Shravan 2023: महाराष्ट्रात नीज श्रावणाला सुरूवात; त्र्यंबकेश्वर मंदिरामध्ये भाविकांना पहाटे 5 पासून मिळणार दर्शन
18 जुलै ते 16 ऑगस्ट दरम्यान अधिक महिन्याचा श्रावण आहे. तर 17 ऑगस्ट पासून निज श्रावण सुरू होणार आहे. तो 15 सप्टेंबर पर्यंत असणार आहे.
महाराष्ट्रामध्ये अधिक महिन्याच्या श्रावणानंतर आता आज 17 ऑगस्ट पासून नीज श्रावण मासारंभ झाला आहे. श्रावणात देवधर्माला विशेष महत्त्व आहे. 12 ज्योतिर्लिंगांपैकी एक असलेल्या नाशिकच्या त्र्यंबकेश्वर मंदिरामध्येही मोठी गर्दी उसळते. यानिमित्तानेच व्हीआयपी दर्शन बंद केल्यानंतर आता त्र्यंबकेश्वराच्या मंदिरामध्ये दर्शनाच्या वेळेतही बदल करण्यात आले आहे. आता मंदिर पहाटे 5 वाजता सुरू केले जाणार आहे. तर श्रावणी सोमवारी हेच मंदिर पहाटे 4 वाजल्यापासून भाविकांच्या सेवेमध्ये असणार आहे. यामुळे अधिकाधिक भाविकांना दर्शन घेणं सोप्प होणार आहे.
श्रावणात नाशिक मध्ये त्र्यंबकेश्वराचं मंदिर पहाटे 5 ते रात्री 9 वाजेपर्यंत खुले असणार आहे. तर श्रावणी सोमवारी ही वेळ पहाटे 4 ते रात्री 9 अशी करण्यात आली आहे. गावकऱ्यांना मंदिर उघडल्यानंतर सकाळी 10:30 पर्यंत तर संध्याकाळी 6 ते 8 पर्यंत दर्शन घेता येणार आहे. Shravan Month 2023 in Maharashtra: यंदा 59 दिवसांचा श्रावण मास; जाणून घ्या श्रावण आणि अधिक श्रावण मासाच्या महाराष्ट्रातील तारखा काय?
श्रावणासाठी त्र्यंबकेश्वर मंदिरामध्ये कोणती खास सोय असेल?
- गावकर्यांना उत्तर महाद्वारा मधून प्रवेश दिला जाणार आहे. पण त्यासाठी त्यांच्याकडे रहिवासी पुरावा असणं आवश्यक आहे.
- भाविकांच्या सोयीसाठी वातानुकुलित दर्शन बारीची सोय आहे.
- ज्येष्ठ नागरिक यांना खास बसण्यासाठी व्यवस्था आहे. स्तनदा मातांसाठी हिरकणी कक्ष उभारण्यात आलेला आहे.
- स्वच्छ पिण्याच्या पाण्याची सोय करण्यात आलेली आहे. तसेच प्राथमिक आरोग्य कक्ष उभारलेले आहेत.
यंदा श्रावण मास हा अधिक मास म्हणून आला असल्याने तब्बल 59 दिवस हा महिना असणार आहे. यामधील अधिक महिना आता संपला असून नीज श्रावण सुरू झाला आहे. यामध्ये श्रावणी सोमवारी शिवभक्त शंकराच्या मंदिरात जाऊन खास बेल, दुग्ध अभिषेकासोबत शिवमूठ देखील अर्पण करतात.
(The above story first appeared on LatestLY on Aug 17, 2023 12:13 PM IST. For more news and updates on politics, world, sports, entertainment and lifestyle, log on to our website latestly.com).
