Pune Wrestler Death: कुमार महाराष्ट्र केसरी विजेता पैलवान विक्रम पारखीचा मृत्यू; जिममध्ये व्यायाम करताना आला हृदयविकाराचा झटका

गेल्या काही महिन्यांमध्ये देशातील तरुणांच्या हृदयविकाराच्या आरोग्याबाबत चिंता वाढत आहे. मुख्यत्वे जिममध्ये वर्कआउट करताना अनेक तरुणांचा हृदयविकाराच्या झटक्याने मृत्यू झाला आहे. आता पुण्यातूनही (Pune) अशीच एक घटना समोर आली आहे. पुण्यातील 30 वर्षीय कुस्तीपटूचा जिममध्ये व्यायाम करताना हृदयविकाराच्या झटक्याने दुःखद मृत्यू झाला. या घटनेने कुस्तीगीर समाज हादरला आहे. मयत पैलवान विक्रम पारखी (Vikram Parkhi) हे कुस्ती विश्वातील नावाजलेले व्यक्तिमत्व होते.

तो मुळशी तालुक्यातील माण येथील रहिवाशी असून, बुधवारी सकाळी व्यायामासाठी माण येथील जिममध्ये गेला होता. व्यायाम करत असताना त्याला अस्वस्थ वाटू लागले. त्यानंतर त्याला तातडीने पिंपरी चिंचवड येथील रुग्णालयात दाखल करण्यात आले. दुर्दैवाने, उपचारापूर्वीच त्याचे निधन झाले. महत्वाचे म्हणजे येत्या 12 डिसेंबरला विक्रमचे लग्न होणार होते.

विक्रम पारखी याने कुस्तीमधील कामगिरीसाठी लक्षणीय ओळख मिळवली होती. त्याने प्रतिष्ठित कुमार महाराष्ट्र केसरी खिताब जिंकून मुळशीला एक वेगळाच सन्मान मिळवून दिला होता. यासह त्याने अनेक राष्ट्रीय आणि आंतरराष्ट्रीय कुस्ती स्पर्धांमध्ये प्रदेशाचे प्रतिनिधित्व केले होते, जिथे त्याने पदके आणि प्रशंसा मिळवली होती. खेळातील त्याचे योगदान अत्यंत आदरणीय होते. विक्रमने अनेक चॅम्पियनशिप आणि सन्माननीय गदा जिंकल्या होत्या. त्याच्या अकाली निधनाने माण गावावर शोककळा पसरली आहे.

विक्रम हा माजी सैनिक शिवाजीराव पारखी यांचा पुत्र व युवा नेते बाबासाहेब पारखी यांचा बंधू होता. अलिकडच्या काही महिन्यांत पुण्यातील कुस्तीपटूचा हा दुसरा मृत्यू आहे. गतवर्षी मार्च महिन्यात पुण्यातील मारुंजी येथील मामासाहेब मोहळ कुस्ती संकुलात कुस्तीपटू स्वप्नील पाडळे याचा व्यायामानंतर हृदयविकाराच्या झटक्याने मृत्यू झाला होता. त्याला रुग्णालयात नेण्यात आले, मात्र तेथे त्याला मृत घोषित करण्यात आले. (हेही वाचा: Kurla Tragedy: कुर्ल्यातील एसटी डेपोमध्ये बांधकामासाठी खोदलेल्या खड्ड्यात पडून 7 वर्षांच्या मुलाचा मृत्यू)

पाडळे हे कुस्ती क्षेत्रातील एक प्रमुख व्यक्तिमत्व होते आणि त्याला 'महाराष्ट्र चॅम्पियन' ही पदवी मिळाली होती. दरम्यान, महाराष्ट्रातील कुस्तीचे वाढते हब बनलेल्या पुण्यात या दुःखद घटनांनंतर कुस्तीगीर समुदायावर शोककळा पसरली आहे. कोल्हापूरसह पुणे शहर हे कुस्ती शौकिनांचे फार पूर्वीपासून एक महत्वाचे केंद्र राहिले आहे.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)