WhatsApp वर मेसेज करा, शिवनेरी बसचं तिकीट घरबसल्या मिळवा; MSRTC ची नवी सुविधा
एसटी महामंडळाने दादर-पुणे-दादर शिवनेरी वातानुकूलित बससेवेसाठी WhatsApp द्वारे तिकीट बुकिंगची सुविधा प्रायोगिक तत्त्वावर सुरू केली आहे. प्रवाशांना केवळ एका मेसेजद्वारे आसन आरक्षित करता येणार असून, प्रतिसाद चांगला मिळाल्यास ही सेवा कायमस्वरूपी व इतर मार्गांवरही सुरू करण्याचा विचार महामंडळ करत आहे.
दादर-पुणे-दादर या मार्गावर धावणाऱ्या शिवनेरी वातानुकूलित बससेवेच्या (Shivneri AC Bus) प्रवाशांसाठी आता तिकीट बुकिंग अधिक सोपे झाले आहे. महाराष्ट्र राज्य मार्ग परिवहन महामंडळाने (MSRTC) WhatsApp च्या माध्यमातून तिकीट आरक्षण करण्याची सुविधा सुरू केली असून, यामुळे प्रवाशांना यापुढे तिकीट खिडकीवर रांगेत उभे राहण्याची गरज भासणार नाही. नक्की वाचा: खासगी ट्रॅव्हल्सना ST Bus ची थेट टक्कर! ताफ्यात येताहेत 200 व्होल्वो बसेस .
WhatsApp वरून बुकिंगची प्रक्रिया
WhatsApp वरून बुकिंगचीही सुविधा वापरण्यासाठी प्रवाशांनी सर्वप्रथम 8097030022 हा WhatsApp नंबर आपल्या मोबाईलमध्ये सेव्ह करावा लागेल. त्यानंतर या क्रमांकावर "Hi" असा मेसेज पाठवावा लागेल. मेसेज पाठवल्यानंतर WhatsApp वर मिळणाऱ्या सूचनांचे टप्प्याटप्प्याने पालन करत प्रवाशांना उपलब्ध आसन निवडून तिकीट आरक्षण पूर्ण करता येईल.
प्रायोगिक तत्त्वावर सुविधा, कालमर्यादा निश्चित
एमएसआरटीसीने ही सुविधा सध्या प्रायोगिक तत्त्वावर सुरू केली असून, ती २४ सप्टेंबर ते २३ ऑक्टोबर २०२६ या कालावधीत उपलब्ध असेल. सुरुवातीला ही सेवा केवळ दादर-पुणे-दादर शिवनेरी या प्रीमियम बससेवेपुरतीच मर्यादित ठेवण्यात आली आहे. या कालावधीत प्रवाशांचा प्रतिसाद आणि WhatsApp द्वारे तिकीट बुकिंग प्रणालीची परिणामकारकता तपासून, त्यानंतर ही सेवा व्यापक स्तरावर राबवायची की नाही, याचा निर्णय महामंडळाकडून घेतला जाणार आहे.
मुंबई-पुणे मार्गावरील प्रवाशांना दिलासा
मुंबई ते पुणे या सर्वाधिक वर्दळीच्या आणि व्यस्त मार्गावर प्रवास करणाऱ्या प्रवाशांसाठी तिकीट आरक्षण प्रक्रिया अधिक सुलभ करणे, हा या उपक्रमामागील मुख्य उद्देश आहे. यामुळे प्रवाशांना तिकीट खिडकीवर प्रत्यक्ष जाण्याऐवजी थेट आपल्या मोबाईल फोनवरूनच संपूर्ण आरक्षण प्रक्रिया पूर्ण करता येणार आहे.
भविष्यातील विस्ताराची शक्यता
प्रायोगिक तत्त्वावरील ही सेवा यशस्वी ठरल्यास, एमएसआरटीसी दादर-पुणे-दादर शिवनेरी सेवेव्यतिरिक्त इतर मार्गांवरही WhatsApp तिकीट बुकिंगची सुविधा विस्तारण्याचा तसेच ती कायमस्वरूपी बुकिंग पर्याय म्हणून राबवण्याचा विचार करत आहे. दरम्यान, प्रायोगिक कालावधीत जास्तीत जास्त प्रवाशांनी या डिजिटल सुविधेचा वापर करावा, असे आवाहन महामंडळाने केले आहे.
एमएसआरटीसीकडून प्रवाशांच्या सोयीसाठी वेळोवेळी विविध डिजिटल उपक्रम राबवले जात आहेत. ऑनलाइन आरक्षण संकेतस्थळ आणि मोबाईल अॅपसह आता WhatsApp बुकिंगसारखी सुविधा उपलब्ध करून देत, महामंडळ प्रवाशांना अधिकाधिक सुलभ आणि जलद पर्याय उपलब्ध करून देण्याचा प्रयत्न करत असल्याचे दिसून येते.
(The above story first appeared on LatestLY on Sep 26, 2026 12:38 PM IST. For more news and updates on politics, world, sports, entertainment and lifestyle, log on to our website latestly.com).
