ICC Cricket World Cup 2023: विश्वचषक सामन्यांबाबत पाकिस्तानचे नखरे कमी नाही, अफगाणिस्तानला घाबरत आयसीसीसमोर ठेवली 'ही' मागणी

ऑक्टोबर-नोव्हेंबरमध्ये या वर्षी एकदिवसीय विश्वचषक (ODI World Cup 2023) भारतात खेळवला जाणार आहे. मात्र, या विश्वचषकाचे वेळापत्रक अद्याप आलेले नाही. बीसीसीआयने (BCCI) प्रस्तावित वेळापत्रक तयार करून सामन्यांची ठिकाणे निश्चित केली असली, तरी या प्रस्तावित वेळापत्रकावर पाकिस्तानचा (Pakistan) आक्षेप असून काही स्थळांमध्ये बदल करण्याची त्यांची इच्छा आहे. पाकिस्तानने आपल्या देशाचे सरकार संघाला परवानगी देईल तेव्हाच विश्वचषक खेळण्यासाठी भारतात येईल, असे स्पष्टपणे सांगितले आहे, परंतु त्याच वेळी ते स्वतःच्या इच्छेनुसार स्थळ निवडण्याचा प्रयत्न करत आहे. क्रिकेट पाकिस्तानच्या अहवालानुसार, पाकिस्तानला अफगाणिस्तानविरुद्ध चेन्नईमध्ये आणि ऑस्ट्रेलियाविरुद्ध बंगळुरूमध्ये सामने खेळायचे आहेत. त्याचवेळी अहमदाबादच्या नरेंद्र मोदी स्टेडियमवर भारत आणि पाकिस्तान यांच्यातील सामना होणार असल्याची चर्चा आहे.

पाकिस्तानला अफगाणिस्तानची भीती!

रिपोर्टनुसार, पाकिस्तानला चेन्नई आणि बेंगळुरूमध्ये खेळले जाणारे सामने बदलायचे आहेत. म्हणजेच अफगाणिस्तानविरुद्धचा सामना जो चेन्नईला होणार आहे तो बंगळुरूला हलवावा आणि ऑस्ट्रेलियाविरुद्धचा सामना जो बंगळुरूला होणार आहे तो चेन्नईत खेळवला जावा. पाकिस्तानला हे हवे आहे कारण चेन्नईची विकेट संथ आणि फिरकीपटू अनुकूल आहे आणि अफगाणिस्तानकडे उत्कृष्ट फिरकीपटू आहेत. या संघात राशिद खान आणि नूर अहमदसारखे फिरकीपटू आहेत जे फिरकीपटूंच्या उपयुक्त खेळपट्टीवर कोणत्याही संघाला अडचणीत आणू शकतात. त्यामुळे अफगाणिस्तानविरुद्धचा सामना बेंगळुरूमध्ये व्हावा, अशी पाकिस्तानची इच्छा आहे. चेन्नईच्या संथ विकेटवर अफगाणिस्तानने त्याला हरवले तर त्याच्या प्रतिष्ठेला तडा जाईल आणि विश्वचषक जिंकण्याच्या त्याच्या मोहिमेलाही धक्का बसू शकतो, अशी भीती त्याच्या मनात कुठेतरी आहे.

अहवालात असा दावाही करण्यात आला आहे की पीसीबीच्या काही अधिकाऱ्यांना असे वाटते की भारताने मुद्दाम अशा ठिकाणी सामने नियोजित केले आहेत जेथे पाकिस्तानला खेळपट्टीची परिस्थिती, सराव सुविधा आणि प्रवास व्यवस्थेमध्ये अडचणी येऊ शकतात. दरम्यान, आंतरराष्ट्रीय क्रिकेट परिषद (ICC) भारत विरुद्ध पाकिस्तान विश्वचषक सामना अहमदाबाद येथे आयोजित करण्यासाठी जोर देत आहे. (हे देखील वाचा: World Cup Qualifiers 2023: आजपासून सुरू होणार विश्वचषक पात्रता फेरीचा थरार, 2 जागांसाठी 10 संघ लढतील)

असे प्रस्तावित वेळापत्रक

बीसीसीआयने केलेल्या प्रस्तावित वेळापत्रकानुसार भारत आणि पाकिस्तान यांच्यातील सामना 15 ऑक्टोबर रोजी अहमदाबादच्या नरेंद्र मोदी स्टेडियमवर होऊ शकतो. हे जगातील सर्वात मोठे क्रिकेट स्टेडियम आहे ज्यामध्ये 1 लाख 32 हजार प्रेक्षक बसू शकतात. संपूर्ण जगाच्या नजरा भारत-पाकिस्तान सामन्यावर लागल्या असून एवढ्या मोठ्या स्टेडियममध्ये हा सामना होणे बीसीसीआयसाठीही आर्थिकदृष्ट्या फायदेशीर ठरणार आहे. बीसीसीआयने वेळापत्रकाचा मसुदा आयसीसीला तसेच विश्वचषकातील इतर सहभागी देशांना पाठवला आहे.