Nagpur Bank Robbery Video: नागपुरात बँक कर्मचाऱ्यांवर तिखट पावडर फेकून लूट, आरोपीला अवघ्या काही मिनिटांत अटक

नागपूर पोलिसांनी (Nagpur Police) गुरुवारी, 10 सप्टेंबर रोजी सायंकाळी भांडे प्लॉट परिसरात सरकारी बँकेच्या कर्मचाऱ्यांवर तिखट पावडर फेकून 4 लाख 53 हजार रुपये लुटण्याचा प्रयत्न करणाऱ्या 28 वर्षीय आरोपीला अटक केली. या घटनेचा एक व्हिडिओही सोशल मीडीयावर व्हायरल झाला असून, त्यात आरोपी बँक कर्मचाऱ्यांच्या चेहऱ्यावर तिखट पावडर फेकताना दिसत आहे.

घटना नेमकी कशी घडली?

नागपूर मधील ही घटना सायंकाळी साडेपाच वाजण्याच्या सुमारास घडली. बँकेचे अधिकारी आणि कर्मचारी एटीएममधून रोकड काढून शाखेकडे परत येत असताना एका अनोळखी व्यक्तीने त्यांच्यावर मागून हल्ला केला. आरोपीने कर्मचाऱ्यांच्या चेहऱ्यावर तिखट पावडर फेकली आणि रोकड असलेली बॅग हिसकावून पळ काढण्याचा प्रयत्न केला.

कर्मचाऱ्यांचा पाठलाग आणि तात्काळ अटक

घटना घडताच बँक कर्मचाऱ्यांनी तात्काळ आरडाओरडा करत आरोपीचा पाठलाग सुरू केला. त्याचवेळी नियमित गस्तीवर असलेले बीट मार्शल आणि डिटेक्शन ऑफ क्राईम (डीबी) पथकातील कर्मचाऱ्यांनी ही गडबड पाहून आरोपीचा पाठलाग केला आणि त्याला घटनास्थळीच लुटलेल्या संपूर्ण रोकडेसह पकडले. आरोपीची ओळख सूरज बोरकर असे झाली असून, तो नागपूर ग्रामीण भागातील भिवापूर तालुक्यातील तातोली येथील रहिवासी आहे.

पोलीस कारवाई

पोलिसांच्या या कारवाईत हवालदार शैलेश बेलेकर, राजेंद्र मोहाड, तपुलाल चुटे आणि शरदसिंग तेंभरे यांचा समावेश असलेल्या पथकाने महत्त्वाची भूमिका बजावली. सक्करदरा पोलीस ठाण्याचे वरिष्ठ पोलीस निरीक्षक रमेश एन. खुणे यांनी या प्रकरणाची औपचारिक नोंद केली असून, पुढील तपास सुरू आहे.