Coronavirus Strain in Lab: बोस्टन विद्यापीठाच्या शास्त्रज्ञांनी प्रयोगशाळेत तयार केला नवीन Covid-19 स्ट्रेन; 80 टक्के मृत्युदर- Report
असे सांगितले जात आहे की, कोरोना विषाणूचा प्रसार सर्वप्रथम चीनमधील वुहान शहरातून झाला. माहितीनुसार ज्या मार्केटमधून हा विषाणू बाहेर पडल्याचे सांगितले जात आहे तो बाजार एका सिक्युरिटी व्हायरोलॉजी लॅबपासून 12 किलोमीटर अंतरावर आहे.
गेल्या अडीच वर्षांमध्ये जगाने कोरोना विषाणू (Coronavirus) नावाची एक गंभीर महामारी पाहिली. या विषाणूमुळे लाखो लोकांचा मृत्यू झाला व अजूनही या विषाणूचा कहर थांबलेला नाही. कोविडची नक्की व्युत्पत्ती कशी व कुठे झाली याबाबत अजूनही संशोधक अनभिज्ञ आहेत. त्यात आता बोस्टन युनिव्हर्सिटीच्या (Boston University) शास्त्रज्ञांनी प्रयोगशाळेत एक नवीन कोविड-19 स्ट्रेन विकसित केला आहे. शास्त्रज्ञांनी या स्ट्रेनचा वापर उंदरांवर केला आणि यामुळे सुमारे 80 टक्के उंदीर मरण पावले.
न्यूयॉर्क पोस्टने विद्यापीठाचा हवाला देत म्हटले आहे की, 80 टक्के उंदरांचा ओमिक्रॉन आणि वुहानमधील मूळ विषाणूच्या मिश्रणातून बनवलेल्या स्ट्रेनचा संसर्ग झाल्यामुळे मृत्यू झाला. जेव्हा उंदीर केवळ ओमिक्रॉनच्या संपर्कात आले तेव्हा त्यांच्यामध्ये फक्त सौम्य लक्षणे दिसून आली. फ्लोरिडा आणि बोस्टन येथील शास्त्रज्ञांच्या चमूने ओमिक्रॉनमधून स्पाइक प्रोटीन काढले आणि ते चीनच्या वुहानमधील महामारीच्या सुरुवातीला आढळलेल्या स्ट्रेनमध्ये मिसळले.
या संकरित जातीच्या स्ट्रेनचा परिणाम उंदरांमध्ये दिसून आला. नवीन स्ट्रेनमध्ये ओमिक्रॉन प्रकारापेक्षा पाचपट जास्त संसर्गजन्य विषाणू कण आहेत, असे त्यांनी एका संशोधन पत्रात म्हटले आहे. अशाप्रकारे अमेरिकेतील संशोधकांच्या या प्रयोगाने जगाची चिंता वाढवली आहे. या नवीन स्ट्रेनच्या संसर्गानंतर मृत्यूचे प्रमाण 80 टक्के असल्याने, हा प्रकार इतर सर्व प्रकारापेक्षा धोकादायक असल्याचे मानले जात आहे. अशा परिस्थितीत, या व्हायरसमुळे पुन्हा महामारी डोके वर काढू शकते अशी भीती व्यक्त केली जात आहे. (हेही वाचा: Omicron New Variants: देशात दिवाळीनंतर येऊ शकते कोरोनाची नवी लाट; XBB व BF.7 व्हेरियंट्सनी वाढवली चिंता)
दरम्यान, असे सांगितले जात आहे की, कोरोना विषाणूचा प्रसार सर्वप्रथम चीनमधील वुहान शहरातून झाला. माहितीनुसार ज्या मार्केटमधून हा विषाणू बाहेर पडल्याचे सांगितले जात आहे तो बाजार एका सिक्युरिटी व्हायरोलॉजी लॅबपासून 12 किलोमीटर अंतरावर आहे. अशा परिस्थितीत, अनेक सिद्धांतांनुसार, याच लॅबमधून भयानक कोविड -19 विषाणू लीक झाल्याचे अनेक लोकांचे मानणे आहे.
(The above story first appeared on LatestLY on Oct 19, 2022 05:58 PM IST. For more news and updates on politics, world, sports, entertainment and lifestyle, log on to our website latestly.com).
