अमेरिकेत भारतीय वंशाच्या 17 वर्षीय मुलावर आई, भावाच्या हत्येचा आरोप, ChatGPT वरील शोधामुळे तपासाला दिशा

USA Murder Case:  अमेरिकेत एका भारतीय वंशाने अल्पवयीन मुलाने स्वतःच्या आई आणि भावाचा खून केल्याची धक्कादायक माहिती समोर आली आहे. ही घटना मॅसॅच्युसेट्स राज्यातील अ‍ॅक्टन शहरातील आहे.  भारतीय वंशाच्या १७ वर्षीय मुलावर त्याची ४५ वर्षीय आई आणि १४ वर्षीय भावाच्या हत्येचा आरोप ठेवण्यात आला आहे. मिडलसेक्स जिल्हा वकील मरियन रायन यांनी बुधवारी पत्रकार परिषदेत ही माहिती दिली. या दोघांचे मृतदेह मंगळवारी रात्री त्यांच्या मार्था लेन येथील घरात आढळून आले होते.

घटना कशी उघडकीस आली

आरोपी मुलाच्या वडिलांनी मंगळवारी सायंकाळी साडेसहा वाजण्याच्या सुमारास घरातील कोणाशीही संपर्क होत नसल्याने अ‍ॅक्टन पोलिसांना  वेल-बीइंग चेक फोन केला. त्यादिवशी घरी येणाऱ्या शिकवणी शिक्षकाला घरात प्रवेश मिळाला नव्हता किंवा कोणाशी संपर्क साधता आला नव्हता, ही बाब असामान्य वाटल्याने त्यांनी वडिलांना कळवले होते. पोलीस घटनास्थळी पोहोचले असता, घराच्या पहिल्या मजल्यावर सिद्धार्थचा तर तळघरात आईचा मृतदेह आढळला. दोघांच्याही शरीरावर स्पष्ट जखमांच्या खुणा होत्या.

आरोपी मुलाला कसे घेतले ताब्यात

घटनेनंतर आरोपी मुलगा आणि त्याच्या आईची गाडी दोन्ही सापडत नव्हती, त्यामुळे पोलिसांनी त्याचा शोध सुरू केला. बुधवारी पहाटे वेलँड शहरात आईच्या गाडीत तो आढळला असून त्याला कोणत्याही विरोधाशिवाय ताब्यात घेण्यात आले.

आरोप आणि तपासाची दिशा

आरोपी मुलावर दोन खुनाचे आरोप, कुटुंबातील सदस्यावर हल्ला व मारहाणीचे दोन गुन्हे, सर्वसाधारण हल्ल्याचे दोन गुन्हे, तसेच वाहन विनापरवानगी वापरणे आणि वाहनचोरी असे एकूण अनेक आरोप ठेवण्यात आले आहेत.

तपासात एक महत्त्वाची बाब समोर आली आहे. जिल्हा वकील रायन यांच्या म्हणण्यानुसार, आरोपी मुलाने अलीकडच्या काळात चिंताजनक वर्तन दाखवले होते. त्याने इंटरनेट आणि चॅटजीपीटीचा वापर करून कुटुंबाच्या हत्येसंदर्भात काल्पनिक कथा, पात्रे आणि प्रश्न शोधल्याचे तपासात आढळले. ही माहिती गॉथिक शैलीतील कथांच्या स्वरूपात होती, मात्र त्यातून कुटुंबाला धोका असल्याचे संकेत मिळत असल्याचे अधिकाऱ्यांनी सांगितले.

कुटुंबाची पार्श्वभूमी

आई सुधा वेंकटेसन हिला त्यांच्या पतीने मंगळवारी सकाळी कामावर जाताना शेवटचे पाहिले होते. भाऊ सिद्धार्थ मंगळवारी सकाळी एका मनोरंजन केंद्रात गेला होता आणि दुपारी घरी परतला होता. अ‍ॅक्टन पोलीस प्रमुख डग्लस स्टुर्नियोलो यांनी सांगितले की, गेल्या वर्षी घरातून पळून गेल्याच्या घटनेमुळे आरोपी मुलगा  पोलिसांना आधीच परिचित होता.

जिल्हा वकील रायन यांनी या घटनेचे वर्णन "अकल्पनीय शोकांतिका" असे केले असून, वडिलांसाठी आणि संपूर्ण समुदायासाठी हा अत्यंत कठीण प्रसंग असल्याचे त्यांनी नमूद केले. "आम्ही एका अतिशय गडद आणि प्रदीर्घ प्रक्रियेच्या सुरुवातीला आहोत," असे त्या म्हणाल्या. या प्रकरणाचा पुढील तपास सुरू असून, मृत्यूचे नेमके कारण आणि वेळ निश्चित करण्याचे काम वैद्यकीय तपासणी कार्यालयाकडून सुरू आहे.

(The above story first appeared on LatestLY on Aug 13, 2026 12:03 PM IST. For more news and updates on politics, world, sports, entertainment and lifestyle, log on to our website latestly.com).