Marathi Signs on Metro 12 Route: मेट्रो मार्ग 12 च्या साइनबोर्ड्सवरून नवीन वाद; MNS च्या आंदोलनानंतर MMRDA ने केली मराठी भाषेतील फलक लावण्यास सुरुवात

मुंबई मेट्रोच्या (Mumbai Metro) विस्ताराने शहर आणि आजूबाजूच्या परिसरातील प्रवास सुलभ करण्याची तयारी केली आहे, पण अलीकडेच ठाणे जिल्ह्यातील डोंबिवली येथे मेट्रो मार्ग 12 च्या साइनबोर्ड्सवरून एक नवीन वाद उभा राहिला. या मार्गाच्या बांधकाम स्थळावरील माहिती फलक हिंदी आणि इंग्रजीत लिहिले गेले होते, यावर मराठीचा अभाव होता. यामुळे स्थानिक राजकीय पक्ष आणि नागरिकांमध्ये नाराजी पसरली. महाराष्ट्र नवनिर्माण सेनेने (MNS) यावर तीव्र आक्षेप घेत बुधवार, 9 एप्रिल 2025 रोजी हिंदी मजकुराला काळे फासून आपला निषेध नोंदवला. या घटनेनंतर मुंबई मेट्रोपॉलिटन रीजन डेव्हलपमेंट अथॉरिटीने (MMRDA) तातडीने पावले उचलली आणि 11 एप्रिलपासून मराठी भाषेचा समावेश असलेले नवे फलक लावण्यास सुरुवात केली.

महाराष्ट्र नवनिर्माण सेनेच्या कार्यकर्त्यांनी केलेल्या निषेधानंतर, डोंबिवलीमध्ये सध्या बांधकाम सुरू असलेल्या मेट्रो मार्ग 12 वर, मराठी भाषेचा समावेश करण्यासाठी एमएमआरडीएने मेट्रो साइनबोर्ड अपडेट करण्यास सुरुवात केली आहे. बुधवारी, डोंबिवलीतील मेट्रो लाईन 12 (कल्याण-तळोजा) वरील साइनबोर्डांविरुद्ध मनसे कार्यकर्त्यांनी निदर्शने केली, हिंदीमध्ये लिहिलेल्या भागांवर काळे फासले आणि सर्व माहिती फलक राज्याची अधिकृत भाषा मराठीत लावण्याची मागणी केली. मनसेचे माजी नगरसेवक प्रभाकर जाधव यांनी या निषेधाचे नेतृत्व केले.

ते म्हणाले, महाराष्ट्रात मराठीला प्राधान्य दिले पाहिजे. पण एमएमआरडीएसारखी संस्था हिंदीचा वापर करत आहे. म्हणूनच आम्ही साइनबोर्ड काळे केले आहेत आणि सर्व बोर्ड मराठीत असावेत अशी मागणी केली आहे. जर तसे झाले नाही तर आम्ही आमच्या मनसे शैलीत ते हाताळू. निषेधानंतर, एमएमआरडीए अधिकाऱ्यांनी सांगितले की, गुरुवारी त्यांनी मेट्रोचे काम करणाऱ्या कंत्राटदाराला कामाच्या कराराच्या अटी आणि शर्तींमध्ये नमूद केल्यानुसार, साइनबोर्डवर इंग्रजीसह मराठी वापरण्याची सूचना पुन्हा दिली. एमएमआरडीएच्या सूचनांनंतर, शुक्रवारी कर्मचारी सर्व साइनबोर्डवरील हिंदीऐवजी मराठी वापरताना दिसले. यापूर्वीही मनसेकडून बँका, शैक्षणिक संस्था आणि व्यावसायिक आस्थापनांमध्ये मराठी साइनबोर्ड्ससाठी मागण्या झाल्या आहेत. (हेही वाचा: MNS Marathi in Banks Campaign: मनसे कार्यकर्त्यांनी घाटकोपरच्या बँकेतून हटवली हिंदी भाषेत व्यवहार करण्यासंदर्भातील पाटी; दिली मराठीतच बोलण्याची ताकीद)

दरम्यान, मेट्रो मार्ग 12 हा एमएमआरडीएच्या महत्त्वाकांक्षी प्रकल्पांपैकी एक आहे, जो कल्याण ते तळोजा असा 22.17 किलोमीटरचा उन्नत मार्ग आहे, ज्यामध्ये 19 स्थानके असतील. डिसेंबर 2027 पर्यंत तो पूर्ण होण्याची अपेक्षा आहे. मार्च 2024 मध्ये माजी मुख्यमंत्री एकनाथ शिंदे यांच्या हस्ते या प्रकल्पाचा शुभारंभ झाला, आणि सध्या डोंबिवली आणि कल्याण परिसरात खांबांचे बांधकाम जोरात सुरू आहे. हा प्रकल्प पूर्ण झाल्यावर कल्याण-डोंबिवली आणि नवी मुंबईतील रहिवाशांना जलद आणि आरामदायी प्रवासाचा पर्याय मिळेल.