MCC NEET-UG Counselling 2026 Schedule Out: 5 ऑगस्टपासून नोंदणी सुरू; पहा प्रत्येक फेरीचं वेळापत्रक

वैद्यकीय समुपदेशन समितीने (MCC) नीट-यूजी २०२६ समुपदेशनाचे (NEET UG Counselling) संपूर्ण वेळापत्रक जाहीर केले असून, एमबीबीएस, बीडीएस आणि बीएससी नर्सिंग अभ्यासक्रमांसाठी अखिल भारतीय कोट्यातील (AIQ) 15 टक्के जागा तसेच डीम्ड विद्यापीठे, केंद्रीय विद्यापीठे, एम्स आणि जिपमरमधील प्रवेश प्रक्रियेला आता सुरुवात होणार आहे. या वेळापत्रकामुळे नीट पात्र विद्यार्थ्यांना प्रवेश प्रक्रियेबाबत स्पष्टता मिळाली आहे.

नोंदणीचे वेळापत्रक

एमसीसीने जाहीर केलेल्या वेळापत्रकानुसार, पहिल्या फेरीची नोंदणी ५ ऑगस्टपासून सुरू होणार असून ती १२ ऑगस्टपर्यंत सुरू राहणार आहे. यापूर्वी, ४ ऑगस्ट रोजी सहभागी संस्था आणि राष्ट्रीय वैद्यकीय आयोगामार्फत (एनएमसी) तात्पुरत्या सीट मॅट्रिक्सची पडताळणी केली जाणार आहे.

नोंदणी प्रक्रिया पूर्णपणे ऑनलाईन स्वरूपात राबवली जाणार असून, विद्यार्थ्यांना नोंदणी शुल्क आणि सुरक्षा ठेव भरून प्रक्रिया पूर्ण करावी लागणार आहे.

चॉइस फिलिंगची प्रक्रिया

नोंदणीनंतर विद्यार्थ्यांना पसंतीच्या महाविद्यालयांची आणि अभ्यासक्रमांची निवड करावी लागणार आहे. चॉइस फिलिंगची प्रक्रिया ६ ऑगस्ट ते १३ ऑगस्ट या कालावधीत पार पडणार आहे. पहिल्या फेरीतील जागावाटपाचा निकाल कधी लागणार, याबाबतही एमसीसीने स्पष्टता दिली आहे. पहिल्या फेरीचा जागावाटप निकाल १७ ऑगस्ट रोजी जाहीर केला जाणार आहे.

प्रवेश आणि रुजू होण्याची प्रक्रिया

जागावाटप झाल्यानंतर विद्यार्थ्यांना संबंधित महाविद्यालयांमध्ये रुजू व्हावे लागणार आहे. पहिल्या फेरीत जागा मिळालेल्या विद्यार्थ्यांना १८ ऑगस्ट ते २२ ऑगस्ट या कालावधीत आवश्यक मूळ कागदपत्रांसह संबंधित संस्थेत रुजू व्हावे लागणार आहे. त्यानंतर, रुजू झालेल्या विद्यार्थ्यांच्या माहितीची पडताळणी राज्य वैद्यकीय शिक्षण संचालनालयाकडून (डीएमई) आणि समुपदेशन प्राधिकरणांकडून पुढील फेरीपूर्वी करण्यात येणार आहे. ही प्रक्रिया राऊंड १, राऊंड २, राऊंड ३ आणि ऑनलाईन स्ट्रे व्हॅकन्सी राऊंड अशा चार टप्प्यांत पार पडणार आहे.

नव्याने लागू झालेले महत्त्वाचे बदल

यंदाच्या समुपदेशन प्रक्रियेत एमसीसीने काही महत्त्वाचे बदल सादर केले आहेत. या बदलांमुळे विद्यार्थ्यांचा अनावश्यक प्रवास कमी होणार असून, अनेक विद्यार्थ्यांसाठी ऑनलाईन कागदपत्र पडताळणीची सुविधा उपलब्ध करून देण्यात आली आहे, तसेच जागा अपग्रेडेशनची प्रक्रियाही अधिक सुटसुटीत करण्यात आली आहे.

विद्यार्थ्यांना जागा अपग्रेडेशनसंदर्भात दोन पर्याय देण्यात आले आहेत. वाटप झालेल्या जागेवर समाधानी असून पुढील फेरीत अपग्रेड होऊ न इच्छिणाऱ्या विद्यार्थ्यांना 'फ्रीझ' हा पर्याय निवडावा लागेल, तर पुढील फेरीत जागा अपग्रेड करू इच्छिणाऱ्या विद्यार्थ्यांना 'फ्लोट' हा पर्याय निवडावा लागेल.

फ्लोट पर्याय निवडणाऱ्या विद्यार्थ्यांना आवश्यक कागदपत्रांच्या स्कॅन प्रती एमसीसी पोर्टलवर अपलोड कराव्या लागतील, तर फ्रीझ पर्याय निवडणाऱ्या विद्यार्थ्यांना मूळ कागदपत्रांसह प्रत्यक्ष महाविद्यालयात जाऊन पडताळणी करावी लागेल.

शैक्षणिक सत्राची सुरुवात कधी?

समुपदेशन प्रक्रिया पूर्ण झाल्यानंतर शैक्षणिक सत्र केव्हा सुरू होणार, याबाबतही वेळापत्रकात नमूद करण्यात आले आहे. पदवीपूर्व वैद्यकीय अभ्यासक्रमांचे शैक्षणिक सत्र ८ सप्टेंबर २०२६ पासून सुरू होणार आहे.

विद्यार्थ्यांसाठी महत्त्वाचा सल्ला

नोंदणी करण्यापूर्वी विद्यार्थ्यांनी एमसीसीने प्रसिद्ध केलेली माहिती पुस्तिका काळजीपूर्वक वाचावी, असा सल्ला देण्यात आला आहे. यंदाच्या सुधारित समुपदेशन प्रक्रियेसंदर्भात संपूर्ण माहिती जाणून घेण्यासाठी विद्यार्थ्यांनी नोंदणीपूर्वी माहिती पुस्तिका नीट वाचावी, असे आवाहन करण्यात आले आहे. राज्य कोट्यातील समुपदेशन प्रक्रिया स्वतंत्रपणे सुरू होणार असल्याने, राज्यस्तरीय समुपदेशनासाठी इच्छुक विद्यार्थ्यांनीही संबंधित राज्याच्या वेळापत्रकाकडे लक्ष ठेवावे.

समुपदेशनासंदर्भातील सविस्तर वेळापत्रक आणि नोंदणीची लिंक एमसीसीच्या अधिकृत संकेतस्थळावर (mcc.nic.in) उपलब्ध करून देण्यात आली आहे.