Nikki Haley on Pakistan: 'पाकिस्तान देतो दहशतवादाला थारा, राष्ट्रपती झाले तर बंद करणार शत्रू देशांना मिळणारा निधी'- निक्की हेली (Watch)

अमेरिकेच्या रिपब्लिकन पक्षाच्या अध्यक्षपदाच्या उमेदवार निक्की हेली यांनी पाकिस्तानबाबत मोठे वक्तव्य केले आहे. अमेरिकेतील 2024 च्या राष्ट्राध्यक्षपदाच्या निवडणुकीत रिपब्लिकन पक्षाकडून उमेदवार असलेल्या भारतीय वंशाच्या निक्की हेली म्हणाल्या- जर मी अध्यक्ष झाले तर आम्ही पाकिस्तान आणि चीनसारख्या देशांना निधी देणार नाही. निक्की हेली यांनी मंगळवारी सांगितले की, अमेरिकेने चीनला दिलेली मदत कमी केली पाहिजे. हेली म्हणाल्या, 'पाकिस्तान अमेरिकेकडून अब्जावधी डॉलर्सच्या मदतीला पात्र नाही, तो अमेरिका आणि भारतासारख्या त्याच्या मित्र राष्ट्रांविरुद्ध दहशतवादाला आश्रय देतो. अमेरिकन सैनिकांना मारणाऱ्या दहशतवाद्यांना पाकिस्तान पाठिंबा देतो. पाकिस्तानमध्ये 12 हून अधिक दहशतवादी संघटना आहेत. तिथले सरकार चीनला पाठिंबा देते.

सत्तेवर आल्यास अमेरिकेचा द्वेष करणार्‍या देशांना मिळणारी परकीय मदत पूर्णपणे कमी करेन, असे हेली यांनी सांगितले होते. यामध्ये चीन, पाकिस्तान आणि इतर शत्रू देशांचा समावेश आहे. हेली यांच्या म्हणण्यानुसार, अमेरिकेने गेल्या वर्षी 46 अब्ज डॉलरची परदेशी मदत खर्च केली, जी इतर कोणत्याही देशापेक्षा कितीतरी जास्त आहे. शत्रूंना मदत म्हणून पाठवण्यात येणारा निधी मी पूर्णपणे थांबवणार असल्याचे त्यांनी सांगितले.