Sri Lanka: श्रीलंकेत मध्यरात्रीपासून पुन्हा आणीबाणी लागू, राष्ट्रपतींच्या घोषणेनंतर सरकारविरोधातील निदर्शनांवर बंदी

श्रीलंकेचे (Sri Lanka) राष्ट्रपती गोटाबाया राजपक्षे (Gotabaya Rajapaksa) यांनी शुक्रवारी आणीबाणी जाहीर (Emergency imposed) केली. अशा परिस्थितीत देशात सुरू असलेल्या आर्थिक संकटाबाबत सरकारविरोधातील निदर्शनांना तोंड देण्यासाठी सुरक्षा दलांना दुसऱ्यांदा व्यापक अधिकार मिळाले आहेत. आणीबाणीच्या संदर्भात, राष्ट्रपतींच्या प्रवक्त्याने सांगितले की, बिघडलेल्या आर्थिक संकटामुळे अध्यक्ष गोटाबाया राजपक्षे यांच्या राजीनाम्याच्या मागणीसाठी कामगार संघटनांनी शुक्रवारी देशव्यापी संप केला. अशा परिस्थितीत कायदा व सुव्यवस्था राखण्यासाठी मध्यरात्रीनंतर आणीबाणी लागू करण्यात आली आहे. राष्ट्रपतींनी ही घोषणा अशावेळी केली आहे जेव्हा विद्यार्थी कार्यकर्त्यांनी देशाच्या संसदेचा घेराव करण्याची धमकी दिली होती. देशातील आर्थिक संकटाचा सामना करण्यात अपयशी ठरलेल्या सरकारला हटवण्याच्या मागणीसाठी कामगार संघटनांनी देशव्यापी संप सुरू केला आहे.

यापूर्वी, आर्थिक संकटाचा सामना करणाऱ्या श्रीलंकेत मध्यरात्री 12 वाजल्यापासून (7 मे) आणीबाणी जाहीर करण्यात आली होती. राष्ट्रपती गोटाबाया राजपक्षे यांच्या मीडिया विभागाचा हवाला देत श्रीलंकन ​​माध्यमांनी ही माहिती दिली. विशेष म्हणजे श्रीलंकेतील परिस्थिती इतकी बिकट आहे की लोकांना मूलभूत सुविधाही मिळत नाहीत, त्यामुळे आंदोलने सुरू आहेत.

विद्यार्थ्यांनी संसद घेरावाचा दिला होता इशारा

श्रीलंकेतील देशव्यापी संपादरम्यान, विद्यार्थ्यांनी चेतावणी दिली आहे की अध्यक्ष गोटाबाया राजपक्षे यांनी पायउतार न झाल्यास ते संसदेला घेराव घालतील. इंटर युनिव्हर्सिटी स्टुडंट्स फेडरेशनने (IUSF) संसदेकडे जाणारा रस्ता रोखून धरला आहे आणि तिथे आंदोलन सुरूच आहे. विद्यार्थ्यांना पांगवण्यासाठी पोलिसांनी अश्रुधुराच्या नळकांड्या फोडल्या आणि पाण्याच्या तोफांचा वापर केला.

देशव्यापी संप सुरूच ठेवला

यापूर्वी, श्रीलंकेतील आर्थिक संकटाचा सामना करण्यात अपयशी ठरलेल्या राष्ट्रपती आणि सरकारच्या राजीनाम्याच्या मागणीसाठी देशातील कामगार संघटनांनी देशव्यापी संप केला होता. आरोग्य, टपाल, बंदर आणि इतर सरकारी सेवांमध्ये गुंतलेल्या बहुतांश कामगार संघटना या संपात सहभागी झाल्या आहेत. मात्र, सत्ताधारी पक्षाला पाठिंबा देणाऱ्या अनेक कामगार संघटनांचा यात सहभाग नाही. (हे देखील वाचा: दक्षिण आफ्रिकेत महापूर, 400 जणांचा मृत्यू; 40,000 बेघर; राष्ट्रपतींकडून राष्ट्रीय आपत्तीची घोषणा)

अधिक कामगार संघटना संपात सहभागी

श्रीलंकेतील व्यापारी क्रियाकलाप यावेळी ठप्प झाले आहेत आणि जेथे सहसा खूप गर्दी असते तेथेही रस्ते निर्जन आहेत. 'जॉइंट ट्रेड युनियन अॅक्शन ग्रुप'चे रवी कुमुदेश म्हणाले, संपात 2000 हून अधिक कामगार संघटना सहभागी आहेत. तथापि, आपत्कालीन सेवा सुरू आहेत. त्याचवेळी शिक्षक संघटनेच्या महिंदा जयसिंह यांनी सांगितले की, आजच्या संपात शिक्षक आणि शाळेचे मुख्याध्यापकही सहभागी आहेत. खासगी बसचालकही संपात सहभागी झाले होते.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)