Greece Same Sex Marriage: आता ग्रीसमध्येही समलिंगी विवाहाला कायदेशीर मान्यता; ठरला असे करणारा पहिला ऑर्थोडॉक्स ख्रिश्चन देश

Greece Same Sex Marriage: ग्रीस (Greece) हा दक्षिण युरोपमध्ये वसलेला एक छोटासा देश आहे. अलेक्झांडर द ग्रेटचे जन्मस्थान. येथील संसदेने समलैंगिक समुदायासाठी (Gay People) एक ऐतिहासिक निर्णय घेतला आहे, ज्याची जगभरात जोरदार चर्चा होत आहे. हा निर्णय समलिंगी विवाहाबाबत (Same-Sex Marriage) आहे. समलिंगी विवाहाला आता ग्रीसमध्ये कायदेशीर मान्यता मिळाली आहे. असे करणारा तो पहिला बहुसंख्य ऑर्थोडॉक्स ख्रिश्चन देश (Orthodox Christian Country) ठरला. ग्रीसमधील बहुतांश लोकसंख्या ऑर्थोडॉक्स ख्रिश्चन असल्याचे म्हटले जाते. आता इथे संसदेने गुरुवारी समलिंगी विवाहाला कायदेशीर मान्यता देणारा कायदा मंजूर केला.

यावेळी तेथील पंतप्रधानांनी हा ग्रीसमधील मानवाधिकारांचा ऐतिहासिक विजय असल्याचे म्हटले आणि या नवीन कायद्यामुळे समाजातील असमानता दूर होईल, असे सांगितले.

मात्र ग्रीसमध्ये समलिंगी विवाहाला मिळालेली मान्यताही ऐतिहासिक आहे, कारण संसदेत जेव्हा त्यावर चर्चा सुरू झाली तेव्हा येथील शक्तिशाली ऑर्थोडॉक्स चर्च त्याच्या विरोधात उभे राहिले. ग्रीसची राजधानी अथेन्समध्येही ऑर्थोडॉक्स चर्चच्या समर्थकांनी निषेध रॅली काढली. अनेक लोक बॅनर, क्रॉस आणि बायबल घेऊन रस्त्यावर उतरले. ऑर्थोडॉक्स चर्चचे प्रमुख म्हणतात की, या निर्णयामुळे ग्रीसची सामाजिक एकता नष्ट होईल.

अशाप्रकारे चर्चचा तीव्र विरोध असूनही संसदेने समलिंगी जोडप्यांच्या बाजूने निकाल दिला. ग्रीसच्या संसदेत 300 सदस्य आहेत. कायदा करण्यासाठी साध्या बहुमताची आवश्यकता होती. मात्र बहुमत मिळवणे इतके सोपे नव्हते. या विधेयकाला पंतप्रधानांचा पाठिंबा होता पण तो मंजूर करण्यासाठी विरोधी पक्षांच्या पाठिंब्याची गरज होती. अनेक खासदार याच्या विरोधात होते. अखेर दोन दिवसांत 30 तासांहून अधिक चर्चेनंतर 300 जागांच्या संसदेत हे विधेयक मंजूर करण्यात आले.

याच्या बाजूने 176 तर विरोधात 76 मते पडली. एकूण 254 जणांनी मतदान केले. मध्य-डाव्या आणि डाव्या विरोधी पक्षांच्या भक्कम पाठिंब्याने ते वैध ठरविण्यात मदत झाली. दुसरीकडे, देशातील LGBTQ+ समुदायाने या निर्णयाचे स्वागत केले आहे. यामुळे अनेक लोकांचे, विशेषत: अनिश्चिततेत जगणाऱ्या मुलांचे जीवन खूप सोपे होईल. (हेही वाचा: American Citizenship: आर्थिक वर्षे 2023 मध्ये 59,000 हजारांहून अधिक भारतीयांनी घेतले अमेरिकेचे नागरिकत्व- Report)

दरम्यान, समलिंगी विवाहाला कायदेशीर मान्यता देणारा नेदरलँड हा पहिला देश आहे. एप्रिल 2001 पासून तेथे समलिंगी विवाह कायदेशीर आहे. मात्र, डेन्मार्कने 1989 मध्येच समलिंगी जोडप्यांना घरगुती भागीदार म्हणून नोंदणी करण्याची परवानगी दिली होती. पण तिथे त्यावेळी औपचारिक कायदा झाला नाही. डेन्मार्कने 2012 मध्ये हा कायदा बनवला. याशिवाय बेल्जियम, कॅनडा, स्पेन, दक्षिण आफ्रिका, नॉर्वे, स्वीडन, आइसलँड, पोर्तुगाल, अर्जेंटिना, ब्राझील, इंग्लंड, वेल्स, कोस्टा रिका, तैवान या देशांचा समावेश आहे.