Gurmeet Ram Rahim Furlough: बलात्कार प्रकरणातील दोषी गुरमीत राम रहीमला निवडणुकीपूर्वी मिळाली 21 दिवसांची रजा

Gurmeet Ram Rahim Furlough: बलात्कार आणि हत्या प्रकरणात शिक्षा भोगत असलेला डेरा सच्चा सौदा प्रमुख गुरमीत राम रहीम (Gurmeet Ram Rahim) याला 21 दिवसांची रजा मिळाली आहे. तो रोहतकच्या सुनारिया कारागृहातून बाहेर पडण्याच्या तयारीत आहे. राम रहीम गुरमीत सिंगला तुरुंगात गेल्यानंतर पहिल्यांदाच फर्लो (Furlough) मिळाला आहे.

याआधी राम रहीमला वेगवेगळ्या कारणांमुळे पॅरोल मिळाला होता, मात्र त्याला पहिल्यांदाच फर्लो मिळाला आहे. तेही 21 दिवस. राम रहीम पहिल्यांदाच सिरसा डेरामध्ये पोहोचणार आहे. राम रहीमला पॅरोल मिळाल्यानंतर सिरसा डेरामध्येही अनुयायी सामील होऊ लागले आहेत. पंजाबमध्ये विधानसभा निवडणुका आहेत, त्यामुळे राम रहीम बाहेर आल्याने चर्चा सुरू झाल्या आहेत. (वाचा -भोपाळच्या खासदार Sadhvi Pragya Singh यांना अश्लील व्हिडिओ व्हॉट्सअॅप कॉल, एफआयआर दाखल)

गुरमीत राम रहीमला 25 ऑगस्ट 2017 रोजी साध्वी बलात्कार प्रकरणी पंचकुला कोर्टात हजर करण्यात आले होते. विशेष सीबीआय न्यायालयाने त्याची सुनारिया तुरुंगात रवानगी केली होती. या प्रकरणी 27 ऑगस्ट रोजी रोहतकच्या सुनारिया तुरुंगात सीबीआय कोर्टाची सुनावणी झाली, ज्यामध्ये राम रहीमला 20 वर्षांची शिक्षा सुनावण्यात आली. पत्रकार हत्या प्रकरणात राम रहीमलाही दोषी ठरवण्यात आले होते. राम रहीम तेव्हापासून तुरुंगात शिक्षा भोगत आहे.

हरियाणाचे तुरुंगमंत्री रणजित सिंह चौटाला यांनी सांगितलं की, कायद्यानुसार प्रत्येक कैद्याला फर्लो मिळण्याचा अधिकार आहे आणि तोच डेरा प्रमुखालाही लागू होतो. 20 फेब्रुवारी रोजी मतदान होणार असलेल्या पंजाब विधानसभा निवडणुकीपूर्वी राम रहीमची सुटका ही एक महत्त्वपूर्ण घटना म्हणून पाहिली जात आहे. सिरसास्थित डेरा सच्चा सौदा प्रमुखाचा पंजाबमधील अनेक विधानसभा जागांवर प्रभाव आहे.

तथापि, हरियाणाचे मुख्यमंत्री मनोहर लाल खट्टर म्हणाले की, गुरमीत राम रहीमला फर्लो मंजूर करण्याचा कोणत्याही निवडणुकीशी काहीही संबंध नाही. बॉलीवूड अभिनेता माही गिल आणि पंजाबी अभिनेता हॉबी धालीवाल यांनी भाजपमध्ये प्रवेश केल्यानंतर खट्टर यांनी पत्रकारांशी संवाद साधला त्यावेळी ते बोलत होते.