Mumbai Rain: मुंबईत मान्सूनचे जोरदार आगमन; बोरिवली, सांताक्रूझ, पवई, मुलुंड, चेंबूर, वरळी, कुलाबा आणि अलिबागला रेड अलर्ट
मुंबईला हवामान विभागाने सोमवारी रेड अलर्ट दिला आहे. बोरिवली, सांताक्रूझ, पवई, मुलुंड, चेंबूर, वरळी, कुलाबा आणि अलिबागला मुसळधार पावसाचा इशारा देण्यात आला आहे.
Mumbai Rain: भारतीय हवामान खात्याने (IMD) मुंबईतील अनेक उपनगरीय भागात ऑरेंज आणि रेड अलर्ट जारी केला आहे. रविवारी रात्री झालेल्या मुसळधार (Heavy Rain) पावसानंतर सोमवारी पहाटेही पावसाने जोरदार हजेरी लावली. शहराच्या अनेक भागात पाणी साचले आहे. ज्यामुळे वाहतूक विस्कळीत झाली आहे. आयएमडीने वर्तवल्यानुसार सर्वसाधारणपणे ढगाळ वातावरण आणि मुसळधार पाऊस राहील. किमान तापमान 24 अंश सेल्सिअस राहण्याची शक्यता आहे, तर कमाल तापमान 31 अंश सेल्सिअसच्या आसपास राहण्याची शक्यता आहे. मुंबईच्या साप्ताहिक हवामान अंदाजानुसार या संपूर्ण आठवड्यात पाऊस राहण्याची शक्यता वर्तवली आहे.
हवामान खात्याने 25 ते 27 मे दरम्यान कोकण आणि गोवा, मध्य महाराष्ट्रात वादळ, विजांचा कडकडाट आणि सोसाट्याच्या वाऱ्यांसह हलका ते मध्यम पाऊस पडण्याचा अंदाज वर्तवला आहे. मध्य महाराष्ट्रात सोमवारी ऑरेंज अलर्ट जारी करण्यात आला आहे. प्रादेशिक हवामान खात्याने "गडगडाटी वादळ, विजांचा कडकडाट, वादळ इत्यादींसह खूप मुसळधार पाऊस" असा अंदाज वर्तवला आहे. मुंबईतील आठ हवामान केंद्रांवर रेड अलर्ट जारी करण्यात आला आहे. बोरिवली, सांताक्रूझ, पवई, मुलुंड, चेंबूर, वरळी, कुलाबा आणि अलिबाग. नवी मुंबई, ठाणे आणि कल्याण येथे हवामान विभागाने ऑरेंज अलर्ट दिला आहे.
नॉवकास्टच्या इशाऱ्यांनुसार, रायगड जिल्हा रेड अलर्ट अंतर्गत आहे. मुसळधार पाऊस आणि वाऱ्याचा वेग जास्तीत जास्त असण्याची शक्यता वर्तवली आहे. दरम्यान, ठाणे आणि पालघर जिल्ह्यांना ऑरेंज अलर्ट अंतर्गत आहे.