Watch: क्रिकेटर Ishan Kishan चा MS Dhoni च्या सहीवर आपला ऑटोग्राफ देण्यास नकार; म्हणाला- 'अजून मी त्या लेव्हलला पोहोचलो नाही' (Video)

टीम इंडियाचा धडाकेबाज फलंदाज इशान किशन क्रिकेटच्या मैदानावर रोज नवनवे रेकॉर्ड बनवत आहे, आधी त्याने भारतीय संघाकडून खेळताना धावांचा डोंगर रचला आणि त्यानंतर किशनने रणजी ट्रॉफीमध्ये अप्रतिम फलंदाजी केली. दरम्यान, इशानचा एक व्हिडिओ सोशल मीडियावर मोठ्या प्रमाणात व्हायरल होत आहे. पत्रकार विमल कुमार यांनी इशान किशनचा एक व्हिडिओ शेअर केला आहे.

व्हिडिओमध्ये एक चाहता त्याच्या मोबाईलवर ईशानचा ऑटोग्राफ घेण्याचा प्रयत्न करत आहे. परंतु त्या चाहत्याच्या मोबाईलवर एमएस धोनीचा ऑटोग्राफ आधीच होता. तो ऑटोग्राफ पाहून ईशान त्याच्यावर ऑटोग्राफ देण्यास मनाई करतो. तो म्हणतो, 'मी अजून एवढा मोठा झालो नाही की माही भाईच्या ऑटोग्राफवर मी माझा ऑटोग्राफ द्यावा.' तो पुढे म्हणतो, 'याच्यावर आधीच माही भाईचा ऑटोग्राफ आहे तिथे मी माझा ऑटोग्राफ देणार नाही.' इशानच्या या वाक्यांनी त्याने सगळ्यांची मनं जिंकली आहेत. इशान किशन सध्या त्याच्या झारखंड संघासाठी रणजी ट्रॉफी खेळण्यात व्यस्त आहे.