही सुरक्षित राहील. आजारपण, शिक्षण, विवाह किंवा घरासंबंधी गरजांसाठी पैशांची आवश्यकता असलेल्या सदस्यांना याचा थेट फायदा होणार आहे.

आधीच्या सुधारणांशी संबंध

ईपीएफओने यापूर्वीच सर्व प्रकारच्या पीएफ अ‍ॅडव्हान्ससाठी किमान सदस्यत्व कालावधीची अट १२ महिन्यांपर्यंत कमी केली होती. आता याच मालिकेत ७५ टक्के रक्कम काढण्याची मुभा देणारा हा निर्णय जाहीर करण्यात आला आहे. यापूर्वी १३ वेगवेगळ्या तरतुदी एकत्र करून त्या अत्यावश्यक गरजा, घरासंबंधी गरजा आणि विशेष परिस्थिती अशा तीन गटांत विभागण्यात आल्या होत्या. शिक्षण आणि विवाहासाठी पैसे काढण्याच्या मर्यादेतही वाढ करण्यात आली होती.

सदस्यांनी काय लक्षात ठेवावे

पीएफ रक्कम काढण्यासाठी अर्ज करण्यापूर्वी सदस्यांनी त्यांच्या खात्यातील शिल्लक तपासून घ्यावी, तसेच किती रक्कम काढता येईल याची खातरजमा करावी. उमंग अ‍ॅप किंवा ईपीएफओ सदस्य पोर्टलवरून पासबुक पाहता येते. यासोबतच केवायसी आणि बँक तपशील अद्ययावत असणे आवश्यक आहे, अन्यथा दावा प्रलंबित राहण्याची शक्यता असते.

ईपीएफओच्या या सलग सुधारणांमुळे देशभरातील सात कोटींहून अधिक सदस्यांना त्यांच्या भविष्य निर्वाह निधीचा अधिक सुलभतेने वापर करता येणार आहे.