Amit-Raj-Thackeray | (Photo Credits: Archived, edited, symbolic images)

Lok Sabha Election 2024: महाराष्ट्र नवनिर्माण सेनेने (MNS) लोकसभा निवडणुकीची (Lok Sabha Election) तयारी सुरू केली असून पुणे जिल्ह्यातील मावळ (Mawal) आणि पुणे लोकसभा मतदारसंघात (Pune Constituencies) उमेदवार उभे करण्याची शक्यता पक्षाच्या सूत्रांनी व्यक्त केली आहे. मावळचे विद्यमान खासदार श्रीरंग बारणे हे शिवसेनेतील मुख्यमंत्री एकनाथ शिंदे यांच्या गटात आहेत. यावेळी ते पुन्हा या जागेवर निवडणूक लढवण्याची शक्यता असताना राष्ट्रवादी आणि भाजपसारख्या अन्य पक्षांचेही या मतदारसंघाकडे डोळे लागले आहेत. अजित पवार यांचा मुलगा पार्थ यांनी 2019 मध्ये या मतदारसंघातून निवडणूक लढवली होती, मात्र त्यांचा पराभव झाला होता. तसेच भाजपचे माजी आमदार लक्ष्मण जगताप यांनीही 2014 मध्ये या मतदारसंघातून निवडणूक लढवली होती. तेव्हा त्यांना मनसेने पाठिंबा दिला होता.

या पार्श्‍वभूमीवर यापूर्वी कधीही हा मतदारसंघ न लढविणाऱ्या मनसेने मतदारसंघासाठी कंबर कसली आहे. पक्षाचे नेते रणजित शिरोळे आणि अमेय खोपकर यांच्या नुकत्याच झालेल्या बैठकीत या लोकसभा मतदारसंघातील सहाही विधानसभा क्षेत्रातील नेत्यांना निमंत्रित करून निवडणुकीची तयारी सुरू करण्यास सांगण्यात आल्याचं पक्षाच्या सूत्रांनी सांगितले. (हेही वाचा - 'आमदारकीसाठी संजय राऊत, उद्धव ठाकरे यांनी मनोहर जोशींचं घर जाळायला लावलं'- सदा सरवणकर यांचे खळबळजनक आरोप)

दरम्यान, मनसेचा उमेदवार महायुतीच्या उमेदवाराच्या संभाव्यतेला कितपत हाणून पाडू शकतो याचे मूल्यांकन केले जात आहे. मनसेने यावेळी आपली शक्ती पुणे जिल्ह्यावर केंद्रित केल्याचे दिसून येत आहे. पक्षाचे सुप्रिमो राज ठाकरे यांचे पुणे दौरे अलीकडे वाढले असतानाच त्यांनी या निवडणुकीतील उमेदवारासाठी पक्षाच्या रणनीतीची जबाबदारीही त्यांचा मुलगा अमित यांच्यावर सोपविल्याचे कळते. यामुळे यावेळच्या लोकसभा निवडणुकांबाबत मनसे गंभीर असल्याची अटकळ बांधली जात आहे.

भाजपचे विद्यमान खासदार गिरीश बापट यांच्या निधनानंतर मनसेचे पुण्यातील माजी नगरसेवक वसंत मोरे यांनी पुणे लोकसभा मतदारसंघावर दावा केला होता. पोटनिवडणुकीत उमेदवार म्हणून पक्षनेतृत्वाला पाठीशी घालण्याचे आवाहन करतानाच आपण मनसेचा पहिला खासदार होऊ शकतो, असे ते म्हणाले होते. मात्र, मतदारसंघात पोटनिवडणूक जाहीर न झाल्याने मोरे यांना आपले म्हणणे सिद्ध करण्याची संधी मिळाली नाही. मोरे यांना शहरातील त्यांच्या सहकारी नेत्यांचा पाठिंबा मिळण्याची शक्यता नसली तरी अमित ठाकरे यांना संधी मिळाल्यास आणि त्यांच्या बाजूने निर्णय घेतल्यास ते पक्षाचे उमेदवार होऊ शकतात. अमित ठाकरे मंगळवारी पुण्याला जाणार असून तेथे ते पक्ष संघटना, उमेदवार निवड, प्रचार आदी मुद्द्यांवर पक्ष पदाधिकाऱ्यांच्या बैठकीला संबोधित करतील अशी शक्यता वर्तवण्यात येत आहे.