New Coronavirus Found In China: जगावर पुन्हा महामारीचं संकट? चीनमध्ये आढळला नवीन कोरोना विषाणू

New Coronavirus Found In China: जगावर ओढावलेलं महामारीचं संकट अजूनही लोक विसरलेले नाहीत. अशातचं आता पुन्हा एकदा हे संकट वर डोकं काढले की, काय? अशी शक्यता वर्तवण्यात येत आहे. होय, कारण आता चीन (China) मध्ये नवा कोरोना विषाणू (New Coronavirus) आढळला आहे. चिनी शास्त्रज्ञांना वटवाघळांमध्ये नवीन कोरोनाव्हायरस आढळला आहे, ज्यामुळे जागतिक पातळीवर घबराट पसरली आहे. पाच वर्षांपूर्वी चीनच्या वुहान शहरातून पसरलेल्या कोरोना विषाणूने लाखो लोकांचे प्राण घेतले. जागतिक आरोग्य संघटनेला (WHO) कोरोना विषाणूला जागतिक साथीचा रोग घोषित करावा लागला.

आता शास्त्रज्ञांनी शोधलेला नवीन विषाणू प्राण्यांपासून मानवांमध्ये देखील पसरू शकतो, ज्यामुळे साथीचा धोका पुन्हा निर्माण होऊ लागला आहे. या नवीन विषाणूवरील अभ्यासाचे नेतृत्व प्रसिद्ध विषाणूशास्त्रज्ञ शी झेंगली यांनी केले आहे. शी यांना बॅटवूमन असेही म्हणतात. शी यांनी वटवाघळांमध्ये आढळणाऱ्या कोरोना विषाणूवर बराच काळ संशोधन केले आहे. हा अभ्यास ग्वांगझू लॅब, ग्वांगझू अकादमी ऑफ सायन्सेस, वुहान विद्यापीठ आणि वुहान इन्स्टिट्यूट ऑफ व्हायरोलॉजीमधील शास्त्रज्ञांच्या सहकार्याने करण्यात आला आहे. (हेही वाचा - Coronavirus Worldwide Update: जगभरात कोरोनाचे 2.38 कोटी रुग्ण, आजवरची रिकव्हर, मृत आणि अ‍ॅक्टिव्ह रुग्णांची सविस्तर आकडेवारी पाहा)

शास्त्रज्ञांच्या मते, अलीकडेच सापडलेला हा विषाणू HKU5 कोरोनाव्हायरसच्या एका नवीन वंशाचा आहे, जो पहिल्यांदा हाँगकाँगमध्ये जपानी पिपिस्ट्रेल वटवाघळांमध्ये ओळखला गेला होता. हा विषाणू मेर्बेकोव्हायरस उपवंशातील आहे, ज्यामध्ये मध्य पूर्व श्वसन सिंड्रोम (MERS) कारणीभूत विषाणू देखील समाविष्ट आहे. चिंताजनक बाब म्हणजे हा नवीन विषाणू मानवांमध्ये संसर्ग पसरवण्यासाठी त्याच मानवी रिसेप्टर (ACE2) चा वापर करतो, जो कोविड-19 ला कारणीभूत असलेल्या SARS-CoV-2 विषाणूद्वारे वापरला जातो. (हेही वाचा -कोरोना व्हायरसचे संकट कधी संपणार? WHO च्या प्रमुखांनी दिले 'हे' उत्तर)

नवीन कोरोना व्हायरस मानवामध्ये पसरू शकतो -

याचा अर्थ असा की हा विषाणू मानवांमध्येही वेगाने पसरू शकतो. या शोधानंतर, कोरोना विषाणूच्या उत्पत्तीबद्दलची चर्चा पुन्हा एकदा तीव्र झाली आहे. अलिकडेच, अमेरिकन गुप्तचर संस्था सीआयएने दावा केला होता की कोविड-19 साथीचा रोग नैसर्गिक नव्हता, तर हा विषाणू प्रयोगशाळेतून बाहेर पडला होता. परंतु, चीन हे सर्व दावे आणि विषाणूची उत्पत्ती नैसर्गिकरित्या झाल्याचा दावा फेटाळत आहे.

नवीन विषाणूमुळे लॉकडाऊन लागणार का?

दरम्यान, चीनमध्ये आढळणाऱ्या या नवीन विषाणूवर शास्त्रज्ञ आणि आरोग्य संस्था लक्ष ठेवून आहेत. हा विषाणू मानवांसाठी किती धोकादायक असू शकतो किंवा नाही हे अद्याप स्पष्ट झालेले नाही, परंतु मानवी रिसेप्टरशी बांधण्याची या विषाणूची क्षमता चिंताजनक आहे. अशा परिस्थितीत, जर संसर्गाचा धोका वाढला तर ते संपूर्ण जगासाठी तसेच चीनसाठी धोक्याचे लक्षण आहे.