PAK vs Omam: दुबईमध्ये पाकिस्तानचा रेकॉर्ड खराब; ओमानविरुद्धच्या पहिल्या सामन्याआधी वाढली चिंता
आशिया कप २०२५ मध्ये पाकिस्तान आपला पहिला सामना ओमान विरुद्ध खेळणार आहे. मात्र दुबईच्या मैदानावरील त्यांचा मागील ५ सामन्यांचा रेकॉर्ड खूपच खराब आहे. या सामन्याद्वारे पाकिस्तान हा रेकॉर्ड बदलू शकेल का? वाचा सविस्तर.
PAK vs Oman Asia Cup 2025: आशिया कप २०२५ मध्ये पाकिस्तानचा संघ १२ सप्टेंबर रोजी ग्रुप-ए मधील आपला पहिला सामना ओमानविरुद्ध खेळणार आहे. या स्पर्धेत पाकिस्तानची कमान सलमान अली आगा सांभाळणार आहे, ज्यांच्यासमोर एक मोठे आव्हान असणार आहे. आशिया कपपूर्वी पाकिस्तानने यूएईमध्ये एक ट्राय सिरीज खेळली होती आणि शारजाहच्या मैदानावर त्यांनी ती ट्रॉफी जिंकण्यात यश मिळवले होते. मात्र, आता त्यांना दुबईच्या मैदानावर आपला पहिला सामना खेळायचा आहे, जिथे त्यांचा मागील ५ सामन्यांचा रेकॉर्ड खूपच निराशाजनक आहे.
दुबईत पाकिस्तानला मागील ४ सामन्यांमध्ये पराभवाचा सामना
दुबई आंतरराष्ट्रीय स्टेडियमवर टी-२० आंतरराष्ट्रीय सामन्यांमध्ये पाकिस्तानचा एकूण रेकॉर्ड पाहिल्यास, त्यांनी येथे आतापर्यंत ३२ सामने खेळले आहेत, त्यापैकी १८ जिंकले आहेत आणि १४ मध्ये त्यांना पराभव पत्करावा लागला आहे. पण, मागील ५ सामन्यांचा विचार केल्यास, त्यांना ४ मध्ये पराभव झाला असून, फक्त एकाच सामन्यात विजय मिळाला आहे. हा एकमेव विजय त्यांना २०२२ मध्ये आशिया कपमध्ये भारताविरुद्ध मिळाला होता. या चार पराभवांमध्ये त्यांना प्रत्येकी एकदा ऑस्ट्रेलिया आणि भारताविरुद्ध आणि दोन वेळा श्रीलंकेकडून पराभूत व्हावे लागले होते.
पहिल्यांदाच ओमानच्या संघाविरुद्ध खेळणार
टी-२० आंतरराष्ट्रीय क्रिकेटमध्ये पाकिस्तानचा संघ पहिल्यांदाच ओमानविरुद्ध खेळणार आहे. त्यामुळे ते या सामन्याला अजिबात हलके घेणार नाहीत. २० २४ च्या टी-२० विश्वचषकात अमेरिकेविरुद्ध पराभव पत्करावा लागल्यानंतर पाकिस्तान संघाला बरीच टीका सहन करावी लागली होती. याच सामन्याद्वारे पाकिस्तानचा संघ १४ सप्टेंबर रोजी दुबईमध्येच भारतासोबत होणाऱ्या दुसऱ्या सामन्याची तयारीही करू इच्छितो.