Road Safety: रस्ते सुरक्षितता वाढवण्यासाठी परिवहन विभागाने कंबर कसली; खाजगी बसेसची होणार कडक तपासणी, दैनंदिन लॉगबुक ठेवणे बंधनकारक
एका अधिकाऱ्याने सांगितले की, ‘सर्व संबंधित अधिकार्‍यांना दिलेल्या सूचनांनुसार खाजगी बसेसची तपासणी करण्याचे निर्देश देण्यात आले आहेत आणि मोटार वाहन कायदा आणि त्याच्या नियमांचे उल्लंघन केल्याबद्दल दोषी आढळलेल्या कोणत्याही वाहनांवर आवश्यक कारवाई करण्याचे निर्देश दिले आहेत.'
नुकत्याच झालेल्या खासगी बसेसच्या (Private Buses) अपघाताच्या पार्श्वभूमीवर राज्य परिवहन विभागाने (State Transport Department) सर्व प्रादेशिक परिवहन अधिकारी आणि उपप्रादेशिक परिवहन अधिकाऱ्यांना खाजगी प्रवासी बसेसची कसून तपासणी करण्याच्या सक्त सूचना दिल्या आहेत. या तपासण्यांचा फोकस खासगी वाहनांच्या ऑपरेशनला नियंत्रित करणाऱ्या परवाना अटी आणि नियमांचे पालन सुनिश्चित करणे आहे.
सर्व प्रादेशिक परिवहन प्राधिकरणांना संबोधित केलेल्या पत्रानुसार, खाजगी बसेसच्या परमिटधारकांना दैनंदिन लॉगबुक ठेवणे बंधनकारक आहे. या लॉगबुकमध्ये परमिट धारकाचे नाव आणि पत्ता, वाहन नोंदणी चिन्ह, ड्रायव्हरची माहिती, निर्गमन आणि आगमनाच्या वेळा तसेच प्रत्येक प्रवासाची सुरुवात आणि गंतव्य स्थान यासारख्या आवश्यक तपशीलांचा समावेश असणे आवश्यक आहे.
याशिवाय, लॉगबुकमध्ये प्रवास केलेले अंतर, गाडी भाड्याने घेणार्‍याचे नाव आणि पत्ता आणि ड्रायव्हरचा पगार नोंदविला गेला पाहिजे. हे ऑपरेशनल रेकॉर्ड चार वर्षांच्या कालावधीसाठी जतन केले जावे आणि मोटार वाहनाच्या अधिकार्‍यांनी विनंती केल्यावर तपासणीसाठी उपलब्ध करून दिले गेले पाहिजे. विशेष म्हणजे, मोटार वाहन कायद्याचे पालन करण्यासाठी ड्रायव्हरच्या ड्युटी तासांचे निरीक्षण करणे आणि दैनंदिन कर्तव्यात सामील होण्यापूर्वी पुरेशी विश्रांती सुनिश्चित करणे यावर जोर देण्यात आला आहे.
एका अधिकाऱ्याने सांगितले की, ‘सर्व संबंधित अधिकार्‍यांना दिलेल्या सूचनांनुसार खाजगी बसेसची तपासणी करण्याचे निर्देश देण्यात आले आहेत आणि मोटार वाहन कायदा आणि त्याच्या नियमांचे उल्लंघन केल्याबद्दल दोषी आढळलेल्या कोणत्याही वाहनांवर आवश्यक कारवाई करण्याचे निर्देश दिले आहेत. तपासणी दरम्यान केलेल्या कारवाईचा अहवाल परिवहन उपायुक्तांकडे पुढील मूल्यमापनासाठी द्यावा लागेल.’ (हेही वाचा: Pune Bus Accident: अतिवेगाने येणाऱ्या पीएमपीएमपीएल दोन बसची धडक, चालकासह 29 प्रवाशी जखमेत)
दरम्यान, याधी राज्य परिवहन विभागाने खासगी बसचालकांविरुद्ध राबविलेल्या विशेष मोहिमेत संपूर्ण महाराष्ट्रात 4,277 बस नियमांचे उल्लंघन करताना आढळून आल्या. यापैकी 514 बसेस योग्य अग्निशमन यंत्रणेशिवाय धावत असल्याचे आढळून आले आणि 890 चालक योग्य परवान्याशिवाय वाहन चालवताना किंवा परवान्यांच्या अटींचे उल्लंघन करताना आढळून आले. एकूण 183 लाख रुपयांचा दंड या गुन्हेगारांवर लावण्यात आला.